ރާއްޖޭގައި ބޮޑުވަޒީރެއް ހުންނަވަން ޖެހޭކަމަށް މިހާރު ގަބޫލެއް ނުކުރަން- ރައީސް މައުމޫން
މައުމޫން ވިދާޅުވީ ދިވެހިރާއްޖޭގެ ހާލަތާ އެންމެގުޅޭ، ރާއްޖެއަށް އެންމެ ފައިދާހުރި ވެރިކަމުގެ ނިޒާމަކީ ރިޔާސީ ނިޒާމު ކަމަށް
ކުރީގެ ރައީސް މައުމޫން އަބްދުލްޤައްޔޫމް
ދިވެހިރާއްޖޭގައި ބޮޑުވަޒީރެއް ހުންނަވަން ޖެހޭ ކަމަށް ގަބޫލުފުޅު ނުކުރައްވާކަމަށް ކުރީގެ ރައީސް މައުމޫން އަބްދުލް ޤައްޔޫމް ވިދާޅުވެއްޖެއެވެ.
ރާއްޖެޓީވީގެ 'ފަށާއިރު' ޕްރޮގްރާމްގައި ވާހަކަދައްވަމުން ރައީސް މައުމޫން ވިދާޅުވީ ރާއްޖޭގައި ބޮޑުވަޒީރެއް ހުންނަވަން ޖެހޭ ކަމަށް ގަބޫލުފުޅު ކުރައްވާކަމަށް ކުރިން ވިދާޅުވެފައިވީ ނަމަވެސް އެ ވާހަކައަކީ ރާއްޖޭގައި ގާނޫނު އަސާސީއެއް އެންމެ ފުރަތަމަ ފަރުމާކުރަން އުޅުނުއިރު ރާއްޖޭގައި އޮންނަން ޖެހޭނީ ކޮންކަހަލަ ނިޒާމެއްތޯ ކުރެވުނު ބަހުސެއްގެ ތެރެއިން ވިދާޅުވި ވިދާޅުވުމެއް ކަމަށެވެ.
ރައީސް މައުމޫން ވިދާޅުވީ، އޭރު އެހެން ވިދާޅުވީ އެ ބަހުސްގައި ބައިވެރިވުމުގެ ގޮތުން ކަމަށާއި އޭރު ދެއްކީ އެ ދުވަސްވަރަށް ރާއްޖެއަށް އެންމެ ރަނގަޅު ގޮތުގެ ވާހަކަ ކަމަށެވެ. އަދި އެއީ ދާއިމަށް އެންމެ ރަނގަޅު ގޮތްކަމަށް ގަބޫލު ނުކުރައްވާ ކަމަށް ވެސް ވިދާޅުވިއެވެ.
ދިވެހިރާއްޖޭގައި ބަރުލަމާނީ ނިޒާމަށް ޖާގައެއް ނެތް ކަމަށް އެމްއާރްއެމްގެ ލީޑަރުގެ ހައިސިއްޔަތުން ވެސް ރައީސް މައުމޫން ވަނީ ވިދާޅުވެފައެވެ. ރާއްޖެއަށް އެންމެ އެކަށީގެންވަނީ "ބަރުލަމާނީ ނިޒާމުތޯ ނުވަތަ ރިޔާސީ ނިޒާމުތޯ" ބަހުސް ގަދަވެފައިވާ މި ދަނޑިވަޅުގައި މައުމޫން ވިދާޅުވީ ދިވެހިރާއްޖޭގެ ހާލަތާ އެންމެގުޅޭ، ރާއްޖެއަށް އެންމެ ފައިދާހުރި ވެރިކަމުގެ ނިޒާމަކީ ރިޔާސީ ނިޒާމު ކަމަށެވެ.
ދިވެހި ރައްޔިތުންގެ ބޮޑު އަޣްލަބިއްޔަތަކުން ނިންމާފައިވަނީ ވެސް ހަމަ ރިޔާސީ ނިޒާމުކަން ފާހަގަކުރެއްވިއެވެ. އަދި ވިދާޅުވީ ބަރުލަމާނީ ނިޒާމަށް ރާއްޖޭގައި ޖާގައެއް ނެތް ކަަމަށާއި، އެކަން ވަރަށް ސާފު ކަމަށެވެ.
