ރިޔާސީ އިންތިހާބުގެ ކުރިން ޔާމިންނަށް ނޫނެކޭ ބުނެ ގެއަށް ފޮނުވާލާނަން: ޝަމާއު
އިދިކޮޅު ފަރާތްތަކުން ނިކުމެ ތިބީ އަނެއްކާވެސް ލާމަރުކަޒީ ނިޒާމެއް ޤާއިމް ކުރަން
މާފަންނު ހުޅަނގު ދާއިރާގެ މާލެ ސިޓީގެ ކައުންސިލް މެމްބަރު ޝަމާއު ޝަރީފް، ކެމްޕޭން އެއްވުމުގައި ވާހަކަދައްކަވަނީ
މެއި މަހުގެ 6 ވަނަ ދުވަހު މުޅި ރާއްޖޭގެ އެކި ކަންކޮޅުތަކުގައި ކުރިއަށްދާ ވޯޓުން ރިޔާސީ އިންތިހާބުގެ ކުރިން ރައީސް ޔާމިންއަށް ނޫނެކޭ ބުނެ ގެއަށް ފޮނުވާލާނެ ކަމަށް މާފަންނު ހުޅަނގު ދާއިރާގެ މާލެ ސިޓީގެ ކައުންސިލް މެމްބަރު ޝަމާއު ޝަރީފް ވިދާޅުވެއްޖެ އެވެ.
ކުރިއަށް އޮތް ލޯކަލް ކައުންސިލް އިންތިހާބުގައި މާފަންނު ހުޅަނގު ދާއިރާގެ ކެންޑިޑޭޓެއްގެ ގޮތުގައި ވާދަކުރާ ޝަމާއުގެ ކެމްޕެއިން ހަރަކާތުގައި ވާހަކަދައްކަވަމުން ޝަމާއު ވިދާޅުވީ ލާމަރުކަޒީއާއި ޑިމޮކްރަސީގެ ދިފާއުގައި އެންމެ ފަހު ވަގުތާއި ޖެހެންދެންވެސް އަޑު އުފުލާނެ ކަމަށާއި އެމަސައްކަތް ހުއްޓާނުލާނެ ކަމަށެވެ.
މިކެމްޕެއިން ފެށިގެން މިހާތަނަށް އައި އިރު ކުރީގައި އެންމެ ވަރުގަދަ އަށް ޕީޕީއެމްއަށް ނިސްބަތްވާ މީހުން އެމްޑީޕީއަށް ވޯޓްދޭން ތައްޔާރަށް ތިބި ކަމަށާއި މިއީ ރައީސް ޔާމިންގެ ސަރުކާރަށް ނޫނެކޭ ބުނުމުގެ ގޮތުންދޭ ވޯޓެއް ކަމަށް ޝަމާއު ވިދާޅުވި އެވެ. އަދި މި އަންނަ ހޮނިހިރު ދުވަހު މާފަންނު ހުޅަނގުން ވޯޓްދޭން ދާންވީ ކަމަށާއި މާފަންނު ހުޅަނގު ދާއިރާއިން ޕީޕީއެމްގެ މެމްބަރުންނަށް ހޯދޭނެ ވޯޓެއް ނެތް ކަމަށް އޭނާ ވިދާޅުވި އެވެ.
ލޯކަލް ގަވަރމެންޓް އޮތޯރިޓީގައި ބޯޑުގައި ލާމަރުކަޒީ ނިޒާމުގެ ދިފާއުގައި އަޑު އުފުލި ކަމަށާއި އެހެން ނަމަވެސް ރައީސް ޔާމިންއަށް އެކަން ހަޖަމްނުކުރެއްވިގެން އެލްޖީއޭވެސް އެމަނިކުފާނުގެ މުށު ތެރެއަށް ގެންގޮސް މުޅިން ހުދު މުހުތާރު ނިޒާމަކަށް ބަދަލު ކޮށްފައި ކަމަށް އޭނާ ވިދާޅުވި އެވެ. އެހެން ނަމަވެސް މިއަދު އިދިކޮޅު ފަރާތްތަކުން ނިކުމެ ތިބީ އަނެއްކާވެސް ލާމަރުކަޒީ ނިޒާމެއް ޤާއިމް ކުރަން ކަމަށް ޝަމާއު ވިދާޅުވި އެވެ.
