ލޮޓަސް ގޯޅި ބަންދުކުރުމަށް އިންޑިއަން ހައި ކޮމިޝަނުން ސަރުކާރަކަށް ނާންގާ - ފޮރިން މިނިސްޓްރީ
އެއްވެސް ހަގީގަތެއް ނެތް ވާހަކަތަކެއް
ރާއްޖޭގައި ހުންނަ އިންޑިއަން ހައިކޮމިޝަން
މާލޭގައި ހުންނަ އިންޑިއަން ހައި ކޮމިޝަންގެ އިރަށް އޮންނަ ލޮޓަސް ގޯޅި ބަންދުކުރުމަށް ހައިކޮމިޝަނަރ ސަންޖޭ ސުދީރު ސަރުކާރަށް އަންގާފައިވާ ކަމަށް ބުނާ ވާހަކަ ފޮރިން މިނިސްޓްރީން ދޮގުކޮށްފިއެވެ.
ފޮރިން މިނިސްޓްރީގެ އިސް ބޭފުޅަކާ ހަވާލާދީ އޮންލައިން ނޫހެއްގައި، ލިޔެފައިވާ ލިޔުމަކާ ގުޅޭގޮތުން ފޮރިން މިނިސްޓްރީއިން ބުނީ، އެއީ އެއްވެސް ހަގީގަތެއް ނެތް ވާހަކަތަކެއް ކަމަށެވެ. އެކަހަލަ އެއްވެސް ވާހަކައެއް ހައިކޮމިޝަނުން ހިއްސާކޮށްފައި ނުވާ ކަމަށެވެ. މަގު ބަންދުކުރުމާއި ޕޭވްމަންޓް ބޭނުން ނުކުރެވޭ ގޮތަށް ހެދުމަށް ސަރުކާރަށް އަންގާފައިވާ ކަމަށް ރިޕޯޓުކޮށްފައިވާއިރު، މިއީ ދޮގު ވާހަކަތަކެއް ކަމަށް ފޮރިން މިނިސްޓްރީން ބުނެއެވެ.
އިންޑިއާއަކީ ރާއްޖެއާ އަބަދުވެސް ގާތް ގުޅުމެއް ބާއްވަމުން އަންނަ ގައުމެކެވެ. މިހާރު އިދިކޮޅު ފަރާތްތަކުން އަންނަނީ އިންޑިއާ އާއި ރާއްޖެއާ ދެމެދުގައި އޮތް ގުޅުމަށް ވަރަށް ބޮޑަށް ފާޑުކިޔަމުންނެވެ. އެގޮތުން ރާއްޖޭގެ ކަންކަމަށް އިންޑިއާއިން ނުފޫޒު ފޯރުވާ ކަމަށް ބުނެ ތަފާތު ވާހަކަތައް ދައްކަމުންދެއެވެ.
ދާދި ފަހުން ފޮރިން މިނިސްޓަރ އަބްދުﷲ ޝާހިދުވަނީ އިންޑިއާއަށް ވަޑައިގެން އިންޑިއަން ކައުންސިލް އޮފް ވޯލްޑް އެފެއާޒްގައި ވާހަކަފުޅު ދައްކަވާފައެވެ. މި ދަތުރުފުޅުގެ ތެރެއިން މިނިސްޓަރ ޝާހިދު ވަނީ އިންޑިއާގެ ބޮޑުވަޒީރު ނަރެންދްރަ މޯދީގެ އަރިހަށް އިޙްތިރާމްގެ ޒިޔާރަތެއް ވެސް ކުރައްވާފައެވެ. އެ ދަތުރުފުޅުގައި މިނިސްޓަރު ވަނީ އިންޑިއާއިން ދިވެހިރާއްޖެއަށް ދޭ ހިލޭ އެހީ އިތުރުކުރުމުގެ އެއްބަސްވުމުގައި ވެސް ސޮއިކޮށްފައެވެ.
