މެއި 6ގެ ހަމަލާގެ އިތުރު އަޑުއެހުމެއް އާދިއްތަ ދުވަހު

ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅޭ އަޑުއެހުމެއް އާދީއްތަ ދުވަހު ކްރިމިނަލް ކޯޓުގައި ތާވަލުކޮށްފިއެވެ.

މި މައްސަލައިގައި ދައުވާ އުފުލާފައިވާ މީހުންގެ ތެރެއިން އާދީއްތަ ދުވަހަށް ތާވަލުކޮށްފައިވަނީ ހއ. މޮޅަދޫ، ބަހާރުގެ އަބްދުﷲ އަލީމަނިކު އަދި ހއ. ހޯރަފުށީ، އަލަނާސިގެ މުހައްމަދު ތަސްލީމުގެ އަޑުއެހުމެވެ. އަޑުއެހުން ތާވަލުކޮށްފައިވަނީ ހެނދުނު 9:00 ގައެވެ.

އެންމެފަހުން މި މައްސަލައިގެ އަޑުއެހުމެއް ބާއްވާފައިވަނީ މިދިޔަ އަންގާރަ ދުވަހުއެވެ.

އަންގާރަ ދުވަހުގެ އަޑުއެހުމުގައި އޮތީ ދައުލަތުގެ ހެކިންގެ ހެކިބަސް ނެގުމެވެ.

މި އަޑުއެހުމުގައި ދައުލަތުގެފުރަތަމަހެއްކެއްގެ ގޮތުގައި ހާޒިރުކުރީ ނަޝީދަށް ސެކިއުރިޓީ ދިނުމުގައި ޙަރަކާތްތެރިވި ފަރާތެކެވެ.

ދެންވެސް ހާޒިރުކުރީ ސެކިއުރިޓީ ދިނުމުގައި އުޅުނު އޮފިސަރެކެވެ. އެއީ ޙާދިސާ ހިނގި ދުވަހު ނަޝީދުގެ ޕަރސަނަލް ސެކިއުރިޓީ އޮފިސަރެވެެެ.

އޭނާ ބުނީ، ޙާދިސާ ހިނގި ވަގުތު ބާރުގަޑަ އަޑެއް އިވުނު ކަމަށާއި، ނަޝީދު ބިންމައްޗަށް ވެއްޓުނު މަންޒަރު ފެނުނު ކަމަށެވެ.

ނަޝީދު އަތްމައްޗަށް ލައިގެން ވީއައިޕީ ކާރަށް އެރުވި ކަމަށާއި، އެ ކާރު ނުދުއްވުމުން، ފަހަތުގައި އޮތް ބެކަޕް ކާރަށް އެރުވިކަމަށް އޭނާ ބުންޏެވެ.

ބެކަޕް ވެހިކަލަށް އަރުވައިގެން އޭޑީކޭއަށް ދިއުމާމެދު ހޭދަވެފައިވާނީ ފަސް ވަރަކަށް މިނެޓުކަމަށް އޭނާ ބުންޏެވެ.

ނަޝީދުގެ ހަށިކޮޅުގައި ގިނަ އަދަދެއްގެ ލޭ ހުރިކަމަށް އޭނާ ބުންޏެވެ.

އޭގެ އިތުރުން، ހެކިވެރިޔާގެ އަތާއި ކަނދުރާއަށްވެސް އަނިޔާތަކެއްވިކަމަށް ހެކިބަސް ދެމުން އޭނާ ބުންޏެވެ.

މި އަޑުއެހުމުގައި ގާޒީ ވިދާޅުވީ، މި ހެކިވެރިޔާއާއި އަދި އަންގާރަ ދުވަހު ތާވަލު ކުރެވިފައިވާ އިތުރު ދެ ހެކިންނަކީވެސް ވަކި މިންވަރަކަށް ރައްކާތެރި ކުރުމަށް ޝަރީއަތުން އަމުރުކޮށްފައިވާ ހެކިން ކަމަށާއި، ވުމާއެކު ހުޅުވާލައިގެން ޝަރީއަތް ކުރިއަށް ގެންދިއުމުގައި ދަތިތައް ހުރި ކަމަށެވެ.

ވުމާއެކު، އަޑުއެހުމުގެ ބާކީ ބައި ވަނީ ސިއްރުކޮށްފައެވެ.