ކޮވިޑް-19ގައި މަރުވި މީހުންގެ އަދަދު ހަތަރު މިލިއަނަށްވުރެ މައްޗަށް އަރައިފިއެވެ.

ވޯލްޑޮމީޓަރސްގެ ތަފާސް ހިސާބުތައް ދައްކާގޮތުން ޖުލައި 6 ވަނަ ދުވަހުގެ މެންދުރާ ހަމައަށް 4,003,010 މީހުން ވަނީ ކޮވިޑް-19 ޖެހިގެން މަރުވެފައެވެ. އަދި މިމުއްދަތާ ހަމައަށް 185,045,443 މީހުން ވަނީ ކޮވިޑަށް ޕޮޒިޓިވްވެފައެވެ.

ބަލިޖެހިގެން ރަނގަޅުވި މީހުންގެ އަދަދު 169,387,201ށް އަރާފައިވާއިރު، މިވަގުތު ބައްޔަށް ފަރުވާހޯދަމުން ދަނީ 11,655,232 މީހުންނެވެ. އޭގެ ތެރެއިން 77,815 މީހުންގެ ހާލަތު ސީރިއަސްއެވެ. އަދި އާންމު ހާލަތުގައި ފަރުވާދެމުން ދަނީ 11,577,417 މީހުންނަށެވެ.

މިހާތަނަށް އެންމެ ގިނަ ކޭސް އެމެރިކާއިން ރިޕޯޓްކޮށްފައިވާއިރު، އެއީ 34,598,361 ޕޮޒިޓިވް ކޭސްއެވެ. އެގައުމުން ބަލި ޖެހުނު 621,335 މީހުން ވަނީ މަރުވެފައެވެ. ދެވަނަ އަށް އެންމެ ގިނަ މީހުން ބައްޔަށް ޕޮޒިޓިވްވެފައިވާ އިންޑިއާއިން 30,619,932 ކޭސް ރިޕޯޓްކޮށްފައިވާއިރު، 403,310 މީހުން ވަނީ ބަލީގައި މަރުވެފައެވެ. އަދި އެންމެ ގިނަ އަދަދެއް ބަޔަކު ކޮވިޑް-19ގައި މިހާތަނަށް މަރުވެފައި ވަނީ ބްރެޒިލްގައެވެ. އެއީ 525,229 މީހުންނެވެ. އެގައުމަކީ ތިން ވަނަ އަށް އެންމެ ގިނަ އަދަދެއްގެ ކޮވިޑް ކޭސްތައް ރިޕޯޓްކޮށްފައިވާ ގައުމަށް ވާއިރު، އެގައުމުން 18,792,511 މީހުން ވަނީ ބައްޔަށް ޕޮޒިޓިވްވެފައެވެ.

ކޮރޯނާވައިރަސް މިއުޓޭޓްވަމުން ގޮސް މިހާރު ވަނީ ނުރައްކާތެރި ގިނަ ވޭރިއަންޓްތަކެއް އުފެދިފައެވެ. އެގޮތުން އެންމެ ފަހުން އިންޑިއާއިން ފެނުނު އައު ވޭރިއަންޓް، ޑެލްޓާ ވޭރިއަންޓަކީ މިހާތަނަށް ފެނުނު އެންމެ ނުރައްކާތެރި އަދި އެންމެ ފަސޭހައިން ފެތުރިގެންދާ ވޭރިއަންޓް ކަމަށް ދިރާސާތައް ބުނެއެވެ. ވެކްސިނުން އެވޭރިއަންޓާ ދެކޮޅަށް އަސަރުކުރާ މިންވަރު 8 ގުނަ ދަށް ނަަމަވެސް ވެކްސިން ޖަހައި ބަލިން ރައްކާތެރިވުމަށް އަޅަންޖެހޭ ފިޔަވަޅުތައް އެޅުމަށް ކަމާބެހޭ ފަރާތްތަކުން އަންނަނީ ތަކުރާރުކޮށް އިލްތިމާސްކުރަމުންނެވެ.