ޖެހިޖެހިގެން ހަތަރު ދުވަހު, ދުވާލެއްގެ މައްޗަށް ފެންނަ ކޮވިޑް ކޭސްތަކުގެ އަދަދު 100ން ދަށުގައި ހުރުމަށްފަހު ފާއިތުވި 24 ގަޑިއިރު ތެރޭގައި އެއަދަދު 100ން މައްޗަށް ޖެހިލައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެ ފަހުން ހާމަކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ކޮވިޑް-19ށް ޕޮޒިޓިވްވެފައިވަނީ 170 މީހުންނެވެ. މީގެތެރެއިން މާލެ ސަރަހައްދުން ޕޮޒިޓިވްވެފައިވަނީ 19 މީހުންނެވެ. އަތޮޅުތެރެއިން 78 މީހުން ޕޮޒިޓިވްވެފައިވާއިރު ރިސޯޓްތަކުން 7 މީހުން ވަނީ ކޮވިޑަށް ޕޮޒިޓިވްވެފައެވެ. އަދި ލިވްއެބޯރޑްތަކުން އެކަކު ވަނީ ޕޮޒިޓިވްވެފައެވެ. ހަދަމުންދާ ރިސޯޓެއް ކަމުގައިވާ ރަށްފަޅުހުރާއިން 60 މީހުންވަނީ ކޮވިޑަށް ޕޮޒިޓިވްވެފައެވެ. މިއީ ކުރިންވެސް ކޮވިޑްގެ ކޭސްތަކެއް ފެނިފައިވާ ރަށެކެވެ. މީގެއިތުރުން އިންޑަސްޓްރިއަލް ރަށްތަކުން 5 މީހަކު ވަނީ ޕޮޒިޓިވްވެފައެވެ.

ރާއްޖެއިން މިހާތަނަށް 75،332 މީހުން ކޮވިޑަށް ޕޮޒިޓިވްވެފައިވާއިރު 72،569 މީހުން ވަނީ ބަލިން ވަނީ ރަނގަޅުވެފައެވެ. މިހާރު ކޮވިޑަށް ފަރުވާ ހޯދަމުންދަނީ 2،537 މީހުންނެވެ. މީގެތެރެއިން ހޮސްޕިޓަލްގައި 17 މީހުންނަށް އަންނަނީ ފަރުވާދެމުންނެވެ.

ރާއްޖެއިން މިހާތަނަށް މިބަލީގައި 214 މީހަކު ވަނީ ނިޔާވެފައެވެ.

ކޮވިޑް-19ގެ ހަތަރު ވަނަ ރާޅަށް ފަހު ރާއްޖޭގައި ކޮވިޑްގެ ކޭސްތައް ފެންނަ މިންވަރު މިހާރު އަންނަނީ ދަށްވަމުންނެވެ. އެގޮތުން ޖޫން މަހުގެ 28 ވަނަ ދުވަހުން ފެށިގެން ދުވާލެއްގެ މައްޗަށް ފެންނަ ކޭސްތަކުގެ އަދަދު 200ން ދަށުގައި ހުރުމަށްފަހު، ގާތްގަނޑަކަށް 3 މަސް ފަހުން، ޖުލައި މަހުގެ 9 ވަނަ ދުވަހު، ވަނީ ދުވާލެއްގެ މައްޗަށް ފެންނަ ކޭސްތަކުގެ އަދަދު 100އިން ދަށްވެފައެވެ. ޖުލައި މަހުގެ 9 ވަނަ ދުވަހު ކޮވިޑަށް ޕޮޒިޓިވްވެފައިވަނީ 55 މީހުންނެވެ. ޖުލައި މަހުގެ 10 ވަނަ ދުވަހު 90 މީހުން ޕޮޒިޓިވްވެފައިވާއިރު 11 ވަނަ ދުވަހު ޕޮޒިޓިވްވީ 78 މީހުންނެވެ. އަދި 12 ވަނަ ދުވަހު 91 މީހުން ވަނީ ކޮވިޑަށް ޕޮޒިޓިވްވެފައެވެ.

ކޮވިޑްގެ 4 ވަނަ ރާޅަށްފަހު ފިޔަވަޅުތަކަށް ލުއި ދެމުން އައިސް ޖުލައި މަހުގެ 7 ވަނަ ދުވަހު ވަނީ ބޮޑެތި ހުރިހާ ލުއިތަކެއް ދީފައެވެ. އެގޮތުން 2 ޑޯޒް ފުރިހަމަކޮށްފައިވާ މީހުންނަށް، މޮނިޓަރިންގެ ހާލަތުގައި ނެތް ރަށްރަށަށް ކަރަންޓީނާ ނުލައި ދަތުރުކުރެވުމާއި، ރިސޯޓްތަކުގެ މުވައްޒަފުންގެ ތެރެއިން 2 ޑޯޒް ފުރިހަމަކޮށްގެން ތިބި މުވައްޒަފުންނަށް ރަށްރަށަށް ދެވޭގޮތަށް ވަނީ ލުއި ދީފައެވެ.

މާލޭގެ ކާފިއު އުވާލާފައިވާއިރު، ޖިމްތަކާއި ސެލޫންތަކާއި ކުޅިވަރު މައިޒާންތައް ހުޅުވާލައި ވިޔަފާރިތައް ހުޅުވައިގެން ޚިދުމަތް ދިނުމަށް ވަނީ ހުއްދަ ދީފައެވެ.