ކަކުލަށް ލިބުނު އަނިޔާތަކުން ރަނގަޅުވެ ލިވަޕޫލަށް ކުޅެމުން އަންނަ ނެދަލެންޑްސްގެ އިތުބާރު ޑިފެންޑަރު ވާޖިލް ވެން ޑައިކާއި އިންގްލެންޑުގެ ޑިފެންޑަރު ޖޯ ގޯމޭޒް ޕްރީ-ސީޒަން މެޗެއްގައި ކުޅެފިއެވެ.
ވެން ޑައިކުގެ ކަކުލަށް އަނިޔާވީ މިދިޔަ އަހަރުގެ އޮކްޓޯބަރު މަހު އެވަޓަނާ 2-2 ގެ ނަތީޖާއަކުން ލިވަޕޫލް އެއްވަރުވި މެޗުގެ ތެރެއިންނެވެ. މި އަނިޔާއާ ގުޅިގެން ވެން ޑައިކުގެ ކަކުލަށް ބޮޑު ގެއްލުމެއްވިއިރު، އަނިޔާއިން ރަނގަޅުވުމަށް އޭނާ ވަނީ ކަކުލުގެ އޮޕަރޭޝަނެއް ކޮށްފައެވެ.
ވެން ޑައިކާއެކު ލިވަޕޫލުގެ ފަހަތުގައި މުހިންމު ދައުރެއް އަދާކުރަމުން އަންނަ ގޯމޭޒްގެ ކަކުލަށް އަނިޔާވީ ނޮވެމްބަރު މަހު އިންގްލެންޑުގެ ފަރިތަކުރުންތަކުގެ ތެރެއިން އެކަނި ބޯޅަ ހިފައިގެން ކުޅުމުގެ ތެރޭގައެވެ. އެއާއެކު އޭނާވެސް ވަނީ ކަކުލުގެ އޮޕަރޭޝަނެއް ކޮށްފައެވެ. މި އަނިޔާތަކާ ގުޅިގެން މިދިޔަ ސީޒަނުގެ ބޮޑުބައި މި ދެ ކުޅުންތެރިންނަށް ގެއްލުނުއިރު، މި އަހަރުގެ ހޫނު މޫސުމުގައި ބޭއްވި ޔޫރޯ ފުޓްބޯޅަ މުބާރާތުގައިވެސް މި ދެ ކުޅުންތެރިން ކުޅެފައެއް ނުވެއެވެ.
އަންނަ ސީޒަނަށް ތައްޔާރުވުމަށް ލިވަޕޫލުން ކުރިއަށްގެންދާ ފަރިތަކުރުންތަކުގެ ތެރެއިން ބުރާސްފަތި ދުވަހު ހާތާ ބާލިންއާ ދެކޮޅަށް ކުޅުނު މެޗުގައި ވެން ޑައިކާއި ގޯމޭޒް ވަނީ ކުޅެފައެވެ. އެ މެޗުގައި އެ ދެ ކުޅުންތެރިންވެސް ކުޅެން އަރާފައިވަނީ ބަދަލު ކުޅުންތެރިންގެ ގޮތުގައެވެ. އެ މެޗުން ލިވަޕޫލް ވަނީ 4-3 ގެ ނަތީޖާއަކުން ބަލިވެފައެވެ.
މީގެ ކުރިން ލިވަޕޫލުގެ ކާމިޔާބީގެ މުހިންމު ހިއްސާއެއް އޮތް ވެން ޑައިކާއި ގޯމޭޒް ނެތި މިދިޔަ ސީޒަނުގައި ލިވަޕޫލަށް ގިނަ މެޗުތަކެއް ކުޅެން ޖެހުނުއިރު، މިދިޔަ ސީޒަނުގައި ލިވަޕޫލުގެ ނަތީޖާތައް ވަރަށް ބޮޑަށް ދަށްވިއެވެ. އެހެންކަމުން ކުރިއަށް އޮތް ސީޒަނަށް އެ ދެ ކުޅުންތެރިން ފިޓްވުމަކީ ލިވަޕޫލަށް އޮތް ބޮޑު ހިތްހަމަޖެހުމެކެވެ.
މިދިޔަ ސީޒަނުގައި ލިވަޕޫލުގެ ޑިފެންޑަރުންނަށް އަނިޔާގެ ގިނަ މައްސަލަތަކެއް ކުރިމަތިވުމާއެކު، އެ ޓީމުން ވަނީ މި ފަހަރުގެ ޓްރާންސްފާ ބާޒާރުގައި އާރްބީ ލައިޕްޒީގަށް ކުޅެމުން އައި ފްރާންސްގެ ޒުވާން ޑިފެންޑަރު އިބްރާހިމާ ކޮނާޓޭގެ ސޮއި ހޯދާފައެވެ.
