ސަސްގެ ގޯލްކީޕަރު މިރްޒޮހިދު މާޒިޔާއަށް

މިދިޔަ ސީޒަނުގައި ސުޕަ ޔުނައިޓެޑް ސްޕޯޓްސް (ސަސް) ގެ ގޯލު ބެލެހެއްޓި އުޒްބެކިސްތާނުގެ ގޯލްކީޕަރު މިރްޒޮހިދު މަމަކްތޯނޯފް ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނަށް ބަދަލުވެއްޖެއެވެ.

ހޮނިހިރު ދުވަހު މާޒިޔާއިން ވަނީ މިރްޒޮހިދު އެ ޓީމާ ގުޅުނުކަން ކަށަވަރުކޮށްދީފައެވެ. އޭއެފްސީ ކަޕުގެ ދެކުނު އޭޝިއާގެ ގްރޫޕުގެ މެޗުތަކަށް ތައްޔާރުވާން މާޒިޔާއިން ފަރިތަކުރުންތައް ފަށާފައިވާއިރު، މިރްޒޮހިދު މިހާރު އަންނަނީ މާޒިޔާގެ ފަރިތަކުރުންތަކުގައި ބައިވެރިވަމުންނެވެ.

އުމުރުން 27 އަހަރުގެ މިރްޒޮހިދު މާޒިޔާއަށް ބަދަލުވިއިރު، މިދިޔަ ސީޒަނުގައި ސަސްއިން ކުޅުނު 14 މެޗުގައިވެސް އެ ޓީމުގެ ގޯލު ބެލެހެއްޓީ މިރްޒޮހިދެވެ. އަދި މިދިޔަ ސީޒަނުގެ ދިރާގު ދިވެހި ޕްރިމިއާ ލީގުގައި އޭނާ ވަނީ ތަފާތު މޮޅު ކުޅުމެއް ދައްކާފައެވެ.

އަންނަ ސީޒަނަށާއި އޭއެފްސީ ކަޕަށް ޓީމު ވަރުގަދަކުރުމުގެ ގޮތުން މާޒިޔާއިން އުޒްބެކިސްތާނުގެ ގޯލްކީޕަރު ގެނައިރު، މިދިޔަ ސީޒަން އެ ޓީމުން ފެށީ ސާބިއާގެ ގޯލްކީޕަރު ނިކޮލާ ވުޔަަނަކާއެކުއެވެ. އެކަމަކު ސީޒަނުގެ މެދުތެރެއިން ވުޔަަނަކް ދޫކޮށްލިއިރު، މި އަހަރުގެ މާޗު މަހުގެ ތެރޭގައި އެ ޓީމުގެ ގޯލްކީޕަރަކަށް ސީރިއާގެ ގޯލްކީޕަރު މަހުމޫދު އަލް-ޔޫސުފް ވަނީ އަލުން ހަމަޖައްސާފައެވެ. އެކަމަކު ކަކުލަށް ލިބުނު އަނިޔާގެ ސަބަބުން މަހުމޫދަށް ގިނަ މެޗުތައް ގެއްލުނުއިރު، މިދިޔަ ސީޒަނުގެ ގިނަ މެޗުތަކުގައި މާޒިޔާގެ ގޯލް ބެލެހެއްޓީ ރާއްޖޭގެ ޒުވާން ގޯލްކީޕަރު ހުސެއިން ޝަރީފް (ހުސެން) އެވެ.

ދެ މަހެއްހާ ދުވަހުގެ މެދުކެނޑުމަކަށްފަހު މާޒިޔާއިން ފަރިތަކުރުންތައް ފަށާފައިވާއިރު، މި އަހަރުގެ އޭއެފްސީ ކަޕުގެ ގްރޫޕް ސްޓޭޖުގައި މި ވަގުތު އޮތީ މާޒިޔާގެ އިތުރުން އިންޑިއާގެ މޯހަން ބަގާން އަދި ބަންގްލަދޭޝްގެ ބަޝުންދަރާ ކިންގްސްއެވެ. މި ގްރޫޕުގެ ފަހު ޖާގަ ލިބޭނީ ރާއްޖޭގެ ކުލަބު އީގަލްސް އާއި އިންޑިއާގެ ބެންގަލޫރު އެފްސީ ކުޅޭ ޕްލޭ-އޮފް މެޗުން މޮޅުވާ ޓީމަކަށެވެ.

މާޒިޔާއިން މިރްޒޮހިދުގެ ސޮއި ހޯދިއިރު، އެ ޓީމަކީ ދިރާގު ދިވެހި ޕްރިމިއާ ލީގުގެ މިދިޔަ ދެ ސީޒަނުގެވެސް ޗެމްޕިއަނުންނެވެ. މި ނިމުނު ސީޒަނުގައި މާޒިޔާއަށް ޗެމްޕިއަންކަން ލިބުނީ ތިންވަނަ ބުރު ނުކުޅެ ލީގު ނިންމާލިއިރު، ތާވަލުގެ އެއްވަނަ މަގާމުގައި އޮތުމުންނެވެ. މާޒިޔާއަށް ކުޅުނު 14 މެޗުން 34 ޕޮއިންޓް ލިބުނުއިރު، އެ ޓީމުން ލީގު ދިފާއުކުރީ ނުވަ ޕޮއިންޓުގެ ލީޑަކާއެކުއެވެ.