މިހާތަނަށް 14 ރަށެއް ވަނީ މޮނިޓަރިންގގައި ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.

އެޗްޕީއޭން އާންމުކުރި ތަފާސްހިސާބުތަކަށް ބަލާއިރު މި 14 ރަށުގެ ތެރެއިން މޮނިޓަރިންގގައި އެންމެ ގިނަދުވަސްވީ ރަށަކީ ގދ.ތިނަދޫއެވެ. އެރަށް މޮނިޓަރިންގއަށް ލާފައިވަނީ އެޕްރީލް މަހު 24ގައެވެ.

މޭ މަހު 5 ރަށެއް ވަނީ ރަށެއް މޮނީޓަރިންގއަށް ލާފައެވެ. އެގޮތުން މޭ 2 ވަނަ ދުވަހު ފ. ފީއަލި މޮނިޓަރިންއަށް ލާފައި ވާއިރު، މޭ 6 ވަނަ ދުވަހު ޏ. ފުވައްމުލައް މޮނިޓަރިންއަށް ލާފައިވެއެވެ. މޭ 15 ވަނަ ދުވަހު ގއ. ވިލިނގިލި މޮނިޓަރިންއަށް ލާފައި ވާއިރު، މޭ 24 ވަނަ ދުވަހު އއ. ތޮއްޑޫ ވަނީ މޮނީޓަރިންގއަށް ލާފައެވެ. އަދި މޭ 25 ވަނަ ދުވަހު ރ. ދުވާފަރު ވަނީ މޮނިޓަރިންއަށް ލާފައެވެ.

ޖޫން މަހު ވެސް 3 ރަށެއް ވަނީ މޮނިޓަރިންގއަށް ލާފައެވެ. އެގޮތުން ޖޫން މަހު 12 ވަނަ ދުވަހު ގއ. ކޫއްޑޫ މޮނިޓަރިންއަށް ލާފައި ވާއިރު، ޖޫން މަހު 24 ވަނަ ދުވަހު ހއ. ދިއްދޫ، އަދި ޖޫން މަހު 30 ވަނަ ދުވަހު ރ. މީދޫ މޮނިޓަރިންއަށް ލާފައިވެއެވެ.

ޖުލައި މަހު 5 ރަށެއް ވަނީ މޮނީޓަރިންގއަށް ލާފައެވެ. އެގޮތުން ކ. ޖުލައި 7 ވަނަ ދުވަހު ކ. ގުރައިދޫ، އަދި ށ.ފޯކައިދޫ އާއި ގދ.ނަޑެއްލާ އަދި ކ.ކާށިދޫ މިމަހު 13 ވަނަ ދުވަހު މޮނިޓަރިންއަށް ލާފައިވެއެވެ. އަދި މިމަހުގެ 17 ވަނަ ދުވަހު އއ. ރަސްދޫ މޮނިޓަރިންއަށް ލާފައިވެއެވެ. 

ރާއްޖޭގައި ކޮވިޑްގެ ހާލަތު ރަނގަޅުވެ، ޚާއްސަކޮށް މާލެ ސަރަހައްދުގައި ކޮވިޑްގެ ހާލަތު ރަނގަޅުވުމާއެކު އަޅާފައިވާ ފިޔަވަޅުތަކަށް ގިނަ ލުއިތަކެއް ދީފައިވެއެވެ. ނަމަވެސް ވެކްސިންގެ ދެ ޑޯޒު ފުރިހަމަ ކުރިކަމުގައި ވިޔަސް، މޮނިޓަރިންގެ ހާލަތުގައި އޮންނަ ރަށްރަށަށް ދަތުރުކުރާނަމަ ކަރަންޓީންގެ މުއްދަތު ފުރިހަމަ ކުރަންޖެހޭނެ ކަމަށް ބުނެފައިވެއެވެ. ވެކްސިންގެ 2 ޑޯޒް ޖެހުމަށްފަހު 14 ދުވަސް ފުރިހަމަވެފައިވާނަމަ ޕީސީއާރް ނެގެޓިވް ޓެސްޓާއެކު ރަށަށް ދެވޭ ގޮތަށް ހުޅުވާލީ މާލެ ސަރަހައްދުގެ ކޮވިޑް ޕޮޒިޓިވިޓްވާ އަދަދު މަދުވީމައެވެ.

ދިން ލުއިތަކާއި ލިބިފައިވާ ޗުއްޓީއާއިއެކު ގިނައަދަދެއްގެ މީހުން ރަށްރަށަށް ދަތުރުކުރަމުން ދާއިރު އެޗްޕީއޭގެ އުސޫލުތަކަށް އަމަލުކުރަމުން ގެންދިއުމަށް ވަނީ އިލްތިމާސް ކޮށްފައެވެ.