ރިޔާސީ އިންތިޚާބަށް، އެމްއެންޕީގެ މެމްބަރުން އިތުރުކުރުމުގެ މަސައްކަތް ފަށައިފި
އެމްއެންޕީގެ މެމްބަރަކު ރިޔާސީ އިންތިޚާބުގައި ވާދަކުރާނެ
މޯލްޑިވްސް ނޭޝަނަލް ޕާޓީ
މޯލްޑިވްސް ނޭޝަނަލް ޕާޓީ (އެމްއެންޕީ)އަށް މެމްބަރުން އިތުރުކުރުމުގެ މަސައްކަތް ކުރަމުންދާކަމަށް ކުރީގެ ޑިފެންސް މިނިސްޓަރ އަދި ދަނގެތީ ދާއިރާގެ މެމްބަރު މުޙައްމަދު ނާޒިމް ވިދާޅުވެއްޖެއެވެ.
ނާޒިމް މިފަދައިން ވިދާޅުވީ އެމްއެންޕީން ބޭއްވި އެންމެ ފުރަތަމަ ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. ނާޒިމް ވިދާޅުވީ އެމްއެންޕީގެ އަމާޒަކީ 2023ވަނަ އަހަރު އޮންނަ ރިޔާސީ އިންތިޚާބު ކާމިޔާބުކުރުން ކަމަށެވެ. މި އިންތިޚާބުގައި އެ ޕާޓީގެ ކެންޑިޑޭޓަކު ވާދަކުރާނެ ކަމަށާއި، އަދި މި އިންތިޚާބު ކާމިޔާބުކުރެވޭނެކަމުގެ ޔަގީންކަން އެބައޮތް ކަމަށެވެ.
ނާޒިމް ވިދާޅުވީ ޕާޓީއަށް މެމްބަރުން އިތުރުކުރުމުގެ މަސައްކަތް މިހާރު ފަށާފައިވާކަމަށާއި، އެ ޕާޓީއަށް ގިނަ މެމްބަރުންތަކެއް ވަންނާނެކަމަށް ގަބޫލުކުރައްވާކަމަށެވެ. އެގޮތުން ރާއްޖޭގެ 50 އިންސައްތަ މީހުންނަކީ ޕާޓީއަކާ ގުޅިފައިނުވާ މީހުން ކަމަށާއި، ޕާޓީތަކާ ގުޅިގެން ތިބި މީހުން ތިބީ ދެފަރާތަށް ގޮސް ހުސްވެފައިކަމަށެވެ. އަދި މެދުތެރޭގައި ވަރަށް ބޮޑު ބައެއް އެބަ އުޅޭކަމަށާއި، މެދުތެރޭގައި އޮތް ފިކުރަކީ އެމްއެންޕީގެ ފިކުރު ކަމަށް ގަބޫލުކުރައްވާކަމަށެވެ. މި ފިކުރާއެކު ޕާޓީއަށް މެމްބަރުން އިތުރުކުރެވޭނެ ކަމަށާއި، ޕާޓީން އަބަދުވެސް މެމްބަރުންނަށް މަރުހަބާ ކިޔާނެ ކަމަށެވެ.
އެ ޕާޓީއަކީ މެމްބަރުން ގިނަ ބޮޑު ޕާޓީއަކަށް ހެދުމަށް ކެނޑިނޭޅި މަސައްކަތްކުރައްވާނެ ކަމަށާއި، ޕާޓީގެ ރެޖިސްޓްރޭޝަން ޕްރޮސެސް ވެސް ފަށާފައިވާ ކަމަށް އޭނާ ވިދާޅުވިއެވެ. ކުރިއަށް އޮތް ދެދުވަހެއްގެ ތެރޭގައި ރެޖިސްޓްރޭޝަން އޮފީހެއް ވެސް މާލޭގައި ހުޅުވާނެ ކަމަށާއި، ރާއްޖޭގެ ރަށްރަށުގައި އެ ޕާޓީގެ ގޮފިތައް ޤާއިމުކުރާނެ ކަމަށްވެސް ނާޒިމް ވިދާޅުވިއެވެ.
ދިވެހިން އެދޭ ކަންކަން ފުރިހަމައަށް ހާސިލުކޮށްދިނުމަށްޓަކައި ގާނޫނީ ގޮތުން ލިބިދޭ އެންމެހާ ބާރާއި އިޚްތިޔާރާ ހައްގުތައް މޯލްޑިވްސް ނޭޝަނަލް ޕާޓީން ކަށަވަރުކުރާނެކަމަށް ނާޒިމް ވިދާޅުވިއެވެ.
ޕާޓީގެ މަގުސަދުތަކުގެ ތެރޭގައި، ސައްތައިން ސައްތަ މުސްލިމު ގައުމެއްގެ ގޮތުގައި ރާއްޖެ ދެމެހެއްޓުމާއި، އެންމެ ފުރަތަމަ ގައުމީ މަސްލަހަތު އިސްކޮށް، މިނިވަން އަމިއްލަވަންތަ ދައުލަތެއް ބިނާކުރުމާއި، ކޮރަޕްޝަނުން އެއްކިބާވެފައިވާ ދައުލަތަކަށް ދިވެހި ދައުލަތް ހެދުމާއި، ސިޔާސީ ނުފޫޒުން އެއްކިބާވެފައިވާ އަދުލުވެރި ފަނޑިޔާރެއް ޤާއިމުކޮށް، ޚިޔާލު ފާޅުކުރުމުގެ މިނިވަންކަމާއި އެއްވެ އުޅުމުގެ މިނިވަންކަމުގެ އިތުރުން ފެންވަރު ރަނގަޅު ޚިދުމަތްތަކެއް ޤާއިމުކޮށްދިނުމާއި، ވަޒީފާގެ ފުރުސަތުތައް ފަހިކޮށްދީ، ފުލުހުންގެ ޤާބިލްކަން އިތުރުކޮށްދީ، އިޤްތިޞާދީ ތަރައްގީއަށް މަސައްކަތްކުރުމާއި، ޓެކްނޮލޮޖީއަށް އަހުލުވެރި ބަޔަކަށް ޒުވާނުން ހެދުން ހިމެނޭކަމަށް ނާޒިމް ވަނީ ވިދާޅުވެފައެވެ.
