ކޮވިޑް-19ގެ އެއްވެސް އާލާމާތެއް ހުރިނަމަ ސްކޫލަށް ދަރިވަރުން ނުފޮނުވުމަށް އިލްތިމާސްކޮށްފިއެވެ.
ރާއްޖޭގެ ކޮވިޑް-19ގެ ހާލަތާއި ބެހޭ ގޮތުން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕް (ޓެގް)ގައި ހިމެނިވަޑައިގަންނަވާ، ޕީޑިއެޓްރިކް އިންފެކްޝަންސް އެކްސްޕާޓް، ޑރ. ނަޒްލާ މުސްތަފާ ވިދާޅުވީ ކޮވިޑް-19 ކަމުގައި ނުވިނަމަވެސް ބައްޔެއްގެ އެއްވެސް އަލާމާތެއް ހުރި ނަމަ ދަރިވަރުންނާއި ޓީޗަރުން ސްކޫލަށް ގޮސްގެން ނުވާނެ ކަމަށެވެ. އަދި ބެލެނިވެރިން ވެސް ރޯގާގެ އަލާމާތެއް ހުރި ނަމަ ސްކޫލަށް ނުދިއުމަށް ވަނީ އެދިފައެވެ.
ބައެއް ބެލެނިވެރިން ރޯގާގެ އަލާމާތެއް ހުރި ނަމަވެސް ބޭސް ދިނުމަށްފަހު ސްކޫލަށް ފޮނުވާކަން ފާހަގަކުރައްވައި ޑރ.ނަޒްލާ ވިދާޅުވީ އެގޮތަށް އަމަލުކުރުމުން ބަލި ފެތުރެން މެދުވެރިވާ ކަމަށެވެ. އަދި ބަލި ކޮންޓްރޯލް ކުރުމަށް އަޅާފައިވާ ފިޔަވަޅުތަކާއެކު މިފަދަކަންކަމަށް ސަމާލުވާން ޖެހޭ ކަމަށް ޑރ.ނަޒްލާ ވިދާޅުވިއެވެ.
މީގެ އިތުރުން ޑރ.ނަޒްލާ ވިދާޅުވީ ކޮވިޑް-19ގެ ކޭސްތައް މަދުވުމާއި ގުޅިގެން ވަރަށް ބޮޑެތި ލުއިތަކެއް ދީފައިވާއިރު، މީހުންގެ މޫވްމެންޓްތައް ގިނަވާނެ ކަމަށެވެ. މުޖުތަމައުގެ ތެރޭގައި ކޮވިޑް ފެތުރުމުގެ ފުރުސަތު ބޮޑުވާނެ ކަމަށް ޑރ.ނަޒްލާ ވިދާޅުވިއެވެ. އެހެންކަމުން ދަރިވަރުންނާއި، ބެލެނިވެރިން މިފަދަ ކަންކަމަށް ސަމާލުވުމަށް އިލްތިމާސްކޮށްފައިވެއެވެ.
ދެން ވަކިން ޚާއްސަކޮށް އަޅުގަނޑުމެން އެދެން ކުރީގައި ވެސް ދޭތެރެ ދޭތެރެން ފުލޫ އެއްޗެހި އުޅޭއިރު ވެސް ބައެއް ބެލެނިވެރިން ހަމަ ޕްރެސަޓަމޯލް ބޭސް ދީފައި ވެސް ފޮނުވާ ކުދިން ބަލިވެ ހުއްޓަ. އެހެންވީމާ އެއްގޮތަކަށް ވެސް އަލާމާތް ހުންނަންޏާ ކުދިން ސްކޫލަށް ނުފޮނުވަން. ޓީޗަރުން ވެސް ސްކޫލަށް ނުދިއުން އަދި ކުދިން ބަލާ ބެލެނިވެރިން ވެސް ސްކޫލު ދޮށަށް ނުދިއުމަށް އަޅުގަނޑުމެން ވަރަށް ބޮޑަށް އިލްތިމާސްކުރަން. އަލާމަތް ހުރި ކަމަށްވާނަމަ ވީހާވެސް އަވަހަށް ޓެސްޓު ހެދުމަށް އެދެން.ޑރ. ނަޒްލާ މުސްތަފާ
ދިރާސީ އައު އަހަރުގެ ކިޔެވުން މިމަހުގެ 10 ގައި ފަށާއިރު، މާލެ ސަރަހައްދުގެ ސްކޫލްތަކުގެ ކިޔެވުން ފެށޭ ގަޑި ފުރަތަމަ ދެ ހަފުތާގައި ތަފާތުވާނެ އެވެ. މިއަހަރުވެސް ސްކޫލްތަކުން އަމަލުކުރަންވީ އުސޫލު އެޑިއުކޭޝަން މިނިސްޓްރީން އާންމުކޮށްފައިވެއެވެ.
އެޑިއުކޭޝަން މިނިސްޓްރީން އާންމުކޮށްފައިވާ އުސޫލުގައި ވާގޮތުން ސްކޫލްތަކުގެ ދަންފަޅިތަކުގެ ދިގުމިނަކީ އާންމު ހާލަތުގައި ވެސް ދަރިވަރުން ސްކޫލްތަކުގައި ހޭދަކުރަންޖެހޭ ވަގުތު ނަމަވެސް، ފުރަތަމަ ދެ ހަފްތާގައި މާލެ ސަރަހައްދުގެ ސްކޫލްތަކުގެ ކިޔެވުން ފެށޭގަޑި އެކި ގްރޭޑްތަކާ ތަފާތުވާނެއެވެ. އެހެންކަމުން އެކި ގްރޭޑްތަކުގެ ކިޔެވުން ފެށޭ ގަޑިތަކުގައި ވީހާވެސް ތޮއްޖެހުން ކުޑަވާނެހެން އިންތިޒާމުތައް ހަމަޖެއްސުމަށް ވަނީ އަންގާފައެވެ. ކްލާސްރޫމްތަކުގައި ވައި ދައުރުވާނެހެން ހުރިހާ ވަގުތެއްގައި ދޮރުތައް ހުޅުވާފައި ބެހެއްޓުމަށާއި، ކިޔަވައިދިނުން ކުރިއަށް ގެންދިއުމުގައި ގައިދުރުކަން ހުންނާނެހެން ކްލާސްރޫމްތައް ތަރުތީބު ކުރުމަށާއި، އެއަރ ކޮންޑިޝަން ކޮށްފައިވާ ކްލާސްތަކުގައި ދަރިވަރުންގެ މެދުގައި ތިން ފޫޓުގެ ދުރުމިން ހުންނާނެހެން އިންތިޒާމުތައް ހަމަޖެއްސުމަށް ސްކޫލްތަކަށް ވަނީ އަންގާފައެވެ.
