ރައީސް ޞާލިޙް ގައުމު ހިންގަވަމުން ގެންދަވަނީ އިދިކޮޅު ފަރާތްތައް "ޖޭ" ވާހާ މޮޅަށް ކަމަށް ޓޫރިޒަމް މިނިސްޓަރު އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރު މައުސޫމް ކުރެއްވި ޓްވީޓެއްގައި ވިދާޅުވީ އިދިކޮޅު ޕާޓީީގެ ބައެއް އިސް ބޭފުޅުންނާ "ވާދަވެރި" ގޮތަކަށް ބަސް ވިދާޅުވުމުން ދޭހަވަނީ އިންތިޚާބު އިއުލާނުކުރުމުގެ މާކުރިން އެވެރިން ބަލި ގަބޫލު ކޮށްފިކަން ކަމަށާއި ރައީސް ޞާލިޙް ހަމަ މޮޅީ ކަމަށެވެ. ކޮވިޑްގެ ބަލިމަޑުކަމާއެކު ރައްޖޭގެ އިކޮނޮމީ އިނދަ ޖައްސާލިއިރު ވެސް ރައީސް ޞާލިޙް ގެންދަވަނީ އިދިކޮޅުން ހަސަދަވެރިވާހާ މޮޅަށް ގައުމު ހިންގަވަމުން ކަމަށް މިނިސްޓަރު މައުސޫމު ވިދާޅުވިއެވެ.
އިދިކޮޅު ކޯލިޝަނުން ދާދިފަހުން ވަނީ "މިނިވަންކަމުގެ ދިފާއުގައި – ދިވެހީން" ގެ ނަމުގައި ކެމްޕޭނެއް ވެސް ފަށާފައެވެ. މި ކެމްޕޭނުގައި ބައިވެރިވުމުގެ ދައުވަތު އިދިކޮޅުން ވަނީ އެމްޑީޕީ ފިޔަވައި ސަރުކާރު ކޯލިޝަނުގައި ހިމެނޭ ޖުމްހޫރީ ޕާޓީ އާއި އަދާލަތު އަދި އެމްއާރްއެމްއަށް ވެސް އަރުވާފައެވެ. އެހެންނަމަވެސް އަދާލާތާއި ޖޭޕީން ވަނީ އެ ދައުވަތު ގަބޫލު ނުކުރައްވާނެ ކަމަށް ވިދާޅުވެފައެވެ. ކޯލިޝަންގެ ބޭރުން އެމްޑީއޭ އަށް ވެސް ވަނީ ދައުވަތު އަރުވާފައެވެ. މި ދައުވަތާ ގުޅިގެން އެމްޑީއޭ އިން މިހާތަނަށް ވަކި އެއްޗެއް ހާމަކޮށްފައެއް ނުވެއެވެ.
މިފަދަ ކެމްޕޭނެއް އިދިކޮޅުން ފެށީ ޕީޕީއެމްގެ ރައީސް އަދި ކުރީގެ ރައީސް އަބްދުﷲ ޔާމީންގެ އިރުޝާދުގެ ދަށުން ކަމަށް ވެސް އިދިކޮޅުން ވަނީ ބުނެއެވެ.
