ވޭތުވެދިޔަ 24 ގަޑިއިރު ތެރޭގައި ޕޮޒިޓިވްވީ 91 މީހުން
12 ޖުލައި 2021 | ހޯމަ 17:51ބަލި ޖެހުނު މީހުންގެ ޖުމުލަ މިހާރު މިވަނީ 75162ށް އަރާފައި
މާލޭގެ ބޭރު މަގުގައި އާންމުން ހަރަކާތްތެރިވަނީ
ފާއިތުވި 24 ގަޑިއިރު ތެރޭގައި ރާއްޖެއިން ކޮވިޑް-19އަށް ޕޮޒިޓިވްވެފައިވަނީ 91 މީހުންކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ހާމަކޮށްފައިވާ ތަފާސްހިސާބުތަަކަށް ބަލާއިރު ފާއިތުވި 24 ގަޑިއިރު ތެރޭގައި 7999 ސާމްޕަލް ނަގާފައިވާއިރު ޕޮޒިޓިވްވެފައިވަނީ 91 މީހުންނެވެ. އެއީ މާލެ ސަރަހައްދުން ޕޮޒިޓިވްވެފައިވާ 23 މީހުންނާއި، އަތޮޅުތެރެއިން ޕޮޒިޓިވްވި 61 މީހުންނާއި އަދި ހިންގަމުންދާ ރިސޯޓްތަކުން 7 މީހުންނެވެ.
ރާއްޖޭގައި މިވަގުތު 2497 މީހުން އަންނަނީ ބައްޔަށް ފަރުވާ ހޯދަމުންނެވެ. މީގެތެރެއިން 15 މީހުންނަށް އަންނަނީ ހޮސްޕިޓަލްގައި ފަރުވާދެމުންނެވެ. ބަލި ޖެހުނު 75162 މީހުންގެ ތެރެއިން 72439 މީހުން ބަލިން ރަނގަޅުވެފައިވާއިރު 214 މީހަކު ވަނީ ބަލީގައި ނިޔާވެފައެވެ.
ކޮވިޑްގެ 4 ވަނަ ރާޅަށްފަހު، އަޅާފައިވާ ފިޔަވަޅުތަކަށް ލުއި ދެމުން އައިސް ޖުލައި މަހުގެ 7 ވަނަ ދުވަހު ވަނީ ބޮޑެތި ހުރިހާ ލުއިތަކެއް ދީފައެވެ. އެގޮތުން 2 ޑޯޒް ފުރިހަމަކޮށްފައިވާ މީހުންނަށް، މޮނިޓަރިންގެ ހާލަތުގައި ނެތް ރަށްރަށަށް ކަރަންޓީނާ ނުލައި ދަތުރުކުރެވުމާއި، ރިސޯޓްތަކުގެ މުވައްޒަފުންގެ ތެރެއިން 2 ޑޯޒް ފުރިހަމަކޮށްގެން ތިބި މުވައްޒަފުންނަށް ރަށްރަށަށް ދެވޭގޮތަށް ވަނީ ލުއި ދީފައެވެ.
މާލޭގެ ކާފިއު އުވާލާފައިވާއިރު، ޖިމްތަކާއި ސެލޫންތަކާއި ކުޅިވަރު މައިޒާންތައް ހުޅުވާލައި ވިޔަފާރިތައް ހުޅުވައިގެން ޚިދުމަތް ދިނުމަށް ވަނީ ހުއްދަ ދީފައެވެ.
