ފޭސް ދޭއްގައި ބިންގާ އެޅި ސްކޫލް ނޮވެމްބަރަށް ނިންމައި، އިތުރު ދެ ސްކޫލެއްގެ މަސައްކަތް މި އަހަރު ފަށަނީ
ހުޅުމާލެ ދެވަނަ ފިޔަވަހީގައި މި ސަރުކާރުން އަޅާފައިވާ 1,700 ކުދިންގެ ސްކޫލްގެ މަސައްކަތް މި އަހަރުގެ ނޮވެމްބަރު މަހު ނިމޭނެ
އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މަޖިލީހުގެ މިއަދުގެ ޖަލްސާގައި މެންބަރުންގެ ސުވާލުތަކަށް ޖަވާބު ދެއްވަނީ | ރާއްޖެއެމްވީ
ހުޅުމާލެ ފޭސް2 ގައި އަޅާ ސްކޫލެއްގެ މަސައްކަތް މި އަހަރުގެ ފަހުކޮޅު ނިމޭނެ ކަމަށާއި އެ ސްކޫލުގައި ކިޔަވައިދޭން ފެށުމުން ހުޅުމާލޭގެ ސްކޫލުތަކުން ޖާގަ ހޯދުމުގައި ދިމާވާ ދަތިތަކަށް ކޮންމެވެސް ވަރެއްގެ ހައްލެއް ލިބޭނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެ އެވެ.
ހުޅުމާލެ ދެވަނަ ފިޔަވަހީގައި މި ސަރުކާރުން އަޅާ 1,700 ކުދިންގެ ޖާގައިގެ ސްކޫލްގެ ބިންގާ މި ސަރުކާރުން އެޅީ 2023 ވަނަ އަހަރުގެ ޑިސެމްބަރު 25 ގައެވެ. އެ ސްކޫލްގެ މަސައްކަތަކީ ކޮންޓްރެކްޓާ ފައިނޭންސް އުސޫލުން އެޑިއުކޭޝަން މިނިސްޓްރީއާއި ރަޝީދު ކާޕެންޓްރީ ކޮމްޕެނީ (އާރްސީސީ) ގުޅިގެން ހިންގާ މަޝްރޫއެކެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް މިނިސްޓަރާ ސުވާލު ކުރެއްވީ ހުޅުމާލެ ފޭސް2 އިން ގިނަ އަދަދެއްގެ ދަރިވަރުން އަދިވެސް ކިޔެވުމަށް މާލެ އަންނަން ޖެހޭތީ އެކަމަށް ދާއިމީ ހައްލެއް ލިބޭނެ ދުވަހަކާ ގުޅޭގޮތުންނެވެ.
މެންބަރުގެ ސުވާލަށް ޖަވާބު ދެއްވަމުން މިނިސްޓަރު ޝަފީއު ވިދާޅުވީ އާބަން ޑިވެލޮޕްމެންޓުގެ ތެރެއިން މިހާރު އެންމެ އިސްކަން ދެނީ ފްލެޓު އެކަނި އަޅަން ކަމަށާއި ނަމަވެސް އެ ތަންތަނުގައި ދިރިއުޅޭ ރައްޔިތުންނަށް ބޭނުންވާނެ ހިދުމަތްތައް ގާއިމްކުރަން ވެސް އިސްކަން ދޭން ޖެހޭ ކަމަށެވެ.
އެގޮތުން ފޭސް ދޭއްގައި މީހުން ގާއިމުވި ފަހުން ފަސް އަހަރު ވޭތުވެ ދިޔައިރު ވެސް އޭރުގެ ސަރުކާރަށް އެޅުނީ އެންމެ ސްކޫލެއް ކަމަށާއި އަދި އެއީ ސަލާހުއްދީން ސްކޫލް ކަމަށްވެސް މިނިސްޓަރ ވިދާޅުވިއެވެ. އަދި މި ސަރުކާރުން ވެރިކަމަށް އައި އިރު އެ ސްކޫލްގެ ކިޔެވުން ދެ ދަންފަޅިއަށް ބަދަލުކުރީ ގިނަ ކުދިންނަށް އެ ފުރުސަތު ފަހިކޮށްދިނުމަށް ކަމަށް މިނިސްޓަރު ވިދާޅުވިއެވެ.
"މިސާލަކަށް އަޅުގަނޑު ދަންނަވާލަން ބޭނުންވަނީ 7 ފްލެޓުގެ ހިޔާ ޓަވަރުތައް ނިމިގެން ދިޔައިރުގައި ވަރަށް ގިނަ ދުވަސްވި، ފަސް ވަރަކަށް އަހަރު ދިޔަ. އެ ފަސް އަހަރު ތެރޭ ވެސް އެކަށީގެންވާ ސްކޫލު އިމާރާތްތަކެއް އެ ސަރަހައްދުގައި ގާއިމެއް ނުކުރެވުނު، ކުރެވިފައި ހުރީ އެންމެ ސްކޫލެއް، އެއީ ސޮލާހުއްދީން ސްކޫލު ބިނާ ކުރެވިގެން ދިޔައީ. ސޮލާހުއްދީން އެއް ސެޝަނަށް ހިނގަމުން އަންނަނިކޮށް އަޅުގަނޑު ނިންމީ އެތައް ހާސް ދަރިވަރުންނެއް ކޮންމެ ދުވަހަކު ބްރިޖު ހުރަސްކޮށް މާލެ އަށް އަންނަމުންދާތީ އެ ތަކުލީފު ކުޑަކުރުމަށް ސޮލާހުއްދީން ދެ ސެޝަނަށް ބަދަލު ކުރުމަށް."އެޑިއުކޭޝަން މިނިސްޓަރ ޝަފީއު
ހުޅުމާލެ ފޭސް2 ގައި އަޅަމުން އަންނަ 54 ކްލާސްރޫމުގެ ސްކޫލު އިމާރާތުގެ މަސައްކަތް ނޮވެމްބަރަށް ނިމޭނެ ކަމަށާއި ހިޔާ ސަރަހައްދުގައި އަޅާ އެ ސްކޫލުގައި ކިޔަވައިދޭން ފެށުމުން ހުޅުމާލެެ ފޭސް2 އިން މާލެ އަށް ސްކޫލަށް އަންނަން ދަރިވަރުން ކުރާ ދަތުރުތަކަށް ފުދޭވަރަކަށް ބޮޑަށް ހައްލެއް ލިބޭނެ ކަމަށް އެޑިއުކޭޝަން މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ މި އަހަރު ތެރޭ އިތުރު ދެ ސްކޫލެއްގެ މަސައްކަތް ހުޅުމާލޭގައި ފަށާނެ ކަމަށާއި އެގޮތުން ފޭސް ދޭއްގައި އެއް ސްކޫލާއި ފޭސް އެކެއްގައި އެއް ސްކޫލްގެ މަސައްކަތް ފަށާނެ ކަމަށެވެ.
އަދި އެ ސްކޫލް ވެގެންދާނީ އެތައް ދުވަހެއް ވަންދެން ހުޅުމާލެ ފޭސް ދޭއްގައި ދިރިއުޅޭ ދަރިވަރުން ތަހައްމަލުކުރި ދައްޗަށް ލިބިގެންދާނެ ފަސޭހައެއް ކަމަށް ވެސް މިނިސްޓަރ ޝަފީއު ވިދާޅުވިއެވެ.
