ގޯލްޑް ކަޕުގެ ޗެމްޕިއަންކަން އެމެރިކާއަށް

އުތުރާއި ދެކުނު އެމެރިކާ އަދި ކެރީބިއަން ސަރަހައްދު (ކޮންކާކަފް) ގައުމުތަކުގެ މެދުގައި ބޭއްވޭ އެންމެ ޝަރަފުވެރި ފުޓްބޯޅަ މުބާރާތް ކަމަށްވާ ގޯލްޑް ކަޕުގެ ޗެމްޕިއަންކަން އެމެރިކާއިން ހޯދައިފިއެވެ.

ހޯމަ ދުވަހު ހެނދުނު ކުޅުނު ފައިނަލް މެޗުން އެމެރިކާ މޮޅުވީ މެކްސިކޯ އަތުން 1-0 ގެ ނަތީޖާއަކުންނެވެ.

ނަވާޑާގެ އަލީޖަންޓް ސްޓޭޑިއަމުގައި ކުޅުނު ފޯރިގަދަ މި މެޗުގައި ދެ ގައުމުންވެސް ގިނަ ހަމަލާތަކެއް އުފެއްދި ނަމަވެސް، މެޗުގެ ފުރިހަމަ ވަގުތު ހަމަވިއިރު ދެ ޓީމުން ކުރެ ޓީމަކަށް ލަނޑެއް ކާމިޔާބުކުރެވިފައެއް ނުވެއެވެ. އެހެންކަމުން ނަތީޖާ ނެރުމަށް އިތުރު ވަގުތުގެ ދެ ހާފު ކުޅުނުއިރު، އަދި މެޗުގައި ފެނިގެންދިޔަ ހަމައެކަނި ލަނޑު އެމެރިކާއިން ކާމިޔާބުކޮށްފައިވަނީ ދެވަނަ ހާފު ނިމެން ގާތްވެފައި ވަނިކޮށެވެ. މި ހާފު ނިމެން ތިން މިނެޓަށް ވެފައި ވަނިކޮށް ހިލޭ ޖެހުމަކުން ކެލީން އަކޮސްޓާ ހުރަސްކޮށްދިން ބޯޅައިން މި ލަނޑު އެމެރިކާއަށް ކާމިޔާބުކޮށްދިނީ މައިލްސް ރޮބިންސަންއެވެ.

މަޝްހޫރު ގިނަ ކުޅުންތެރިން ނުލައި މި ފަހަރުގެ މުބާރާތާ އެމެރިކާ ކުރިމަތިލިއިރު، އެ ގައުމުން މި ފަހަރުގެ ގޯލްޑް ކަޕް ކާމިޔާބުކުރީ ކުޅުނު ހުރިހާ މެޗަކުންވެސް މޮޅުވެގެންނެވެ.

މިއީ އެމެރިކާއިން ގޯލްޑް ކަޕް ކާމިޔާބުކުރި ހަތްވަނަ ފަހަރެވެ. މި އަހަރުގެ ކުރިން އެ ގައުމުން އެންމެ ފަހުން ގޯލްޑް ކަޕް ކާމިޔާބުކުރީ 2017 ވަނަ އަހަރު، ފައިނަލުގައި ޖެމެއިކާ ބަލިކުރުމަށްފަހުއެވެ. އަދި އެންމެ ފަހުން މެކްސިކޯއިން މި މުބާރާތް ކާމިޔާބުކޮށްފައިވަނީ 2019 ވަނަ އަހަރު އެމެރިކާ ބަލިކުރުމަށްފަހުއެވެ.