އެމްޑީޕީގެ ޕީޖީގައި ތިބީ 65 ފިނޑިން- މީކާއީލް
8 ޖުލައި 2021 | ބުރާސްފަތި 14:04ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީގެ) މެމްބަރެއްގެ ހައިސިއްޔަތުން ލަދުގަނޭ
މީކާއިލް ނަސީމް / ގަލޮޅު ދެކުނު ދާއިރާގެ މެންބަރު
ރައްޔިތުންގެ މަޖިލީހުގައި ތިބީ އެމްޑީޕީގެ 65 ފިނޑިން ކަމަށް ގަލޮޅު ދެކުނު ދާއިރާގެ މެންބަރު މީކާއީލް ނަސީމް ވިދާޅުވެއްޖެއެވެ.
ސަރުކާރުގެ ފަރާތުން، ތުޅާދޫ ދާއިރާގެ މެންބަރު ޙިސާން ޙުސައިން ހުށަހެޅުއްވި، ޤާނޫނުލްޢުޤޫބާތަށް އިސްލާހު ގެނައުމުގެ ބިލުގެ ރިޕޯޓަށް ބަހުސް ކުރައްވަމުން މީކާއީލް ވިދާޅުވީ، ސަރުކާރުގެ ފަރަތުން އެ ބިލުގެ ދިފާއުގައި އެއްވެސް އެއްޗެއް ވިދާޅުނުވާތީ އެކަމާ ކަންބޮޑުވާ ކަމަށެވެ.
މީކާއީލް ވިދާޅުވީ، އެ ބިލަކީ ސަރުކާރުގެ ކޯލިޝަންގައި ހިމެނޭ ހުރިހާ ޕާޓީއެއްގެ ބިލެއް ކަމަށެވެ. ބިލު ރައްޔިތުންގެ މަޖިލީހަށް ހުށަހެޅުނީ ހަމަ ކުއްލިއަކަށް ނޫން ކަމަށާއި، އެކަމުގައި އެތައް ބައިވަރު ސަބަބުތަކެއް އެބަހުރި ކަމަށެވެ. އަދި މިއީ ދީނާ ގުޅުވައި ނަފްރަތު އުފެއްދައި، މީހުން މަރައި، މީހުން ގެއްލުވައި، މި ގައުމުގައި މިއީ ބިރުވެރި ތަނަކަށް ހަދާފައިވާ އޮތް އޮތުން ނައްތާލުމަށް ހުށަހެޅިފައިވާ ބިލެއް ކަމަށެވެ.
އެހެންނަމަވެސް ބިލު މަޖިލީހަށް ހުށަހެޅުމަށްފަހު ދެން ކަންތައް ވެގެންދިޔަ ގޮތަކީ، ދިވެހި ރައްޔިތުންގެ ޑިމޮކްރެޓީކް ޕާޓީ، އެމްޑީޕީގެ މެމްބަރެއްގެ ހައިސިއްޔަތުން ލަދުގަންނަ ކަމެއް ކަމަށެވެ.
މީކާއިލް ވިދާޅުވީ، ސަރުކާރުގެ ފަރާތުން ބިލު ހުށަހެޅުމުން ސަރުކާރުން ބިލު ދިފާއު ކުރައްވާތަން ނުފެންނަ ކަމަށެވެ. މީކާއީލް ވިދާޅުވީ، އެމްޑީޕީގެ މުޅި ލީޑަރޝިޕް އެއްކޮށް މަޖީދީ މަގުގައި ރިލްވާންގެ އާއިލާއާއެކު އެކި މަގުގައި ބެނާއެއް ހިފައިގެން ދުލެއް ނުކުރާނަމޭ ބުނެ ހިނގިތާ އަދި މާގިނާ ދުވަހެއް ނުވެ މިފެންނަނީ ދޫކޮށްލިތަން ކަމަށެވެ. ދޫކޮށްލީ އެކަނި ނޫން ކަމަށާއި، ބިލުގެ ދިފާއުގައި ވާހަކަދައްކާ މެންބަރުން މަރަން ހުށަހެޅުނު އިރުވެސް ސަރުކާރު އޮތީ ހަނު އޮތުމަކީ ލަދުވެތި ކަމެއް ކަމަށް މީކާއީލް ވިދާޅުވިއެވެ.
މީކާއިލް ވިދާޅުވީ، ލާދީނީ ޓެގް ހުއްދަކުރަން ބިލާ ދެކޮޅަށް އެމްޑީޕީ ބަޔަކު ނުކުތުމަކީ ލަތުވެތި ކަމެއް ކަމަށާއި، ބިލާ ދެކޮޅަށް ވާހަކަ ދައްކައި، ބިލު ބޭރުކޮށްލުމަށްފަހު އެމްޑީޕީގެ ސުޕަރ މެޖޯރިޓީއޭ ކިޔާ މެންބަރުން ރިލުވާނޭ ކިޔައިގެން ނުވާނެ ކަމަށެވެ.
ބިލުގައި ދީނާ ދެކޮޅު އެއްވެސް ވާހަކައެއް ނެތް ކަމަށް މީކާއިލް ވިދާޅުވިއެވެ. ޤާނޫނުލް ޢުޤޫބާތަށް އިސްލާހު ގެނައުމުގެ ބިލު އަލުން ދިރާސާކޮށް ގޮތެއް ނިންމުމަށް އަނބުރާ ޖުޑިޝަރީ ކޮމިޓީއަށްވަނީ ފޮނުވާލާފައެވެ.
