ގިނަ ބަޔަކު ދަނީ އުފަންދުވަސް ފާހަގަކޮށް ތަހުނިޔާ ފޮނުވަމުން
ރައީސް ނަޝީދު: އެންމެގިނަބަޔަކު ތާއީދު ކުރައްވާ އެއްބޭފުޅާ
ރާއްޖޭގައި ބޭއްވުނު ފުރަތަމަ މަލްޓި ޕާޓީ އިންތިޚާބު ކާމިޔާބު ކުރެއްވި ކުރީގެ ރައީސުލް ޖުމްހޫރިއްޔާ މުހައްމަދު ނަޝީދުގެ އުފަންދުވަސް ފާހަގަކޮށް ގިނަ ބައެއްގެ ހެޔޮއެދުންތައް ސޯޝަލް މީޑިއާއަށް ބަންޑުން ކޮށްލައިފިއެވެ.
އަންގާރަ ދުވަހުގެ ރޭގެ މެންދަމު 12 ޖެހުމާއެކު ޓްވިޓާ މެދުވެރިކޮށް އެމަނިކުފާނަށް ދިޔައީ ގިނަ ބަޔަކު އުފަން ދުވަހުގެ ހެޔޮ އެދުމާއި ތަހުނިޔާ ރައްދު ކުރަމުންނެވެ. އެއްބަޔަކު އެމަނިކުފާނާއެކު ނަންގަވާފައިވާ އަމިއްލަ ފޮޓޯތައް ހިމަނައިގެން އުފަންދުވަހުގެ ތަހުނިޔާގެ ޓްވީޓްތައް ކޮށްފައިވާއިރު އަނެއް ބަޔަކު ވަނީ އެފަދަ ފޮޓޯތައް އެމީހުންގެ ޕްރޮފައިލް ޕިކްޗަރގެ ގޮތުގައިވެސް ހިމަނާފައެވެ.
ރައީސް ނަޝީދަށް 50 އަހަރު ފުރުން ފާހަގަކޮށް އެކަމުގެ ތަހުނިޔާ ކިޔަމުންދާ ބައެއް މީހުން ވަނީ އެމަނިކުފާނުގެ ވެރިކަމުގައި ރައްޔިތުންނަށްޓަކައި ކުރެއްވި ބައެއް ކަންކަމާއި އެފަދަ ކަންކަމުގައި ހުންނަވަނިކޮށް ނަންގަވާފައިވާ އެމަނިކުފާނުގެ ފޮޓޯވެސް ހިމަނުއްވާފައެވެ. ރައްޔިތުންނާ ބައްދަލުވާއިރު އެމަނިކުފާނު އެ ގެންގެޅުއްވާ އޯގާތެރިކަން ދައްކުވައިދޭ ފޮޓޯތައްވެސް އުފަންދުވަހުގެ ތަހުނިޔާގެ މެސެޖްތަކުގައި ބައެއް މީހުން ދަނީ ހިމަނަމުންނެވެ.
ރައީސް ނަޝީދަކީ އާ ޤާނޫން އަސާސީއަށްފަހު 2008 ގައި ބޭއްވި ރިޔާސީ އިންތިޚާބު ކާމިޔާބު ކުރެއްވި ފުރަތަމަ ރައީސެވެ. އެމަނިކުފާނުގެ ވެރިކަން 2012 ގައި ފުލުހުންނާ ސިފައިންގެ ތެރެއިން ބަޔަކާއި އަދި އޭރުގެ އިދިކޮޅު ފަރާތްތައް ގުޅިގެން ބަދަލުކުރިއިރު އެމަނިކުފާނު ވަނީ ގިނަ ކަންތައްތަކެއް ކުރައްވާފައެވެ. އޭގެ ތެރޭގައި ސީދާ ރައްޔިތުންގެ އިޖްތިމާއީ ހަމަޖެހުމާއި ގުޅުންހުރި ކަންތައްކުގެ ގޮތުގައި ބެލެވޭ، ހިލޭ ބޭސްކުރެވުމާއި، އެކަނިވެރި މައިންނަށް އިނާޔަތް ދިނުމާއި އުމުރުން ދުވަސްވީ މީހުންނަށް ދެވޭ ޚާއްޞަ އިނާޔަތްފަދަ ކަންކަން ފާހަގަ ކޮށްލެވެއެވެ.
އޭގެފަހުން 2013 ވަނަ އަހަރު ބޭއްވި ރިޔާސީ އިްތިޚާބުގައިވެސް އެންމެ ގިނަ ވޯޓް އެއްބޭފުޅަކަށް ލިބިވަޑައިގަންނަވާފައިވަނީ އެމަނިކުފާނަށެވެ.
ރައީސް ނަޝީދުގެ 50 ވަނަ އުފަންދުވަހާ ކުރިމަތިވިއިރު އެމަނިކުފާނު ހުންނެވީ ޓެރަރިޒަމްގެ ކުށުގައި ތޭރަ އަހަރު ޖަލުހުކުމެއްގައެވެ. އަދި އަމިއްލައަށް އަރުވާލެއްވިގެން ދިރިއުޅުއްވަމުން ގެންދަވަނީ އިނގިރޭސިވިލާތުގައެވެ.
