ސައުތު އޭޝިއަން ޓޫރިސްޓުންނާގުޅޭ ކަންކަން ގާތުން ބަލާނެ: މިނިސްޓަރ
ބަންދުކުރުމަކީ ހައްލު ނޫން ކަމަށާއި، އެގޮތަށް އެކަންކުރަން ބޭނުންފުޅުވެސް ނުވާ ކަމަށް ވިދާޅުވި
ޓޫރިޒަމް މިނިސްޓަރ ޢަބްދުﷲ މަޢުޞޫމް
ސައުތު އޭޝިއަން ޓޫރިސްޓުންނާގުޅޭ ކަންކަން ގާތުން ބައްލަވަމުންދާނެ ކަމަށް ޓޫރިޒަމް މިނިސްޓަރ ޢަބްދުﷲ މަޢުޞޫމް ވިދާޅުވެއްޖެއެވެ.
ސައުތު އޭޝިއާއިން އަންނަ ފަތުރުވެރިންނަށް ރާއްޖެ ބަންދުކޮށްފައި އޮތުމަށް ފަހު ހުޅުވާލީ ބުރާސްފަތި ދުވަހުއެވެ. ސައުތު އޭޝިއާއަށް ރާއްޖެ ބަންދުކޮށްފައި އޮތީ ސަރަހައްދުގައި ވަރަށް ބޮޑަށް ޑެލްޓާ ވޭރިއަންޓް ފެތުރެމުންދާތީއެވެ. އެހެންނަމަވެސް ހުޅުވާލުމުން ގިނަ ބަޔަކު އަންނަނީ އެކަމާ ކަންބޮޑުވުން ފާޅުކުރަމުންނެވެ.
އެކަމާ ގުޅިގެން ޓޫރިޒަމް މިނިސްޓަރ ކުރެއްވި ޓުވީޓެއްގައި ވިދާޅުވީ ސައުތު އޭޝިއަން ޓޫރިސްޓުންނާގުޅޭ އިންތަކާއި މިންތައް ތަންފީޒު ކުރާމިންވަރު ބަލަން ހޮޓެލް/ގެސްޓްހައުސް ޓޫރިޒަމްޓީމުން ޗެކުކުރަމުންދާނެ ކަމަށެވެ. މިނިސްޓަރ ވިދާޅުވީ ބަންދުކުރުމަކީ ހައްލު ނޫން ކަމަށާއި، އެގޮތަށް އެކަންކުރަން ބޭނުންފުޅުވެސް ނުވާ ކަމަށެވެ. ނަމަވެސް ކަންކަން ޗެކުކުރާއިރު، މިންގަނޑުތަކަށް ނުފެތޭ ނަމަ ބަންދުކުރުން ނޫން ގޮތެއް ވެސް ނޯންނާނެ ކަމަށެވެ.
ދެކެނު އޭޝިއާގެ ފަތުރުވެރިންނަށް ރާއްޖެ އައުމުގެ ހުއްދަ ދީފައި މިވަނީ ޚާއްސަ އުސޫލެއްގެ ދަށުންނެވެ. އެސަރަހައްދުން ރާއްޖެ އަންނަ ފަތުރުވެރިންނަށް ހަމައެކަނި ރިސޯޓުތަކަށް ދިއުމުގެ ހުއްދަ ދިނުމަށް ނިންމާފައިވާއިރު، ގެސްޓް ހައުސްތަކަށް ދިއުމުގެ ހުއްދަ ލިބިގެންދާނީ ޖުލައި 30ން ފެށިގެންނެވެ. އޭގެއިތުރުން ދެކުނު އޭޝިއާގެ ޤައުމުތަކުން އަންނަ ފަތުރުވެރިންނަށް ޓްރާންސިޓް ކުރެވޭނީ ޓޫރިޒަމް މިނިސްޓްރީން ކަނޑައަޅާ ގެސްޓް ހައުސްތަކުގައި އެކަނި ކަމަށް ހެލްތް ޕްރޮޓެކްޝަން އެޖެންސީން ވަނީ ބުނެފައެވެ.
އެގޮތުން އެޗްޕީއޭއިން ވަކި ގޮތެއް އަންގަންދެން، މީހުން ދިރިއުޅޭ ރަށްރަށާއި އެ ރަށްރަށުގައި ހުންނަ ގެސްޓް ހައުސްތަކަށް ފަތުރުވެރިންނަށް ޗެކްއިން ނުވެވޭނެ ކަމަށާއި، މާލޭގައި ފަތުރުވެރިން ފުރުމަށްޓަކައި ޓްރާންސިޓް ކުރުމަށް ޓޫރިޒަމް މިނިސްޓްރީން ކަނޑައަޅާ އުސޫލުގެ މަތިން، އެ މިނިސްޓްރީން ކަނޑައަޅާފައިވާ ގެސްޓް ހައުސްތަކުގައި ތިބެވޭނެކަމަށް ވަނީ ބުނެފައެވެ.
ފަތުރުވެރިންނަށް ހުޅުވާލި ފުރަތަމަ ދުވަހު ވެސް ޑެލްޓާ ވޭރިއަންޓް އެންމެ ބޮޑަށް ފެތުރެމުން އަންނަ އިންޑިއާއިން 7 ފްލައިޓެއް ރާއްޖެ އައިސްފައިވެއެވެ. ޖުލައި 15 ވަނަ ދުވަހު ރާއްޖެ އައި 7 ފްލައިޓްގެ ތެރޭގައި ހިމެނެނީ މޯލްޑިވިއަންގެ 2 ފްލައިޓްގެ އިތުރުން އިންޑިގޯ 02 ފްލައިޓް އަދި ގޯ އެއަރގެ 03 ފްލައިޓެވެ. އަދި އެއަރ އިންޑިއާގެ ފްލައިޓްތައް މިމަހުގެ ފަހުކޮޅު ފަށާނެކަމަށް ލަފާކުރެވޭ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ޖެނެރަލް މެނޭޖަރ ކޯޕަރޭޓް އެފެއަރޒް ޙަސަން ޢަރީފް ވިދާޅުވިއެވެ.
