ކޮވިޑް ބަލީގައި 91 އަހަރުގެ މީހަކު ނިޔާވެއްޖެ

ކޮވިޑް-19 ބަލީގައި ރާއްޖެއިން އިތުރު މީހަކު ނިޔާވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ ރޭ މެންދަމު 01:05 ގައި ބ. ކޮވިޑް މެނޭޖްމެންޓް ފެސިލިޓީގައި އެޑްމިޓުކޮށްގެން ކޮވިޑަށް ފަރުވާ ދެމުންދިޔަ އުމުރުން 91 އަހަރުގެ ދިވެހި އަންހެނަކު ނިޔާވެފައިވާ ކަމަށެވެ.

މިއީ ކޮވިޑް-19 ބަލީގައި ރާއްޖެއިން ނިޔާވި 217 ވަނަ މީހާއެވެ. އަދި މިއީ ކޮވިޑް ބަލީގައި މި މަހު ރާއްޖެއިން ނިޔާވި 6 ވަނަ މީހާއެވެ. މި ބަލީގައި އެންމެ ފަހުން މީހަކު ނިޔާވީ މި މަހުގެ 16 ވަނަ ދުވަހުއެވެ. އެއީ އުމުރުން 49 އަހަރުގެ ދިވެހި ފިރިހެނެއް ކަމަށާއި، އޭނާ ނިޔާވީ ހުޅުމާލެ މެޑިކަލް ފެސިލިޓީގައި އެޑްމިޓުކޮށްގެން ފަރުވާ ދެމުންދަނިކޮށް ކަމަށް އެޗްޕީއޭއިން ވަނީ ބުނެފައެވެ.

ކޮވިޑްގައި މިހާތަނަށް އެންމެ ގިނަ މީހުން ނިޔާވެފައިވަނީ މެއި މަހުއެވެ. އެމަހު އެކަނިވެސް 88 މީހުން ވަނީ ނިޔާވެފައެވެ.