ފްރޮންޓްލައިންގައި މަސައްކަތްކުރާ ސިއްހީ ޚިދުމަތްތެރިންނަށް ކޮވިޑް ވެކްސިން ނުލިބޭ މައްސަލަ ބޮޑުވެފައި

ކޮވިޑް-19ގެ ހާލަތުގައި ފްރޮންޓްލައިންގައި މަސައްކަތްކުރާ ސިއްހީ ޚިދުމަތްތެރިންނަށް ވެކްސިން ނުލިބިދާކަމުގެ ޝަކުވާތައް ލިބެމުންދާކަމަށް އިންޓަރނޭޝަނަލް ކައުންސިލް އޮފް ނަރސަސް (އައިސީއެން)އިން ބުނެފިއެވެ.

ސިއްހީ ޚިދުމަތްތެރިންނަކީ އެންމެ ފުރަތަމަ ވެކްސިން ލިބޭނެކަމަށް ކޮންމެ ގައުމަކުންވެސް ބުނާ ކެޓަގަރީގައި ހިމެނޭ މީހުންނެވެ. ނަމަވެސް އައިސީއެންއިން ބުނާގޮތުގައި އެޖަމިއްޔާގައި ރަޖިސްޓްރީވެފައިވާ 27 މިލިއަން މީހުންގެ ތެރެއިން ވެކްސިންގެ ފުރަތަމަ ޑޯޒް ނުލިބޭކަމަށް ބުނާ މީހުންގެ އަދަދު 10 މިލިއަނަށްވުރެ މައްޗަށް އަރައެވެ.

އަނެއްކޮޅުން ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)އިން ލަފާކުރާ ގޮތުގައި ކޮވިޑް-19ގެ ޕެންޑަމިކްގެ ތެރޭގައި މުޅި ދުނިޔެއިން ދުވާލެއްގެ މައްޗަށް ސިއްހީ މަސައްކަތްތެރިންގެ 200 މީހުން ވަނީ މަރުވެފައެވެ.

އައިސީއެންގެ ޗީފް އެގްޒެކެޓިވް ހޮވަރޑް ކެޓަން ވިދާޅުވީ ކޮންމެ ދުވަހަކު 200 މީހުން ގޮވައިގެން ދަތުކުރާ މަތިންދާ ބޯޓެއް ވެއްޓޭނަމަ އެކަން ތަހުގީގުކުރާނެކަމަށެވެ. އަދި އެކަމަށް އެކަށީގެންވާ ފިޔަވަޅު އަޅާނެކަމަށެވެ.

ނަރުހުންނާއި ސިއްހީ ދާއިރާގައި މަސައްކަތްކުރާ އެހެން މީހުން ނުރައްކަލަށް ހުށަހެޅުމަށްފަހު ނުރައްކަލާ މާދުރުގައި ތިބި އެތައް ބަޔަކަށް ގިނަ ގައުމުތަކެއްގައި ވެކްސިން ދެމުންދާ ކަމަށް ވަނީ ބުނެފައެވެ.

މީގެއިތުރުން ސިއްހީ ދާއިރާގައި މަސައްކަތްކުރާ މީހުން ކޮވިޑަށް ޕޮޒިޓިވްވަމުން އަންނަ ސީދާ އަދަދުތައް ގައުމުތަކުން ޑަބްލިޔުއެޗްއޯއަށް އަންގަމުންނުދާ ކަމަށްވެސް އެޖަމިއްޔާއިން ވަނީ ބުނެފައެވެ. ޑަބްލިޔުއެޗްއޯއަށް ގައުމުތަކުން އަންގާފައިވާ އަދަދުތަކަށް ބަލާއިރު މަރުވެފައިވަނީ 6643 މީހުންނެވެ. ނަމަވެސް އަސްލު އަދަދު އެއަށްވުރެ މަތިވާނެކަމަށް އެޖަމިއްޔާއިން ބުނެއެވެ.

ޑަބްލިޔުއެޗްއޯއިން ލަފާކުރާ ގޮތުގައި ކޮވިޑް ޖެހިގެން މަރުވި، ސިއްހީ ދާއިރާގައި މަސައްކަތްކުރާ މީހުންގެ އަދަދު 115،000ށް ވުރެ މަތިވާނެއެވެ.