ޢަލީ ވަޙީދު ރާއްޖެ ގެންނަން ޔޫކޭ ސަރުކާރަށް ޕެޓިޝަނެއް

ޖިންސީ ފުރައްސާރައިގެ ތުހުމަތުގައި ދަޢުވާ އުފުލާފައިވާ ކުރީގެ ޓޫރިޒަމް މިނިސްޓަރ ޢަލީ ވަޙީދު އަނބުރާ ރާއްޖެ ފޮނުވައިދިނުމަށް އެދި އިނގިރޭސިވިލާތުގެ ޤާނޫނު ހަދާ މަޖިލީހަށް ހުށަހެޅުމަށްޓަކައި ޕެޓިޝަނެއް ތައްޔާރު ކުރަން ފަށައިފިއެވެ.

ޓޫރިޒަމް މިނިސްޓަރކަމުގެ މަގާމުގައި ހުންނެވިއިރު، އެ މިނިސްޓްރީގެ އަންހެން މުވައްޒަފުންތަކަކަށް ޖިންސީފުރައްސާރަކުރި މައްސަލައެއްގައި އޭނާގެ މައްޗަށް ދައުވާ އުފުލައި، ޝަރީޢަތް ކުރިއަށްދާއިރު، ބޭސްފަރުވާއަށް ކަމަށް ވިދާޅުވެ އޭނާ ހުންނެވީ އިނގިރޭސިވިލާތުގައެވެ.

ޢަލީ ވަޙީދު ރާއްޖެ އަނބުރާ ގެނައުމަށް ބާރު އެޅުމަށްޓަކާ ޗޭންޖް.އޯގް ގައި ގަދާފައިވާ ޕެޓިޝަނުގައި ވަނީ އޭނާ ހައްޔަރުކޮށް އެ ގައުމުން ޑީޕޯޓުކޮށްލުމަށް އެދިފައެވެ. އެގޮތުން އޭނާގެ މައްޗަށް ތުހުމަތުތައް އުފުލިފައިވާ ގޮތާއި މައްސަލަ އޮތް ހިސާބުވެސް ވަރަށް ބޮޑަށް ތަފްސީލްކޮށްދީފައިވެއެވެ. އޭނާގެ މައްޗަށް އެ ތުހުމަތުތައް ކުރާ ޓޫރިޒަމް މިނިސްޓްރީގެ މުވައްޒަފުން އެ ވާހަކަތައް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާ ވެސް ހިއްސާކުރައްވައި، އޭނާގެ މައްޗަށް ތުހުމަތު ކުރެވޭ ހަމައެކަނި މައްސަލަ އަކީ އެއީ ނޫން ކަން ވެސް ފާހަގަކޮށްފައިވެއެވެ. އެގޮތުން ޓްރާންސްޕޯޓް މިނިސްޓަރ ޢާއިޝަތު ނަޙުލާއާ ބޭއަދަބީކޮށް ވާހަކަދައްކަވާ އޯޑިއޯއެއް މީގެ ކުރިން ލީކުވެފައިވާކަން ވެސް ޕެޓިޝަނުގައިވެއެވެ.

އޭނާގެ މައްޗަށް މި މައްސަލާގައި 6 ދަޢުވާއެއް އުފުލާފައިވާއިރު، އޭގެ ތެރޭގައި ޖިންސީ އަނިޔާކުރުމާއި، ރޭޕްކުރަން އުޅުމުގެ ދަޢުވާއާއި، ޖިންސީ ގުނަވަން ހާމަކުރުމާއި، ޖިންސީ ގޯނާކުރުމާއި، ޖިންސީ ގޯނާ ކުރަން އުޅުމުގެ ދައުވާއާއި ހުއްދަ ނޫން ޖިންސީ މުޢާމަލާތެއް ހިންގުމަށް އެދުމުގެ ދައުވާވެސް ހިމެނެއެވެ.

މި މައްސަލަތައް ފެންމަތިވުމާއެކު އޭނާ ވަކިކޮށްފައިވާއިރު، އޭނާގެ ޕާސްޕޯޓުވެސް ހިފަހައްޓާފައިވެއެވެ. އެކަމަކު ކްރިމިނަލް ކޯޓުން އޭނާގެ ޕާސްޕޯޓު ދޫކޮށްލީ 4 މަހަށް، ރާއްޖެއިން ބޭރަށް ބޭސްފަރުވާއަށް ވަޑައިގަތުމަށެވެ. ނަމަވެސް އެ މުއްދަތު ނިމި، އޭނާގެ މައްޗަށް ތުހުމަތުކުރެވޭ މައްސަލަތަކުގެ ޝަރީޢަތް ފެށި އިރު ވެސް އޭނާ އެނބުރި ވަޑައިގެންފައެއް ނުވެއެވެ.

ބޭސްފަރުވާ ނުނިމޭ ކަމަށް ވިދާޅުވެ ކްރިމިނަލް ކޯޓަށް ލިޔެކިޔުންތައް ހުށަހަޅާފައިވާތީ، އޭނާ އިނގިރޭސިވިލާތުގައި ހުންނަވައިގެން ޝަރީޢަތުގައި ބައިވެރިވެވޭ ގޮތަށް ކަނޑައެޅި ނަމަވެސް އެނގިފައިވާ ގޮތުގައި އޭނާއަށް އަންގާފައި ވަނީ ތިން މަހުން ތިން މަހުން ފޮލޯ ޗެކްއަޕް ހެއްދުމަށެވެ. އިނގިރޭސިވިލާތަކީ ރާއްޖޭގެ ޤާނޫނީ ބާރު ހިނގާ ސަރަހައްދަކަށް ނުވާތީ އެފަދަ ގައުމެއްގައި އޭނާ ހުންނަވަނިކޮށް ޝަރީޢަތް ކުރިއަށް ގެންދިއުމަށް ޕީޖީ ވަނީ ދެކޮޅު ހަދާފައެވެ. އެ މައްސަލަ ހައިކޯޓުގައި އިސްތިއުނާފްކުރުމުން އެ ކޯޓުން މައްސަލަ ބަލައިނުގަނެ ބޭރުކޮށްލާފައިވާއިރު، ސުޕްރީމް ކޯޓުން ވަނީ މައްސަލައިގެ އަޑުއެހުމުގައި ބައިވެރިވެވަޑައިގަތުމަށް ޢަލީ ވަޙީދަށް ޗިޓު ހަވާލުކޮށްފައެވެ.