ގަރާރެއްގެ ސިފަ ނެތް ކަމަށް ބުނެ ނަޝީދުގެ އިތުބާރު ނެތްކަމުގެ މައްސަލައާއި ދެކޮޅަށް ޑިމޮކްރެޓްސްއިން ތެދުވެއްޖެ
މިއީ މީގެ ކުރިން އެ ބޭފުޅުން ފާހަގަކުރައްވާފައިވާ ނުކުތާ އެއް ނޫން
މެދު ހެންވޭރު ދާއިރާގެ މެންބަރު އަލީ އާޒިމް
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަަލައިގައި ގަރާރެއްގެ ސިފަ ނެތް ކަމަށް ބުނެ އެ މައްސަލަ އާއި ދެކޮޅަށް ދަ ޑިމޮކްރެޓްސް އިން ތެދުވެއްޖެއެވެ.
އާދިއްތަ ދުވަހުގެ ރައްޔިތުންގެ މަޖިލީހުގެ ޖަލްސާ އަށް ނަޝީދުގެ އިތުބާރު ނެތްކަމުގެ މައްސަލަ އެޖެންޑާކޮށްފައި އޮތް އިރު އެ ޖަލްސާ އަށް ވަޑައިގެން ތިއްބެވީ 56 މެންބަރުންނެވެ.
ޖަލްސާގެ ރިޔާސަތު ބަލަހައްޓަވަމުން ގެންދަވަނީ ވިލުފުށީ ދާއިރާގެ މެންބަރު ހަސަން އަފީފެވެ.
މި ޖަލްސާ ފެށުމާއެކު ދަ ޑިމޮކްރެޓްސްއަށް ނިސްބަތްވެވަޑައިގަންނަވާ މެދު ހެންވޭރު ދާއިރާގެ މެންބަރު އަލީ އާޒިމް ވަނީ ނިޒާމީ ނުކުތާ އެއް ނަންގަވާފައެވެ. އާޒިމް ވަނީ ޖަލްސާގެ ކަންކަން ރީތިކޮށް ގެންދަން ބޭނުންވާ ކަމަށް ވާނަމަ އެނާ އަށް ފުރުސަތު ދޭން ޖެހޭނެ ކަަމަށް ވިދާޅުވެފައެވެ. އަދި އާޒިމް ވަނީ ނަޝީދު ވަކިކުރުމުގެ މައްސަލަ ހުށަހަޅާފައި ވަނީ މަޖިލިސް ޤަވާއިދުގެ 61 ވަނަ މާއްދާގެ (ށ) އާއި 204 ވަނަ މާއްދާގެ (ހ)ގައިވާ ޤަވާއިދާއި ޚިލާފަށް ކަަމަށް ވިދާޅުވެފައެވެ. އާޒިމް ވަނީ ނަޝީދު ވަކިކުރަން ހުށަހަޅާފައި އޮތީ ބިލެއްތޯ، ގަރާރެއްތޯ، ކޮމިޓީ ރިޕޯޓެއްތޯ ނުވަތަ މައްސަލައެއްތޯ ސުވާލު އުފައްދަވާފައެވެ.
ޖަވާބުގައި ރިޔާސަތުގައި އިންނެވި މެންބަރު އަފީފް ވަނީ އެ މައްސަލަ ހުށަހަޅާފައި ވަނީ ޤަރާރެއްގެ ގޮތުގައި ކަމަށް ވިދާޅުވެފައެވެ. ނަމަވެސް ޤާނޫނު އަސާސީގެ 82 ވަނަ މާއްދާގެ (ބ)ގެ ދަށުން ހުށަހަޅާފައިވާ ޤަރާރަކަށް އެ ޤަރާރު ވާއިރު، އެ މައްސަލައިގައި ޤަރާރެއްގެ ސިފަ ފުރިހަމަ ނުވާ ކަމަށް އާޒިމް ވަނީ ވިދާޅުވެފައެވެ. 82 ވަނަ މާއްދާގެ (ބ)ގައި އޮތީ މަޖިލީހުގެ ރައީސް ވަކިކުރިމަށް މަޖިލީހަށް ހުށަހެޅުމުގެ 14 ދުވަސް ކުރިން އެކަން މަޖިލީހަށް އަންގަންވާނެ ކަމަށެެވެ. އަދި ގަރާރުގައި ދީބާޖާ އެއް ނެތް ކަމަށް ފާހަގަކުރައްވާ އާޒިމް ވަނީ މައްސަލަ ކުރިއަށް ގެންދަވަން ފުރުސަތު ނުދެއްވާނެ ކަމަށް ވިދާޅުވެފައެވެ.
އާޒިމްގެ އިތުރުން ހުޅުދޫ ދާއިރާގެ މެންބަރު އިލްޔާސް ލަބީބާއި މަޑަވެލީ ދާއިރާގެ މެންބަރު ހުސައިން ފިރުޝާން އާއި އުނގޫފާރު ދާއިރާގެ މެންބަރު މުހައްމަދު ވަޙީދު ވެސް ވަނީ ނިޒާމީ ނުކުތާ ނަންގަވައިގެން އެ މައްސަލަ ކުރިއަށް ނުގެންދެވޭނެ ކަމަށް ވިދާޅުވެފައެވެ. ނަމަވެސް މިއީ މީގެ ކުރިން އެ ބޭފުޅުން ފާހަގަކުރައްވާފައިވާ ނުކުތާ އެއް ނޫނެވެ.
