މިޔަންމާގެ އަސްކަރިއްޔާގެ ވެރިޔާ މިން އައުންގ ހެއިންގް އަމިއްލަފުޅަށް ގައުމުގެ ބޮޑުވަޒީރުކަމަށް ވަޑައިގެންފިއެވެ.
އައު ބޮޑުވަޒީރުކަމާއެކު އައު ސަރުކާރެއްވެސް އުފައްދާފައިވާ ކަމަށް މިޔަންމާގެ ދައުލަތުގެ މީޑިއާއިން ވަނީ ރިޕޯޓްކޮށްފައެވެ. އައު ސަރުކާރަކާއެކު އަސްކަރިއްޔާގެ އިސްވެރިޔާ ބޮޑުވަޒީރުކަމަށް އަމިއްލަފުޅަށް ވަޑައިގެންފައިވަނީ ރައްޔިތުންގެ ވެރިކަން ވައްޓާލައި ބާރުތައް ހިފެހެއްޓިތާ 6 މަސް ދުވަސް ފަހުންނެވެ.
އަމިއްލަފުޅަށް ބޮޑުވަޒީރުކަމަށް ވަޑައިގެން އާދީއްތަ ދުވަހު ދެއްވި ބަސްދީގަތުމެއްގައި މިން ވަނީ 2023 ވަނަ އަހަރުގެ ކުރިން އިންތިޚާބު ބާއްވާނެ ކަމަށް ވައުދުވެވަޑައިގެންފައިވެއެވެ. ވެރިކަމުގެ ބާރުތައް އަތުލައި އަސްކަރިއްޔާއިން މިޔަންމާގެ ކަންކަން ބަލަހައްޓަން ފެށިތާ ސީދާ 6 މަސް ފަހުން ފުރަތަމަ ފަހަރަށް އަސްކަރިއްޔާގެ ވެރިޔާ މިކަމާއި ބެހޭ ގޮތުން ވާހަކަ ދައްކަވާފައި ވަނީ ރައްޔިތުން އިންތިޚާބު ކުރި އަންސަން ޔޫކީގެ ވެރިކަން ސިފައިން ވައްޓާލި ވައްޓާލުން އެތެރެޔާއި ބޭރުން ކުށްވެރިކުރަމުން ދަނިކޮށެވެ.
އަންސަން ސޫކީގެ ވެރިކަން ވައްޓާލައި އުފެއްދި ސްޓޭޓް އެޑްމިނިސްޓްރޭޝަން ކައުންސިލްގެ ރައީސްކަން ވެސް ކުރެއްވީ މިންއެވެ. އަދި ގައުމު ހިންގުމުގެ ހުރިހާކަމެއް ކުރަމުން އައީ މި ކައުންސިލުންނެވެ.
ދައުލަތުގެ މީޑިއާއިން ބުނެފައިވަނީ ގައުމުގެ ކަންކަން ހަމައަކަށް އަޅުވާއި ފަސޭހަކަމާއިއެކު ކަންކަން ކުރިއަށް ގެންދިއުމަށް ސްޓޭޓް އެޑްމިނިސްޓްރޭޝަން ކައުންސިލުން ސަރުކާރު ހިންގާ ގޮތަށް ބަދަލުކޮށްފައިވާ ކަމަށެވެ. މިން ވަނީ ފުރަތަމަ ފަހަރަށް އާންމުކޮށް ދެއްވި ބަސްދީގަތުގައި ޑިމޮކްރަސީ ގެންނާނެ ކަމަށާއި، މިހާރު އިއުލާންކޮށްފައިވާ ކުއްލި ނުރައްކަލުގެ ހާލަތު އޮގަސްޓް 2023 އާ ހަމައަށް ނިމުމަކަށް ގެންނާނެ ކަމަށް ވިދާޅުވެފައެވެ.
