ބޫޓާންގެ ކޮވިޑް-19 ވެކްސިން ޖެހޭ އާބާދީގެ 90 އިންސައްތަ މީހުން ވެކްސިންގެ ދެ ޑޯޒް ޖަހައި ނިންމާލައިފިއެވެ.

ބޫޓާންގެ ހެލްތު މިނިސްޓްރީން މައުލޫމާތުދޭ ގޮތުގައި އެގައުމުގެ ވެކްސިން ޖެހޭ އާބާދީގެ 90 އިންސައްތަ މީހުން ވެކްސިންގެ ދެ ވަނަ ޑޯޒް ފުރިހަމަކޮށް ނިންމާފައި ވަނީ ހަތް ދުވަހުގެ ތެރޭގައެވެ. އެގޮތުން ޔުނިސެފްގެ އެހީ އާއެކު ބޫޓާންގައި ކޮވިޑް-19 ވެކްސިނޭޝަން ކެމްޕެއިން ފެށީ ޖުލައި 20 ވަނަ ދުވަހުއެވެ. މިއީ ބަލިމަޑުކަމެއްގެ ތެރޭގައި ކުރިއަށް ގެންދިޔަ އެންމެ އަވަސް ވެކްސިނޭޝަން ޕްރޮގްރާމްކަމަށް ރިޕޯޓްތައް ބުނެއެވެ.

ބޫޓާން އިން ކޮވިޑް-19 ވެކްސިނޭޝަންގެ މަސައްކަތް އެންމެ ފުރަތަމަ ފެށީ މި އަހަރުގެ މާޗު މަހުއެވެ. އެއީ އިންޑިއާ އިން އެ ގައުމަށް ފޯރުކޮށްދިން 550,000 ކޮވިޝީލްޑް ވެކްސިން ޑޯޒާ އެކުއެވެ. މާޗު މަސް ނިމި އޭޕްރިލް މަސް ފެށުނު އިރު، އެ ގައުމުގައި ވެކްސިންގެ ފުރަތަމަ ޑޯޒް ޖަހައި ނިމި، ވެކްސިންގެ ޑޯޒްތައް ހުސްވިއެވެ. ނަމަވެސް އިންޑިއާގެ ކޮވިޑް-19ގެ ހާލަތު ގޯސްވުމާއެކު އިންޑިއާއިން ވެކްސިން ސަޕްލައިކުރުން މެދުކަނޑާލުމުގެ ސަބަބުން ބޫޓާނަށް ބޭނުންވާ ވެކްސިންގެ ޑޯޒްތައް ނުލިބި، އެހެން ގައުމުތަކާއި ބައިނަލްއަގުވާމީ ޖަމުޢިއްޔާތަކުގެ އެހީއަށް އެ ގައުމުން އެދުނެވެ.

ބޫޓާން އެހެން ގައުމުތަކުގެ އެހީއަށް އެދުނީ އެ ގައުމުގައި ވެކްސިންގެ ފުރަތަމަ ޑޯޒް ޖެހި މީހުންގެ ތެރެއިން ގިނަ އަދަދެއްގެ ބަޔަކު ދެ ވަނަ ޑޯޒް ޖަހަންޖެހޭ މުއްދަތު ކައިރިވަމުން ދިއުމުންނެވެ. ކޮވެކްސް ފެސިލިޓީގެ ދަށުން އެމެރިކާއިން އެ ގައުމަށް މޮޑާނާގެ ކޮވިޑް ވެކްސިންގެ ބައި މިލިއަން ޑޯޒް ފޯރުކޮށްދިނެވެ. އަދި ޖުލައި މަހުގެ މެދުތެރޭގައި ޑެންމާކުން ވަނީ އެސްޓްރަޒެނެކާ ވެކްސިންގެ 250,000 ޑޯޒް ބޫޓާނަށް ފޯރުކޮށްދީފައެވެ. އަދި ކުރިއަށްއޮތް ތަނުގައި ކްރޮއޭޝިއާ، ބަލްގޭރިއާ އަދި ޗައިނާއިން 150,000 ޑޯޒް ވެކްސިން އެގައުމަށް ލިބޭނެއެވެ. އޭގެ ތެރޭގައި އެސްޓްރަޒެނެކާ، ފައިޒާ އަދި ސިނޮފަރމްގެ ކޮވިޑް ވެކްސިން ހިމެނެއެވެ.

އޭގެ އިތުރުން ބޫޓާންގެ ސަރުކާރުން ވަނީ ފައިޒަރ ވެކްސިންގެ 200,000 ޑޯޒަށް އޯޑަރު ވެސް ކޮށްފައެވެ. މި ވެކްސިން ޑޯޒްތައް މި އަހަރު ނިންމެންވާއިރަށް އެ ގައުމަށް ލިބޭނެ ކަމަށް ރިޕޯޓްތައް ބުނެއެވެ.