ތޮއްޑޫ އާއި ރަސްދޫ މޮނިޓަރިންއިން ނަގައިފި
ތޮއްޑޫ މޮނިޓަރިންއިން ނަގާފައިވަނީ 2 މަހަށްވުރެ ގިނަ ދުވަސް ފަހުން
ރާއްޖޭގެ ރަށެއްގެ މަގުމަތި
އއ. ތޮއްޑޫ އާއި ރަސްދޫ މޮނިޓަރިންގެ ހާލަތުން ނަގައި، އެ ދެ ރަށް ހުޅުވާލައިފިއެވެ.
ތޮއްޑޫ މޮނިޓަރިންއަށް ލާފައިވަނީ މިދިޔަ މެއި މަހުގެ 24 ވަނަ ދުވަހުއެވެ. އެރަށް މޮނިޓަރިންއިން ނަގާފައިވަނީ ދެ މަހަށްވުރެ ގިނަ ދުވަސް ފަހުންނެވެ. މިިދިޔަ މެއި މަހު 4 މީހަކު ޕޮޒިޓިވްވެގެން އެރަށް މޮނިޓަރިންނަށް ލާފައިވެއެވެ. ޖެނުއަރީ މަހުގެ ތެރޭގައި ވެސް ތޮއްޑޫ މޮނިޓަރިންނަށް ލާފައިވެއެވެ.
މީގެ އިތުރުން ރަސްދޫ މޮނިޓަރިންއިން ނަގާފައިވަނީ 12 ދުވަހު މޮނިޓަރިންގެ ހާލަތުގައި އޮތުމަށްފަހުއެވެ. އެރަށް އެންމެ ފަހުން މޮނިޓަރިންއަށް ލާފައިވަނީ މިމަހުގެ 17 ވަނަ ދުވަހުއެވެ. މިދިޔަ އޭޕްރިލް މަހުގެ ތެރޭގައި ވެސް ރަސްދޫގެ ހާލަތު ގޯސްވެގެން މޮނިޓަރިންއަށް ލާފައިވެއެވެ. އެފަހަރު އެރަށުން 5 މީހަކު ކޮވިޑަށް ޕޮޒިޓިވްވެފައިވެއެވެ.
ތޮއްޑޫ އާއި ރަސްދޫ މޮނިޓަރިންގެ ހާލަތުން ނެގުމުން މިވަގުތު މޮނިޓަރިންގައި އޮތީ 11 ރަށެެކެވެ. އެއީ ފުވައްމުލައް ސިޓީ, ށ. ފީވައް، ރ. ދުވާފަރު، ގއ. ކޫއްޑޫ، ށ. ފޯކައިދޫ، ގދ. ނަޑެއްލާ، ކ. ކާށިދޫ، ހއ. ތަކަންދޫ، ހދ. ކުޅުދުއްފުށި، ހއ. ދިއްދޫ، މ. ކޮޅުފުށްޓެވެ.
މި ރަށްރަށުގެ ތެރެއިން މޮނިޓަރިންގައި އޮންނަތާ އެންމެ ގިނަ ދުވަސްވެފައިވަނީ ފުވައްމުލަކެވެ. މިދިޔަ މެއި މަހުގެ 6 ވަނަ ދުވަހުން ފެށިގެން ފުވައްމުލައް އޮތީ މޮނިޓަރިންގެ ހާލަތުގައެވެ.
