ކުޑަކުދިން ކޮވިޑްގެ ހައި ރިސްކަށް: ޚިދުމަތްދޭ އެންމެން ވެކްސިންޖަހަންޖެހޭނެ!
ކުޑަކުދިން ހައި ރިސްކަށް ލާފައިވަނީ އެކުދިންނަށް ޖެހޭނެ ވެކްސިނެއް އަދި ލިބިފައި ނެތުމުން
ޤުރުއާން ކްލާހެއްގައި ކިޔަވައިދެނީ
ކުޑަކުދިންގެ ޓިއުޝަން ކްލާސްތަކާއި، ޤުރުއާން ކްލާސްތައް އަދި ޑޭ ކެއަރ ސެންޓަރުތަކުން ޚިދުމަތް ދެވޭނީ ހުރިހާ މުއައްޒަފުން ވެކްސިންގެ ޑޯޒް ހަމަކުރުމަށްފަހު ކަމަށް ކަނޑައަޅައިފިއެވެ.
ބުދަ ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ރައީސް އޮފީހުގެ ތަރުޖަމާނު މަބްރޫކް ޢަޒީޒް ވަނީ މާލެ ސަރަހައްދުން ފެންނަމުންދާ ކޭސްތަކުގެ އަދަދު ވަރަށް ބޮޑަށް ދަށަށްދާން ފެށުމާ ގުޅިގެން ގިނަ ލުއިތަކެއް ދޭން ނިންމާފައިވާކަން ހާމަކުރައްވާފައެވެ. އެގޮތުން މާލޭ ސަރަހައްދުގެ ކާފިއު އުވާލުމާއި، ކެފޭ/ރެސްޓޯރެންޓް ހިންގުމުގައި އަމަލުކުރާ އުސޫލަށްވެސް ބޮޑެތި ބަދަލުތަކެއް ވަނީ ގެންނަވާފައެވެ.
މި މޭރުމުން ވާހަކަދައްކަވަމުން މަބްރޫކް ވަނީ ކޮވިޑްގެ ވެކްސިން ލިބި އަދި މިހާރު މެދު ކެނޑުމެއްނެތި ވެކްސިން ޖެހޭނެކަމުގެ ޔަޤީންކަން ލިބުމާއެކު، މި ވެކްސިންގެ ސަބަބުން އާބާދީގެ ބޮޑުބަޔަކަށް ރައްކާތެރިކަން ކަށަވަރުވާނެކަމަށެވެ. އެހެންނަމަވެސް، 18 އަހަރުން ދަށުގެ ކުޑަކުދިންނަށް ވެކްސިން ދިނުމުގައި އަދި މިހާތަނަށް ރައްކާތެރި މިންގަނޑެއް ފެނިފައި ނެތުމުން މި ކުދިންނަށް ވެކްސިން ޖެހިފައި ނެތްކަން މަބްރޫކް ފާހަގަކުރެއްވިއެވެ. މި ސަބަބަށްޓަކައި މަބްރޫކް ވަނީ ކުޑަކުދިންނަކީ ބަލީގެ ހައި ރިސްކް ލެވެލްގައި ތިބޭނެ އުމުރުފުރާކަމަށް ވިދާޅުވެފައެވެ.
ކުޑަ ކުދިންގެ ރައްކާތެރިކަން ކަށަވަރުކުރެވޭނީ ބާކީ ތިބި އެންމެން ރައްކާތެރިކަމުގެ މިންގަނޑުތަކަށް ސަމާލުވެ، އެކަންކަމަށް އަމަލުކޮށް އަދި ވެކްސިންގެ ޑޯޒް ހަމަކޮށްގެންކަމަށް ވިދާޅުވިއެވެ. މި ސަބަބަށްޓަކައި ކުޑަކުދިންނަށް ހިދުމަތްދޭ ޓިއުޝަން ކްލާސްތަކާއި، ޤުރުއާން ކްލާސްތައް އަދި ޑޭ ކެއަރ ސެންޓަރުތަކުން ޚިދުމަތްދޭން ފެށޭނީ އެތަނެއްގެ ހުރިހާ މުއައްޒަފުން ވެކްސިންގެ ޑޯޒް ހަމަކުރުމަށްފަހުކަމަށް ވިދާޅުވިއެވެ. އަދި އެ ސެންޓަރުތައް ހިންގުމަށް ޚާއްސަ އުސޫލެއް ވާކަމަށާއި، އޭގެ ތަފުސީލު ފަހުން އާންމުކުރައްވާނެކަމަށް ވިދާޅުވިއެވެ.
މަބްރޫކް ވަނީ މިއިން އެއްވެސް ސެންޓަރެއްގައި ބިދޭސީ ޓީޗަރަކު ނުވަތަ މުއައްޒަފަކު ބޭރުން އަންނަ ނަމަ މީހުން ދިރިއުޅޭ ގެއެއްގައި ކަރަންޓީން ނުވެވޭނެކަމަށް ވިދާޅުވެފައެވެ. އަދި މިފަދަ ފަރާތްތަކުން ކަރަންޓީންވުމަށް އެޗްޕީއޭއިން ވަކި ތަންތަން ހަމަޖައްސައިދޭނެކަމަށްވެސް ވިދާޅުވިއެވެ.
މިދިޔަ އަހަރުގެ ދިރާސީ އަހަރުގެ ކިޔެވުން ޖޫން 24 ވަނަ ދުވަހު ނިންމާލިއިރު، މިދިޔަ އަހަރާއި މިއަހަރު ވެފައިވަނީ ތަޢުލީމީ ދާއިރާގައި ގިނަ ދަތިތަކަކާއި ކުރިމަތިލާން ޖެހުނު އަހަރަކަށެވެ. ދަރިވަރުންނާއި މުދައްރިސުންނާއި އަދި ބެލެނިވެރިންވެސް މީގެ ކުރިން ތަޖުރިބާ ކުރަން ނުޖެހޭ ފަދަ ކަންކަން ތަޖުރިބާ ކުރަން ޖެހުނު އަހަރަކެވެ. 2021 ވަނަ އަހަރުގެ ދިރާސީ އަހަރުގެ ކިޔެވުން ފެށުމަށް ހަމަޖެހިފައިވަނީ އޯގަސްޓް މަހުގެ 10 ވަނަ ދުވަހުގައެވެ.
