ދާދިފަހުން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ މެމްބަރުކަމަށް އައްޔަން ކުރެއްވި މުހައްމަދު ޒާހިދު އެ ކޮމިޝަންގެ ނާއިބު ރައީސް ކަމުގެ މަގާމަށް އައްޔަން ކުރެއްވުމަށްޓަކައި ރައްޔިތުންގެ މަޖިލީހުގެ ރުހުން ހޯދުމަށް ފޮނުއްވައިފި އެވެ.
މިކަން ހޯމަ ދުވަހުގެ ޖަލްސާއަށް ވަނީ އެޖެންޑާކޮށްފަ އެވެ.
މީގެކުރިންވެސް އެޗްއާރުސީއެމްގެ މެމްބަރުކަން ކުރައްވާފައިވާ ޒާހިދު އެ ކޮމިޝަންގެ މެމްބަރު ދެ ވަނަ ފަހަރަށް އައްޔަން ކުރުމަށް ރައްޔިތުންގެ މަޖިލީހުން ފާސްކޮށްފައި ވަނީ ޖޫން މަހުގެ 13 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި 57 މެމްބަރުންގެ އަޣްލަބިއްޔަތުންނެވެ.
ރައްޔިތުންގެ މަޖިލީހުން އެގޮތަށް ފާސްވުމާއި ގުޅިގެން ރައީސް ޔާމީން، އެޗްއާރުސީއެމްގެ މެމްބަރުކަމަށް ޒާހިދު އައްޔަން ކުރައްވާފައިވަނީ ޖޫން މަހުގެ 15 ވަނަ ދުވަހު އެވެ.
އެޗްއާރުސީއެމްގެ މެމްބަރުކަމަށް ޒާހިދު އައްޔަން ކުރެއްވުމުގެ ކުރިން ހުންނެވީ ޖެންޑަރ މިނިސްޓްރީގެ ޑެޕިއުޓީ މިނިސްޓަރުގެ މަގާމުގަ އެވެ.
