ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާއާ ގުޅިގެން ހިންގާ ތަހުގީގަށް ރައީސް ނަޝީދުގެ ބަޔާނެއް މުހިއްމު ކަމަށް ޕްރޮސެކިއުޓަރ ޖެނެރަލް ހުސައިން ޝަމީމު ވިދާޅުވެއްޖެއެވެ.
އަންގާރަ ދުވަހު ނޭސްވެރިންނާ ބައްދަލު ކުރައްވައި ދެއްކެވި ވާހަކަފުޅުގައި ޕީޖީ ވިދާޅުވީ، ތަހުގީގަށް އަދިވެސް ރައީސް ނަޝީދުގެ ބަޔާނެއް ނުލިބޭ ކަމަށާއި، އެފަދަ ބަޔާނެއް ވަރަށް މުހިންމު ކަމަށެއެވެ. ހަމަލާގެ ތަހުގީގަށް ލިބިފައިވާ ބައެއް މައުލޫމާތުތައް އިތުރަށް ކަށަވަރު ކުރުމުގެ ގޮތުން ރައީސް ނަޝީދުގެ ބަޔާނެއް ބޭނުންވާ ކަމަށް ފުލުހުން ވެސް ބުނެފައިވާކަން ޕީޖީ ފާހަގަކުރެއްވިއެވެ.
އެ ހަމަލާގައި އަމަލީ ގޮތުން ބައިވެރިވި ހަތަރު މީހެއްގެ މައްޗަށް މިހާރުވަނީ ކްރިމިނަލް ކޯޓުގައި ދައުވާ އުފުލާފައެވެ. ޕީޖީ ވަނީ އެ ދައުވާތަކުގެ ތަފްސީލް ވެސް ހިއްސާ ކުރައްވާފައެވެ. ޕީޖީ ވިދާޅުވީ، ރައީސް ނަޝީދުގެ ބަޔާނެއް ހޯދަން މަސައްކަތް ކުރަމުން އަންނަ ކަމަށެވެ.
ޕީޖީ ވިދާޅުވި ގޮތުގައި ޝަރީއަތް ފެށުމުގެ ކުރިން ނަޝީދުގެ ބަޔާނެއް މުހިންމު ނަމަވެސް، އެމަނިކުފާނަކީ މި ހަމަލާގެ ވިކްޓިމްއެއްކަން ގަބޫލުކުރަންޖެހޭ ކަމަށެވެ. އެހެންކަމުން އެމަނިކުފާނުގެ ހާލަތަށް ވެސް އިހުތިރާމް ކުރަންޖެހޭ ކަމަށް ވެސް ވިދާޅުވިއެވެ.
މި ހަމަލާއާ ގުޅިގެން 4 މީހެއްގެ މައްޗަށް ޖުމްލަ 12 ދައުވާއެއް ކްރިމިނަލް ކޯޓުގައި ވަނީ އުފުލާފައެވެ.
