އިނގިރޭސިވިލާތުގެ ހިއުމަން ރައިޓްސް ޕްރިޔޯރިޓީ ލިސްޓުން ރާއްޖެ އުނިކޮށްފި
ހިއުމަން ރައިޓްސް ޕްރިޔޯރިޓީ ލިސްޓުން ރާއްޖެ އުނިކުރުމުން ދެ ގައުމުގެ ދެމެދު އޮންނަ ގުޅުން އިތުރަށް ހަރުދަނާކުރުމަށް މަގުފަހިވެގެންދާނެ
މާލޭގެ މަގުމަތި
ރާއްޖޭގައި އިންސާނީ ހައްޤުތަކުގެ ހާލަތު ރަނގަޅުކޮށް، އިންސާނީ ހައްޤުތައް ކުރިއަރުވަން ކުރަމުންދާ މަސައްކަތް އިނގިރޭސިވިލާތުން ބަލައިގަނެ، އެ ގައުމުގެ ހިއުމަން ރައިޓްސް ޕްރިޔޯރިޓީ ލިސްޓުން ރާއްޖެ އުނިކޮށްފިއެވެ.
އިނގިރޭސިވިލާތުން ޤައުމުތަކާއެކު ވިޔަފާރި އަދި އެހެނިހެން ގުޅުންތައް ބޭއްވުމުގައި އެ ގައުމެއްގެ އިންސާނީ ހައްޤުތަކުގެ ހާލަތުގެ މައްޗަށް ރިޢާޔަތްކުރާއިރު، މި އަހަރުގެ ޔޫކޭ ހިއުމަން ރައިޓްސް އެންޑް ޑިމޮކްރަސީ ރިޕޯޓްގެ ހިއުމަން ރައިޓްސް ޕްރިޔޯރިޓީ ލިސްޓުން ރާއްޖެ އުނިކުރުމުގެ ސަބަބުން ރާއްޖެއާއި އިނގިރޭސިވިލާތާ ދެމެދު އޮންނަ ގުޅުން އިތުރަށް ހަރުދަނާކުރުމަށް މަގުފަހިވެގެންދާނެއެވެ.
އިންސާނީ ހައްޤުތައް ހިމާޔަތްކޮށް ކުރިއެރުވުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހްގެ ޚާރިޖީ ސިޔާސަތުގެ މައި އެއް ތަނބެއެވެ. ރައީސް ޞާލިހްގެ ސަރުކާރުން އިންސާނީ ހައްޤުތަކުގެ ދާއިރާއިން ހޯދާފައިވާ ކުރިއެރުން އދ.ގެ ސެކްރެޓަރީ ޖެނެރަލް އެންޓޯނިއާ ގުޓަރޭސް އަދި އިންސާނީ ހައްޤުތަކާ ބެހޭ އދ.ގެ ހައިކޮމިޝަނަރ މިޝޭލް ބެޝެލޭ ވަނީ ފާހަގަކުރައްވާފައެވެ.
ރާއްޖޭގެ އިތުރުން ބުރުންޑީ މި ލިސްޓުން އުނިކޮށްފައިވާއިރު، ބެލަރޫސް، މާލީ އަދި ނިކަރާގުއާ ވަނީ މި ލިސްޓަށް އިތުރުކޮށްފައެވެ.
