ޓޯކިއޯ އޮލިމްޕިކްސް 2020 ގެ ޓެނިސް އިވެންޓުގެ ލޯ މެޑަލް މެޗުން ދުނިޔޭގެ އެއްވަނަ ޓެނިސް ކުޅުންތެރިޔާ ސާބިއާގެ ނޮވަކް ޖޮކޮވިޗް ބަލިވެއްޖެއެވެ.

މި އަހަރުގެ އޮލިމްޕިކްސްއާ އުމުރުން 34 އަހަރުގެ ޖޮކޮވޮޗް ކުރިމަތިލީ އޮލިމްޕިކްސްގެ އިތުރުން މި އަހަރުގެ އިތުރު ގްރޭންޑް ސްލޭމް މުބާރާތެއް ކާމިޔާބުކޮށް، ރިކޯޑު ހެދުމުގެ އަމާޒުގައެވެ. މި ފަހަރުގެ ޓެނިސް ސީޒަނުގައި މިހާތަނަށް ބޭއްވި ތިން ގްރޭންޑް ސްލޭމް މުބާރާތްވެސް ޖޮކޮވިޗް ވަނީ ކާމިޔާބުކޮށްފައެވެ. އަހަރެއްގެ ތެރޭގައި ހަތަރު ގްރޭންޑް ސްލޭމް މުބާރާތާއި އޮލިމްޕިކްސް އެންމެ ފަހުން ކާމިޔާބުކުރީ 1988 ވަނަ އަހަރު ޖަރުމަނުގެ ސްޓެފީ ގްރާފެވެ. ޖޮކޮވިޗަށް އެ ފުރުސަތު އޮތް ނަމަވެސް، އޮލިމްޕިކްސްގެ ސެމީ ފައިނަލުން ކެޓުމާ ގުޅިގެން އޭނާގެ ރަން ކާމިޔާބީގެ ހުވަފެން ވަނީ ނިމުމަކަށް އައިސްފައެވެ.

ސެމީން ބަލިވުމާއެކު ހޮނިހިރު ދުވަހު ކުޅުނު ލޯ މެޑަލް މެޗުގައި ޖޮކޮވިޗް ވާދަކުރިއިރު، އެ މެޗުން އޭނާ ބަލިވީ ރޭންކިންގެ 77 ވަނައިގައި އޮތް ސްޕެއިނުގެ ޕަބްލޯ ކާރޭނިއޯ އަތުން 2-1 ސެޓުންނެވެ. މި މެޗުގެ ސެޓުތައް ދިޔައީ 6-4، 6-7 (6-8) އަދި 6-3 އިންނެވެ. ކާރޭނިއޯ އަތުން ޖޮކޮވިޗް ބަލިވިއިރު، މި މެޗުގެ ތެރެއިން ޖޮކޮވިޗް ވަނީ ހިތްހަމަނުޖެހިގެން ދެ ފަހަރެއްގެ މަތިން އޭނާގެ ރެކެޓް އެއްލާލާފައެެވެ. އަދި ދެވަނަ ފަހަރު ރެކެޓް އެއްލާލުމުން، ރެކެޓް ހަލާކުވެސްވިއެވެ.

ފިރިހެން ސިންގަލްސްގެ ލޯ މެޑަލް މެޗުން ޖޮކޮވިޗް ބަލިވިއިރު، އޭނާ ވަނީ ހޮނިހިރު ދުވަހު ކުޅެން އޮތް މިކްސް ޑަބަލްސްގެ ލޯ މެޑަލް މެޗުން ވަކިވެފައެވެ. އެ މެޗުން ވަކިވާން ޖޮކޮވިޗް ނިންމީ ވާތު ކޮނޑަށް ލިބުނު އަނިޔާއެއްގެ ސަބަބުންނެވެ.

އޮލިމްޕިކްސްއިން ޖޮކޮވިޗަށް މިހާތަނަށް ރަން މެޑެއްޔެއް ހޯދިފައިނުވާއިރު، އޮލިމްޕިކްސްގެ ތާރީޚުގައި ޖޮކޮވިޗްގެ ހަމައެކަނި ކާމިޔާބީއަކީ 2008 ވަނަ އަހަރު ޗައިނާގައި ބޭއްވި ބެއިޖިން އޮލިމްޕިކްސްގެ ފިރިހެން ސިންގަލްސްއިން ލިބުނު ލޯ މެޑެއްޔެވެ.

އޮލިމްޕިކްސްއިން ޖޮކޮވިޗަށް ކާމިޔާބީއެއް ނުލިބުނު ނަމަވެސް، އޭނާ ވަނީ މި އަހަރުގެ ވިމްބަލްޑަން ޓެނިސް މުބާރާތާއި، އޮސްޓްރޭލިއަން އޯޕަން އަދި ފްރެންޗް އޯޕަން ކާމިޔާބުކޮށްފައެވެ. އެއާއެކު ޖޮކޮވިޗް ވެފައިވަނީ ޓެނިހުގެ އޯޕަން އެރާގައި އެއް އަހަރު ތެރޭ ތިން ގްރޭންޑް ސްލޭމް މުބާރާތް ކާމިޔާބުކުރި ތިންވަނަ ކުޅުންތެރިޔާއަށެވެ.