ދިވެހި ގައުމިއްޔަތަށް 895 އަހަރު ވެއްޖެއެވެ.

ގައުމީ ދުވަަހަކީ ގައުމީގޮތުން އެންމެ މުހިންމު ދުވަހެވެ. އެދުވަހެއްގެ ވާހަކަ ތާރީޚާއެކު ގާނޫނުއަސާސީގައި ކަނޑައެޅި ބަޔާންވެގެންވާ ދުވަހެވެ. ވީމާ، މިއަދު ގައުމީ ދުވަހާއި މުނާސަބު އެހެންނަމަވެސް "ރަހަތަފާތު" ގޮތަކަށް ދުވަހާއި މުނާސަބު، މުހިންމުކަމަށް ފެންނަ، ދެކަމަކަަށް ނުވަތަ ތިން ކަމަކަށް އަލިއަޅުވާލަމާތޯއެވެ.

އެއްކަމަކީ ދިވެހި ގައުމަށް ކިތައް އަހަރު ވެއްޖެ ހެއްޔެވެ؟ އިސްލާމީ ދިވެހި ގައުމިއްޔަތަށް ހިޖުރައިން 548ވަނަ އަހަރުން ފެށިގެން މިވީ 895 އަހަރެވެ. ބޮޑުތަކުރުފާނު އިސްވެ ހުންނަވައިގެން، ޕޯޗުގީޒުންގެ އަޅުވެތި އަނިޔާވެރި އިސްތިއުމާރުން އިސްލާމް ދިވެހި ގައުމިއްޔަތު ސަލާމަތްކޮށްދެއްވައި، ދިވެހި ގައުމަށް ނަސްރާއި ނަސީބާއި ކާމިޔާބު ހޯއްދަވައި ދެއްވި، ފަޚުރުވެރި ގައުމިއްޔަތުގެ ފެށުން ކަމުގައިވި 1 ރަބީއުލްއައްވަލު 981ން ފެށިގެން މިވީ 462 އަހަރެވެ.

1 ރަބީއުލްއައްވަލު 1365 (4 ފެބުރުވަރީ 1946)ގައި، ސުމުއްވުލް އަމީރު މުހައްމަދު އަމީނު ދޮށިމޭނާކިލެގެފާނުގެ ވެރިކަމުގައި ދިވެހިރާއްޖޭގައި އެންމެ ފުރަތަމަ ގައުމީ ދުވަހެއް ފާހަގަ ކުރެވުނުތާ މިވީ 78 އަހަރެވެ. 1 ރަބީެުލްއައްވަލު 1365ގައި ފާހަގަ ކުރެވުނު، ދިވެހިރާއްޖޭގެ ގައުމީ ދުވަހުގެ ރަސްމީ ޖަލްސާއަކީ ގައުމީ ސަލާމް ފުރަތަަމަ ތައާރަފުވި ރަސްމިއްޔާތު ނުވަތަ އިހުތިފާލެވެ. ވީމާ، ގައުމީސަލާމް ތައާރަފުވިތާ ހިޖުރީގޮތުން 79 އަހަރުވީއެވެ.

އަނެއް ކަމަކީ ބޮޑުތަކުރުފާނުގެ ރަސްކަމުގައި އެ ރަސްކަމުގެ ނަންފުޅުގައި ތަކުރުފާނު ކިޔާފައިވޭ ހެއްޔެވެ؟ ނުވަތަ އެގޮތް ރަނގަޅު ހެއްޔެވެ؟ ސަގާފީ މިސާލެކެވެ. ކަލޭފާނަށްވުރެ ތަކުރުފާނު މައްޗެވެ. ތަކުރުފާނަށްވުރެ މަނިކުފާނު މައްޗެވެ. މަނިކުފާނަށްވުރެ ކިލެގެފާނު މައްޗެވެ. ކިލެގެފާނަށްވުރެ ރަސްގެފާނު މައްޗެވެ. މިގޮތުން ބަލާއިރު، 1 ރަބީއުލްއައްވަލު 981 (1573) އިން 1 ރަމަޟާން 993 (1585) އަށް ރަސްކަން ކުރެއްވީ، ތަކުރުފާނުގެ ނަމަކު ނޫނެވެ. ތަކުރުފާނުގެ (އުތީމު މުހައްމަދު ތަކުރުފާނުގެ) ނަމުގައި އަދި މަނިކުފާނުގެ (މުލީގޭ ދޮން ހަަސަން މަނިކުފާނުގެ) ނަމުގައި ރަސްކަމެއް ނުކުރެއެވެ!

އައްސުލްތާނުލް ޣާޒީ މުހައްމަދު އަލްއައުޒަމް ސިރީ ސަވާދީއްތަ މަހާރަދުންނެވެ. ޣާޒީ ބަންޑާރައިންނެވެ. އުތީމު ބަންޑާރައިންނެވެ. އުތީމު މަހާރަދުންނެވެ. އުތީމު ހަސަން ތަކުރުފާނު، އަލްއަމީރު ހަސަން ރަންނަބަނޑޭރި ކިލެގެފާނުގެ ނަންފުޅު ކަމުގައެވެ. ވީމާ، ގައުމީ އެންމެ މަތިވެރި ބަތަލު، ޣާޒީ ބަންޑާރައިން ނުވަތަ އުތީމު ބަންޑާރައިންގެ ދަރަޖަ ދަށް ނުކުރެވޭނެއެވެ.

އުތީމުން ތިންޒުވާނުން ހިންމަތާއެކު ކޮށްލި މިންނަތަކުން, އޮތީ މުސްތައުމިރުންގެ އެބާރުތައް އުއްޑުން ޖެހެވިފައިތާ!

ދެ ހާޖީންނާއި ދަންޑެހެލާ ގޮވައިގެން އެއިގެ ތިން ބަޠަލުން, ޖިހާދު ކުރައްވަމުން ގެންދެވި ގޮތީ ގައުމީ މިސާލެއްތާ!

އުތީމު މަހާރަދުންނަށް ދެންނެވުން ޝުކުރާއި ތައުރީފާ, އޮތީ ދިވެހީންގެ މައްޗަށް ވާޖިބެއް ކަމުގައި ހިމެނިފައިތާ!