ޖުލައި މަހު ކޮވިޑަށް ޕޮޒިޓިވްވީ 0.13 އިންސައްތަ ފަތުރުވެރިން
ޖުލައި މަހު ކޮވިޑަށް ޕޮޒިޓިވްވެފައި މިވަނީ 117 ފަތުރުވެރިން
ކޮވިޑްގެ ސަބަބުން ރާއްޖޭގެ ބޯޑަރު ބަންދުކޮށްފައި އޮތުމަށް ފަހު އަލުން ހުޅުވާލުމާއެކު މާފުއްޓަށް ޒިޔާރަތްކުރި ފުރަތަމަ ފަތުރުވެރިޔާއަށް މަރުހަބާކިޔުން
މި ޖުލައި މަހު ރާއްޖެ އައި ފަތުރުވެރިންގެ ތެރެއިން ކޮވިޑް-19ށް ޕޮޒިޓިވްވެފައި ވަނީ އެންމެ 0.13 އިންސައްތަ ފަތުރުވެރިން ކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޖުލައި މަހުގެ 1ން 28ށް 89,703 ފަތުރުވެރިން ރާއްޖެ އައިސްފައިވާއިރު، ކޮވިޑަށް ޕޮޒިޓިވްވެފައި މިވަނީ 117 ފަތުރުވެރިންނެވެ.
މިނިސްޓްރީގެ މައުލޫމާތުތައް ދައްކާގޮތުން މިދިޔަ އަހަރުގެ ޖުލައި 15ން ޑިސެމްބަރު 31ށް 0.19 އިންސައްތަ ފަތުރުވެރިން ކޮވިޑަށް ޕޮޒިޓިވްވެފައިވާއިރު، މި އަހަރުގެ ޖެނުއަރީ 1ން ޖުލައި 28ށް ކޮވިޑަށް ޕޮޒިޓިވްވެފައި ވަނީ 0.25 އިންސައްތަ ފަތުރުވެރިންނެވެ.
ރާއްޖެ އަންނަ ފަތުރުވެރިންގެ އަދަދު އެއް ދުވަހުން އަނެއް ދުވަހަށް އިތުރުވަމުންދާއިރު، ފަތުރުވެރިންގެ ނަޒަރުގައި ރާއްޖެ އަކީ މިހާރު ދުނިޔޭގެ އެންމެ ރައްކާތެރި އެއް މަންޒިލެވެ. އަދި ރާއްޖޭގެ އާބާދީގެ ވެކްސިން ޖެހޭ އުމުރުގެ ހުރިހާ މީހުންނަށް ވެކްސިން ޖެހުމުން ރާއްޖެ އަންނަ ފަތުރުވެރިންނަށް އަމާޒުކޮށް ވެކްސިނޭޝަންގެ ކަންތައްތައް ކުރިއަށް ގެންދަން ޓޫރިޒަމް މިނިސްޓްރީން ވަނީ ނިންމާފައެވެ.
އެގޮތުން ރާއްޖޭގެ "3ވީ ޕްރޮގްރާމް" (ވިޒިޓް، ވެކްސިނޭޓް، ވެކޭޝަން ޕްރޮގްރާމް) ތާވަލުކުރެވިފައިވާ ގޮތަށް ތިން ވަނަ ކުއާޓާގެ ފަހުކޮޅު ނުވަތަ ހަތަރު ވަނަ ކުއާޓާގެ ކުރީ ކޮޅު ފެށިގެންދާނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވަނީ ވިދާޅުވެފައެވެ. މިހާރު ވެކްސިނޭޝަން ޕްރޮގްރާމް މިދާ ރޭޓުން ބަލާނަމަ ތާވަލުކުރެވިފައިވާ ގޮތަށް ރާއްޖޭގެ ހުރިހާ ރައްޔިތުންނަށް ވެކްސިން ޖަހައި ނިމި، ރާއްޖެ އަންނަ ފަތުރުވެރިންނަށް ވެކްސިން ޖެހުމުގެ ޕްރޮގްރާމް ފެށިގެންދާނެ ކަމަށް ޓޫރިޒަމް މިނިސްޓަރު ވިދާޅުވެފައިވާއިރު، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވަނީ އަމާޒަކީ އޮގަސްޓް މަހުގެ ނިޔަލަށް ރާއްޖޭގެ ވެކްސިންޖެހޭ އާބާދީގެ 90 އިންސައްތަ މީހުންނަށް ވެކްސިންގެ ޑޯޒްތައް ފުރިހަމައަށް ދިނުން ކަމަށް ވިދާޅުވެފައެވެ.
ރާއްޖޭގެ ވެކްސިނޭޝަން ޕްރޮގްރާމްގެ އެންމެ ބޮޑު އަދި ފަހު ކެމްޕެއިން އަތޮޅުތެރޭގައި މިހާރު ފަށާފައިވާއިރު، ޖުލައި 31 ވަނަ ދުވަހު މާލެ ސަރަހައްދުގައި މިކެމްޕެއިން ފެށިގެންދާނެ އެވެ.
ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް ހާއްސަ އިސްކަމެއް ދީގެން ވެކްސިން ޖެހުމުގެ ކަންތައްތައް ކުރިއަށް ގެންދާއިރު، މިހާތަނަށް ސިނާއަތުގައި މަސައްކަތްކުރަ ފާރާތްތަކުގެ ތެރެއިން 97 އިންސައްތަ މުވައްޒަފުން ވަނީ ވެކްސިންގެ ފުރަތަމަ ޑޯޒް ޖަހާފައެވެ. އަދި 80 އިންސައްތަ މުވައްޒަފުން ވަނީ ދެ ވަނަ ޑޯޒް ޖަހާ ވެކްސިންގެ ޑޯޒްތައް ފުރިހަމަކޮށްފައެވެ.
