ރާއްޖޭގެ ފުޓްސަލް ޓީމު ކުޅުނު ތިންވަނަ މެޗުންވެސް ބަލިވެއްޖެ

ފަސްވަނަ އޭޝިއަން އިންޑޯ އެންޑް މާޝަލް އާޓްސް ގޭމްސްގައި ރާއްޖޭގެ ފުޓްސަލް ޓީމު ކުޅުނު ތިންވަން މެޗުން ވެސް ބަލިވެއްޖެއެވެ.

ތުރެކެމިނިސްތާނުގައި ކުރިޔަށްދާ މި މުބާރާތުގައި ރާއްޖޭގެ ފުޓްސަލް ޓީމު ތިންވަނަ މެޗުގައި ނުކުމެފައި ވަނީ އުޒްބެކިސްތާނާ ދެކޮޅަށެވެ. މި މެޗުން ރާއްޖޭގެ ޓީމު ބަލިވެފައި ވަނީ 9-1ގެ ތަފާތު ބޮޑު ނަތީޖާއަކުންނެވެ. މެޗުގެ ފުރަތަމަ ހާފުގައި އުޒްބެކިސްތާނުން ވަނީ ރާއްޖޭގެ ކޮޅަށް ހަތަރު ލަނޑުޖަހާފައެވެ. މި ހާފުގައި ރާއްޖޭގެ ޓީމުގެ ހަމައެކަނި ލަނޑު ޖަހައިދިނީ ރާއްޖޭގެ ޖާޒީ ނަމްބަރު 7، އަހުމަދު ނަސީމް މުހައްމަދު ނާޝިދްއެވެ.

ދެވަނަ ހާފުގައި އުޒްބެކިސްތާނުން ވަނީ ރާއްޖެ ކޮޅަށް އިތުރު ފަސް ލަނޑު ޖަހާފައެވެ. މި މެޗުގައި އެ ޓީމުން ރާއްޖޭގެ ގޯލާ އަމާޒުކޮށް 63 ހަމަލާ ފޮނުވާލާފައިވާއިރު ރާއްޖެއަށް ފޮނުވާލެވުނީ އެންމެ 11 ހަމަލާއެވެ.

މެޗަށް ފަހު ވާހަކަ ދައްކަމުން އުޒްބެކިސްތާނުގެ ކޯޗު ވަނީ ރާއްޖޭގެ ޓީމުގެ ފަރާތުން ފެނުނު ކުޅުމަށް ތައުރީފުކޮށްފައެވެ. އެގޮތުން އެ ޓީމުގެ ކޯޗު އަހްމެދޯވް ބުނެފައިވަނީ ރާއްޖޭގެ ޓީމަކީ ފުޓްސަލްއަށް ވަރަށް އާ ޓީމެއް ކަމަށާއި އެހެނަސް އޭނާގެ ޓީމާ ދެކޮޅަށް ރާއްޖެއިން ރަނގަޅު ކުޅުމެއް ދައްކާފައިވާ ކަމަށެވެ.

މި މުބާރާތުގައި ރާއްޖެ ކުޅުނު ފުރަތަމަ މެޗާއި ދެވަނަ މެޗުން ވެސް ވަނީ ބަލިވެފައެވެ. އެގޮތުން ދެވަނަ މެޗުގައި އަފްޢާނިސްތާނާއި ވާދަކޮށް ރާއްޖެ ބަލިވެފައިވަނީ 6-1 ގެ ނަތިޖާއަކުންނެވެ. މި މެޗުގައި ރާއްޖެއިން ޖެހި ހަމައެކަނި ލަނޑު ރާއްޖެއަށް ކާމިޔާބުކޮށްދިނީ އަހުމަދު އަލީ ރިޝްވާންއެވެ. ފުރަތަމަ މެޗުގައި ޔޫއޭއީއާ ވާދަކޮށް ރާއްޖެ ބަލިވެފައިވަނީ 3-1 ގެ ނަތީޖާއަކުންނެވެ. މި މެޗުގައި ރާއްޖޭގެ ހަމައެކަނި ލަނޑު ޖަހައި ދިނީ މުހައްމަދު އިމްރާންއެވެ.

މި މުބާރާތުގައި ރާއްޖެ ކުޅޭ ފަހު މެޗުގައި ވާދަކުރާނީ ޗައިނާއާ ދެކޮޅަށެވެ.