ދަ ގްރާންޑޭ ސްޕޯޓްސް ކުލަބު ދޫކޮށް ސުޕަ ޔުނައިޓެޑް ސްޕޯޓްސް (ސަސް) އަށް މިޑްފީލްޑަރު ޔަސްފާދު ހަބީބު (މުލަކޭ) ސޮއިކޮށްފިއެވެ.

ސަސްގެ ސްޕޮންސަރުންގެ އަގުވަޒަންކުރުމަށް ހުކުރު ދުވަހުގެރޭ ސަސް ކޮފީ ކުލަބުގައި ބޭއްވި ހަފުލާގައި ވަނީ ސަސްގެ ކުޅުންތެރިއެއްގެ ގޮތުގައި މުލަކޭ ތައާރަފުކޮށްފައެވެ.

އަންނަ ސީޒަނަށް އުމުރުން 28 އަހަރުގެ މުލަކޭ ސަސްއަށް ސޮއިކުރިއިރު، އޭނާ އެންމެ ފަހުން ކުޅެމުން އައީ ދަ ގްރާންޑޭއަށެވެ. ދަ ގްރާންޑޭގެ ކެޕްޓަންގެ މަގާމުވެސް އަދާކުރި މުލަކޭ އެ ޓީމާ ގުޅުނީ 2019 ވަނަ އަހަރުގެ ފެބްރުއަރީ މަހުގެ ތެރޭގައެވެ. އެއަށްފަހު މިދިޔަ ދެ ސީޒަނުގައި މުލަކޭ ދަ ގްރާންޑޭއަށް ކުޅުނުއިރު، އޭނާ ވަނީ އެ ޓީމުގެ މެދުތެރޭގައި މޮޅު ކުޅުމެއް ދައްކާފައެވެ. އަދި މިދިޔަ ސީޒަނުގައި ދަ ގްރާންޑޭއިން ކުޅުނު 14 މެޗުގައިވެސް މުލަކޭ ކުޅުނުއިރު، އޭނާ ވަނީ މިދިޔަ ސީޒަނުގައި ހަތަރު ލަނޑު ޖަހާފައެވެ.

ދަ ގްރާންޑޭގެ ކުރިން މުލަކޭ ވިދާލީ މާޒިޔާ ސްޕޯޓްސް އެންޑް ރެކްރިއޭޝަނުންނެވެ. މުލަކޭ ވަނީ މާޒިޔާގައި ކާމިޔާބު ތިން އަހަރު ހޭދަކޮށްފައެވެ. އެގޮތުން އެ ޓީމުގެ މެދުތެރޭގައި މޮޅު ކުޅުމެއް އޭނާ ދެއްކިއިރު، އޭއެފްސީ ކަޕުގައި 2017 ވަނަ އަހަރު މާޒިޔާ ވާދަކުރިއިރު، ފުރަތަމަ އެގާރައިގައި ހިމެނިގެންވެސް މުލަކޭ ވަނީ ކުޅެފައެވެ.

އަންނަ ސީޒަނަށް މުލަކޭ ސަސްއާ ގުޅުނުއިރު، އެ ޓީމުގެ ކޯޗަކީ ފުޓްބޯޅައިގެ އެންމެ މަތީ ކޯޗިން ލައިސަންސް ކަމަށްވާ އޭއެފްސީ ޕްރޯ ލައިސަންސް ނަގާފައިވާ ކޯޗު މުޙައްމަދު ޝިޔާޒް (މޯހަން) އެވެ. މިދިޔަ ސީޒަނުގެ މެދުތެރެއިން މޯހަން ސަސްއާ ހަވާލުވިއިރު، ސަސްއިން މިދިޔަ ސީޒަނުގެ ދިރާގު ދިވެހި ޕްރިމިއާ ލީގު ނިންމާލީ ހަވަނައިގައި އޮވެގެންނެވެ. ސަސްއަށް ލީގުގައި ކުޅުނު 14 މެޗުން 15 ޕޮއިންޓް ލިބުނުއިރު، އެ ޓީމު މޮޅުވީ ތިން މެޗުންނެވެ.