ރައްޔިތުންގެ ތެރެއިން ގިނަ ބަޔަކު މިހާރު ތިބީ ވަރަށް ބޮޑަށް މާޔޫސްވެފައި
އަބްދުﷲ ކަމާލުއްދީން - އައު ސިޔާސީ ޕާޓީއެއް އުފެއްދުމަށް ވަނީ ހުށަހަޅާފައި
އައު ގާނޫނު އަސާސީ އާއި ރައްޔިތުންނަށް ލިބިގެންދިޔަ ބާރާއެކު ޒަމާންވީ މައްސަލަތަކަށް ހައްލެއް ލިބިގެންދާނެކަމަށް ދެކެވަޑައިގެންނެވި ނަމަވެސް އެ މައްސަލަތައް ހައްލު ނުވެ ބޮޑުވަމުންދާކަމަށް އަބްދުﷲ ކަމާލުއްދީން ވިދާޅުވެއްޖެއެވެ.
ދައުލަތުގެ އިސްމަގާމުތަކެއް ފުރުއްވާފައިވާ އަދި އައު ސިޔާސީ ޕާޓީއެއް އުފެއްދެވުމަށް މަސައްކަތް ކުރައްވަމުން ގެންދަވާ އަބްދުﷲ ކަމާލުއްދީން މިހެން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުންނެވެ.
އަބްދުﷲ ކަމާލުއްދީން ވިދާޅުވީ ގައުމުގައި ބޮޑެތި މައްސަލަތައް އެބަހުރި ކަމަށާއި، މިހާރު މި ފެނިވަޑައިގަންނަވާ މައްސަލަތަކަކީ ކުރިން ވެސް ހުރި މައްސަލަތައް ކަމަށެވެ. އަދި އެންމެން ވެސް އުއްމީދުކޮށްގެން ތިބީ އައު ގާނޫނު އަސާސީއެއް ލިބި ބާރުތައް ވަކިކުރެވުމުން އަދި ރައްޔިތުންނަށް އައު ހައްގުތަކާއި ބާރު އިތުރުވެގެން ދިޔުމުން މައްސަލަތައް ހައްލުކުރެވިގެން ދާނެކަމަށެވެ.
އެހެންނަމަވެސް ފެނިވަޑައިގަންނަވަނީ އެ މަންޒަރެއް ނޫން ކަމަށާއި، ފެނިވަޑައިގަންނަވަނީ ގައުމުގެ ހުރި މައްސަލަތައް ބޮޑުވެގެންދާތަން ކަމަށެވެ. މީގެ އިތުރުން ރައްޔިތުންގެ ތެރެއިން ގިނަ ބަޔަކު މިހާރު ތިބީ ވަރަށް ބޮޑަށް މާޔޫސް ވެފައި ކަމަށާއި، މިކަންކަން ހައްލު ނުކުރެވިގެން ދާ ދިއުމުގައި ރައްޔިތުން ތިބީ ފިކުރު ބޮޑުވެފައި ކަމަށް އަބްދުﷲ ކަމާލުއްދީން ވިދާޅުވިއެވެ. އަބްދުﷲ ކަމާލުއްދީން ވިދާޅުވީ މި މައްސަލަތައް ދިގުލައިގެން ދާތީ ރައްޔިތުންގެ ހާސްކަން އެބައޮތް ކަމަށެވެ.
އަބްދުﷲ ކަމާލުއްދީން ވިދާޅުވީ ކޮންމެ ދިވެއްސެއްގެ ވެސް ހިތާއި އެންމެ ކައިރިން ކުޅޭނީ އިސްލާމްދީން ކަމަށާއި، މިތަނުގައި އިސްލާމްދީން އޮންނާން ބޭނުންނުވާ ބަޔަކު އުޅޭނެކަމަށް ހީނުކުރައްވާ ކަމަށެވެ. އަދި ޓުވިޓާ އެއްޗެހި ބަލާލީމާ ފެނިވަޑައިގަންނަވަނީ އިސްލާމްދީނުގެ މައްސަލައިގައި އެކަކު އަނެކަކާއި ޒުވާބުކޮށް ހަމައަކަށް ނޭޅި ހައްލެއް ނުހޯދިގެންދާތަން ކަމަށެވެ. އަދި އެއީ ކިހާ ބޮޑު މައްސަލަތަކެއްތޯ އޭ ވިދާޅުވެ އަބްދުﷲ ކަމާލުއްދީން ސުވާލު އުފެއްދެވިއެވެ.
އަބްދުﷲ ކަމާލުއްދީން ވިދާޅުވީ ދިވެހިރާއްޖެއަކީ މާއްދީގޮތުން ވަރަށް މުއްސަދި ގައުމެއް ކަމަށާއި، އެކަމަކު ދައުލަތެއް، ރައްޔިތުންނެއް މުއްސަނދި ނުވާކަމަށެވެ. އަދި ސުވާލު އުފައްދަވަމުން އަބްދުﷲ ކަމާލުއްދީން ވިދާޅުވީ އެހީ ކިހިނެއްވީ ކަމެއްތޯ ކަމަށާއި، އަޅުގަނޑުމެންގެ އިޖްތިމާއީ ހަޔާތް ކޮބައިތޯ ވިދާޅުވެފައެވެ.
އަބްދުﷲ ކަމާލުއްދީން ވިދާޅުވީ ގައުމުގައި ހުރި ކަންކަން ހައްލުކުރެއްވުމަށް އައު ސިޔާސީ ފިކުރެއް އަދި ފަލްސަފާއެއް ނެރެގެން ރައްޔިތުން އެއަށް ކޮންޓްރިބިއުޓްކުރާނެ ގޮތަށް މަސައްކަތް ކުރާނެ ފުރުސަތު ވަރަށް ބޮޑަށް އެބައޮތް ކަމަށެވެ.
