އިދިކޮޅުގެ ދައުވަތަށް ޖޭޕީއާއި އަދާލަތުން ނޫނެކޭ ބުނެފި، ގޮތް ނިންމަން އެމްއާރްއެމް މަޝްވަރާގައި
2 އޯގަސްޓު 2021 | ހޯމަ 15:09އިދިކޮޅުގެ "މިނިވަންކަމުގެ ދިފާއުގައި - ދިވެހީން" ކެމްޕެއިން ފެށީ މިދިޔަ ހުކުރު ދުވަހުގެ ރޭ
ސަރުކާރު ކޯލިޝަނުގައި ހިމެނޭ ލީޑަރުން
އަޅުވެތިކަމުން ގައުމު ސަލާމަތް ކުރުމުގެ ނަމުގައި ޕީޕީއެމް ޕީއެންސީ ކޯލިޝަނުން ފަށާފައިވާ "މިނިވަންކަމުގެ ދިފާއުގައި - ދިވެހީން" ކެމްޕެއިނާއި ގުޅުމަށް ސަރުކާރުގެ ކޯލިޝަނުގައި ހިމެނޭ ޖުމްހޫރީ ޕާޓީ އާއި އަދާލަތު ޕާޓީއަށް ދިން ދައުވަތަށް އެ ދެޕާޓީން ނޫނެކޭ ބުނެފިއެވެ. މޯލްޑިވްސް ރިފޯމް މޫވްމެންޓުން މި ދައުވަތާމެދު އަދި ގޮތެއް ނުނިންމައި ބުނެފައިވަނީ ގޮތް ނިންމުމަށް މަޝްވަރާކުރަމުންދާކަމުގައެވެ.
އިދިކޮޅު ކޯލިޝަނުގެ ކެމްޕެއިނާއި ގުޅުމުގެ ދައުވަތު ޖުމްހޫރީ ޕާޓީ އާއި އަދާލަތު ޕާޓީ އާއި އެމްއާރުއެމްގެ އިތުރުން އެމްޑީއޭ އާއި އެ ޕާޓީތަކުގެ ލީޑަރުންނަށް ރަސްމީކޮށް ވަނީ ފޮނުވާފައެވެ. މި ކެމްޕެއިން އިފްތިތާހު ކޮށްފައިވަނީ މިދިޔަ ހުކުރު ދުވަހުގެ ރެއެވެ. އެރޭ އިދިކޮޅު ކޯލިޝަނުގެ އެކްޓިން ލީޑަރު އަބްދުއްރަހީމް އަބްދުﷲ ވިދާޅުވީ ޕީޕީއެމް/ޕީއެންސީން އިސްނެގި ނަމަވެސް މިއީ ވަކި ޕާޓީއަކުން އެކަނި ކުރިއަށް ގެންދާނެ ކެމްޕޭނެއް ނޫން ކަމަށެވެ. މިއީ ގައުމީ ކެމްޕޭނެއް ކަމަށާއި ކޮންމެ ރައްޔިތަކަށް ވެސް ބައިވެރިވެވޭނެ ކަމަށް ވިދާޅުވިއެވެ. ޖުމްހޫރީ ޕާޓީ އާއި އަދާލަތު ޕާޓީ އާއި އެމްއާރުއެމްގެ އިތުރުން އެމްޑީއޭ އާއި އެ ޕާޓީތަކުގެ ލީޑަރުންނަށް ރަސްމީކޮށް ދައުވަތު ފޮނުވީ އޯގަސްޓް 2 ވަނަ ދުވަހު އެވެ.
ޕީޕީއެމްގެ ދައުވަތު ފޮނުވި ޕާޓީތަކުގެ ތެރެއިން ތިން ޕާޓީއަކީ ސަރުކާރު ކޯލިޝަނުގައި ހިމެނޭ ޕާޓީތަކެވެ. ގާސިމް އިބްރާހިމްގެ ލީޑަރޝިޕްގެ ދަށުން ހިންގަމުންދާ ޖުމްހޫރީ ޕާޓީއާއި، ހޯމް މިނިސްޓަރ ޝެއިޚް އިމްރާން އަބްދުﷲގެ ލީޑަރޝިޕްގެ ދަށުން ހިންގާ އަދާލަތު ޕާޓީއިން ވަނީ އިދިކޮޅާއި ނުގުޅޭނެކަމަށް ބުނެފައެވެ. ގައުމު އަޅުވެތިކަމުން ސަލާމަތް ކުރުމަށޭ ކިޔާފައި މިޒާތުގެ ކެމްޕޭނެއް ފަށަންޖެހޭ ފަދަ ނުރައްކަލެއް އަދި ސަބަބެއް ނެތްކަމަށް މި ދެ ޕާޓީން ބުނެއެވެ. ކޯލިޝަނުގެ ބައިވެރިންގެ ގޮތުގައި މި ވަގުތު ސަރުކާރަށާއި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހަށް ހެޔޮ ވެރިކަމެއް ހިންގުމަށް މަގު ފަހިކޮށްދިނުމަށް އަމާޒު ހިފާފައިވާކަމަށްވެސް އެ ޕާޓީތަކުން ބުނެއެވެ.
ރާއްޖެއަށް މިއަދު ކުރިމަތިވެފައިވާ ކޮވިޑްގެ ހާލަތުގައި ސަރުކާރަށް ގޮންޖެހުންތައް ކުރިމަތިކުރުވައި ޖެއްސުންކުރުމުން ގެއްލުންވާނީ ރައްޔިތުންނަށްކަމުގައި ވާއިރު، މިފަދަ ހާލަތެއް މެދުވެރިވިޔަ ނުދިނުމަށް ކޯލިޝަނުގެ މި ދެ ބައިވެރިން ވަނީ އެދިފައެވެ. ގައުމު އަޅުވެތިކަމަކަށް ނުވަތަ ގައުމުގެ މިނިވަންކަމާއި އިސްތިގްލާލަށް ބުރުލެއް އަރާނެފަދަ އެއްވެސް ފުރުސަތެއް އެ ދެ ޕާޓީން ނުދޭނެކަމަށާއި އެކަހަލަ ހާލަތެއް އަތުވެއްޖެނަމަ ގައުމުގެ ރައްކާތެރިކަމަށްޓަކައި ދެ ޕާޓީންވެސް އިސްވެ ނިކުންނާނެކަމުގެ ޔަގީންކަން ވަނީ ދީފައެވެ.
މިކަމާއި ގުޅޭގޮތުން ކުރީގެ ރައީސް މައުމޫން އަބްދުލްގައްޔޫމްގެ ލީޑަރޝިޕްގެ ދަށުން ހިންގާ މޯލްޑިވްސް ރީފޯމް މޫވްމެންޓް، އެމްއާރްއެމުން ވަނީ އަދި މިކަމުގައި ވަކި ގޮތެއް ނުނިންމާކަމަށް ބުނެފައެވެ. އިދިކޮޅުގެ ސިޓީ އެ ޕާޓީއަށް ލިބިފައިވަނީ އޯގަސްޓް 2 ވަނަ ދުވަހުގެ ހަވީރުގެ ވަގުތެއްގައިކަމުން ޕާޓީގެ އެތެރޭގެ މަޝްވަރާތަކަށްފަހު ނޫނީ ވަކި ގޮތެއް ނުނިންމާނެކަމަށް ވަނީ ބުނެފައެވެ. އިދިކޮޅުން ދެން ސިޓީ ފޮނުވި ޕާޓީއަކީ ސަން ޓްރެވަލް ޝިޔާމްގެ ލީޑަރޝިޕްގެ ދަށުން ހިންގާ އެމްޑީއޭއެވެ. އެމްޑީއޭއަކީ 2018ގެ ރިޔާސީ އިންތިޚާބާ ހަަމައަށް ރައީސް ޔާމީނާއެކު އޮތް ޕާޓީއެކެވެ. އެ ޕާޓީގެ ލީޑަރު އަހުމަދު ސިޔާމް މުހައްމަދަކީ 2013 އިން 2018 އަށް ހިނގި ރަައީސް ޔާމީންގެ ވެރިކަމުގައި އެމަނިކުފާނާ އެންމެ އަރިސް އެކުވެރިޔާ އެވެ. އަދި އެ ކޯލިޝަނުގެ އެއް ޕާޓްނަރެވެ. ނަމަވެސް އިންތިޚާބުގެ ކެންޕެއިން ފެށުމާއެކު އެމްޑީއޭއިން ވަނީ އެއްވެސް ކެންޑިޑޭޓަކަށް ތާއީދު ނުކުރާކަން ހާމަކޮށްފައެވެ.
