ކޮވިޝީލްޑް ވެކްސިންގެ ދެވަނަ ޑޯޒް ނުޖަހާ ތިބި ފަރާތްތަކަށް އެޕޮއިންޓްމެންޓް އުސޫލުން ދެ ވަނަ ޑޯޒް ޖަހަން ފަށަނީ
ފެބްރުއަރީ މަހު ފުރަތަމަ ޑޯޒް ޖަހާފައިވާ ފަރާތްތަކަށް ޖުލައި މަހުގެ 4 ވަނަ ދުވަހު ވެކްސިން ޖެހުމަށް އެޕޮއިންޓްމެންޓް ހެއްދުމަށް އެޗްޕީއޭއިން ގުޅަމުން ގެންދާނެ
ކޮވިޝީލްޑް ވެކްސިން
ކޮވިޝީލްޑް ވެކްސިންގެ ފުރަތަމަ ޑޯޒް ޖަހާފައިވާ ފަރާތްތަކުގެ ތެރެއިން ދެ ވަނަ ޑޯޒް ނުޖެހި ތިބި ފަރާތްތަކަށް އެޕޮއިންޓްމަންޓް ދީގެން، ޖުލައި މަހުގެ 4 ވަނަ ދުވަހުން ފެށިގެން ވެކްސިން ޖަހަންފަށާނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.
އެޗްޕީއޭއިން ބުނީ ވެކްސިން ޖެހުމަށް އެޕޮއިންޓްމަންޓް ދެމުންގެންދާނީ ފުރަތަމަ ޑޯޒް ޖެހި ތަރުތީބުން، ކުރިން ޖެހި މީހުންނަށް އިސްކަންދީގެން ކަމަށެވެ. އެގޮތުން މިއަހަރުގެ ފެބްރުއަރީ މަހު ކޮވިޝީލްޑް ވެކްސިންގެ ފުރަތަމަ ޑޯޒް ޖަހާފައިވާ ފަރާތްތަކަށް ޖުލައި މަހުގެ 4 ވަނަ ދުވަހު ވެކްސިން ޖެހުމަށް އެޕޮއިންޓްމެންޓް ހެއްދުމަށް އެޗްޕީއޭއިން ގުޅަމުން ގެންދާނެކަމަށެވެ. އެޕޮއިންޓްމަންޓް ލިބޭ ހުރިހާ ފަރާތްތަކުންވެސް ކަނޑައެޅިފައިވާ ސެންޓަރަށް ގަޑިއަށް އައުމަށް ސަމާލުކަންދިނުމަށް ވަނީ އެޗްޕީއޭއިން އިލްތިމާސްކޮށްފައެވެ.
މީގެއިތުރުން ކޮވިޝީލްޑް ވެކްސިންގެ ދެވަނަ ޑޯޒް މިފަހަރު ޖަހަން ހަމަޖެހިފައިވަނީ ހަމައެކަނި އެޕޮއިންޓްމަންޓް ހައްދައިގެން ކަމަށްވެސް އެޗްޕީއޭއިން ބުނެއެވެ.
ވެކްސިން ޖަހަން ދާ ފަރާތްތަކުން އައިޑީ ކާޑު ނުވަތަ ކާކުކަން އަންގައިދޭ ރަސްމީ ލިޔުމެއް ގެންދިޔުމަށާއި ވެކްސިން ކާޑު ގެންދިޔުމަށް ވަނީ އިލްތިމާސްކޮށްފައެވެ.
މީގެއިތުރުން ބަލީގެ އެއްވެސް އަލާމާތެއް ނެތުމާއި، އަދި ކަރަންޓީނުގައި ހުރި މީހަކަށް ނުވުމާއި، ގަޔަށް ދޫ، ފަސޭހައިން ވެކްސިން ޖަހާތަން ދެއްކޭނެ ހެދުމެއް ލުމާއި، ވެކްސިންޖަހަން ދާއިރު ރަނގަޅަށް ކައިގެން ހުރުމަށްވެސް އެޗްޕީއޭއިން އިރުޝާދު ދީފައިވެއެވެ. ވެކްސިން ޖަހަންދާއިރު އަމިއްލަ ފެންފުޅިއެއް ގެންދިޔުމާއި އަދި އެކުގައި އެކަކަށްވުރެ ގިނަ މީހުން ނުގެންދިޔުމަށްވެސް ވަނީ އިލްތިމާސްކޮށްފައެވެ.
ޖޫން މަހުގެ 3 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ރާއްޖެއަށް ލިބެންޖެހޭ ކޮވިޝީލްޑް ވެކްސިނާ ބެހޭ ގޮތުން ވާހަކަދައްކަވަމުން ހެލްތު މިނިސްޓަރ އަހުމަދު ނަސީމް ވިދާޅުވެފައިވަނީ އިންޑިޔާގެ ސެރަމް އިންސްޓިޓިއުޓުން އުފައްދާފައިވާ ކޮވިޝީލްޑް ވެކްސިން ގެނައުމަށް ވެފައިވާ އެއްބަސްވުމުގެ ދަށުން ރާއްޖެއަށް ލިބެންޖެހޭ އެއް ލައްކަ ޑޯޒް ގެނައުމުގެ މަސައްކަތް ކުރަމުންދާ ކަމަށް ވަނީ ވިދާޅުވެފައެވެ. އޭގެފަހުން ޖޫން މަހުގެ 29 ވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތު މިނިސްޓަރ ވިދާޅުވެފައިވަނީ ވެކްސިން ޑޯޒްތައް ލިބޭނެ ސީދާ ވަކި ދުވަހެއް ދަންނަވަން ނޭނގުނު ނަމަވެސް މިހާތަނަށް ލިބިފައި ހުރި މައުލޫމާތުތަކަށް ބަލާއިރު ޖުލައި މަހުގެ 12ވަނަ ދުވަހާ 20ވަނަ ދުވަހާ ދޭތެރޭ އެސްޓްރަޒެނިކާ ވެކްސިންގެ އެކަށީގެންވާ އަދަދެއްގެ ޑޯޒް ލިބޭނެ ކަމަށެވެ. އެގޮތުން ކޮވިޝީލްޑް ވެކްސިންގެ ދެވަނަ ޑޯޒްގެ ބާރަ ހާހެއްހާ ޑޯޒް ލިބޭނެކަމަށް މިނިސްޓަރ ވަނީ ވިދާޅުވެފައެވެ.
ފެބްރުއަރީ މަހުގެ 1 ވަނަ ދުވަހު ރާއްޖޭގައި ކޮވިޑް ވެކްސިނޭޝަން ޕްރޮގްރާމް ފެށިއިރު ޖަހަން ފަށާފައިވަނީ ކޮވިޝީލްޑް ވެކްސިނެވެ. ވެކްސިން ޖަހަން ފެށިއިރު ރާއްޖެއަށް ލިބިފައިވަނީ ކޮވިޝީލްޑް ވެކްސިންގެ 1 ލައްކަ ޑޯޒެވެ. އިންޑިޔާއިން ކޮވިޝީލްޑް ވެކްސިންގެ އިތުރު 1 ލައްކަ ޑޯޒް ހަދިޔާކުރީ ފެބްރުއަރީ މަހުގެ 20 ވަނަ ދުވަހުއެވެ.
އިންޑިއާގެ ސިރަމް އިންސިޓިޓިއުޓްއިން ކޮވިޝީލްޑް ވެކްސިންގެ 300،000 ލައްކަ ޑޯޒް ގަތުމަށް ވެފައިވާ އެއްބަސްވުމުގެ ދަށުން ވެކްސިންގެ 100،000 ޑޯޒު ރާއްޖެ ގެނައީ މަރޗް މަހުގެ 29 ވަނަ ދުވަހުއެވެ.
ކޮވިޝީލްޑް ވެކްސިން ލިބުމުގައި ދިމާވި ދަތިތަކުގެ ސަބަބުން މެއި މަހުގެ 2 ވަނަ ދުވަހުން ފެށިގެން މާލޭގައި ކޮވިޝީލްޑް ވެކްސިންގެ ދެވަނަ ޑޯޒް ޖެހުން ވަނީ ވަގުތީ ގޮތުން މެދުކަނޑާލާފައެވެ. ކޮވިޝީލްޑް ވެކްސިން ލިބުމުގައި ދަތިތައް ދިމާވީ އިންޑިޔާއިން މާޗް މަހުގެ ފަހުކޮޅު އެހެން ގައުމުތަކަށް ވެކްސިން އެކްސްޕޯޓް ކުރުން މެދުކަނޑާލުމުންނެވެ. އެގައުމުގެ ވެކްސިނޭޝަން ޕްރޮގްރާމްގެ ސްޕީޑް ދަށްވެ ކޭސްތައް އަތްނުފޯރާ ހިސާބަށް ދާންފެށުމުން ވެކްސިން އެހެން ގައުމުތަކަށް އެކްސްޕޯޓްކުރުން މެދުކަނޑާލިއެވެ.
މިކަމުގައި ބައިނަލްއަގްވަމީ މަޝްރަހުން ލިބެމުންދާ ރިޕޯޓްތަކަށް ބަލާލާއިރު ދެ އޮފިޝަލަކާ ހަވާލާދީ ރޮއިޓަރސް އިން ރިޕޯޓްކޮށްފައިވަނީ އިންޑިޔާއިން އެހެން ގައުމުތަކަށް ވެކްސިން ފޯރުކޮށްދެވޭނެ ތާރީޚެއް ބިނާވާނީ އެގައުމުގައި ކޮވިޑްގެ ހާލަތު ރަނގަޅުވަމުން އަންނަ އަވަސް ލަސްމިނެއްގެ މައްޗަށްކަމަށެވެ. އިންޑިޔާގައި އެންމެފުޅާ ދާއިރާއެއްގައި ވެކްސިން އުފައްދަމުން އަންނަ ސެރަމް އިންސްޓިޓިއުޓްގެ ސްޕޯކްސްމަން ބުނެފައިވަނީ މިހާރު އެންމެ ބޮޑު އިސްކަމެއް ދެނީ އިންޑިޔާއަށް ވެކްސިން ފޯރުކޮށްދިނުމަށް ކަމަށެވެ. އެހެން ގައުމުތަކަށް ވެކްސިން އެންމެ އަވަހަށްވެސް ފޯރުކޮށްދޭން ފެށޭވަރުވާނީ ޖޫން މަހުގައި ކަމަށް ވަނީ ބުނެފައެވެ.
ބެލެވޭ ގޮތުގައި ރާއްޖޭގައި ކޮވިޝީލްޑް ވެކްސިންގެ ދެވަނަ ޑޯޒް ނުޖަހާ ލައްކައެއްހާ މީހުން ތިބޭނެއެވެ. ރާއްޖޭގައި ދެވަނަ ޑޯޒް ޖެހި މީހުންގެ އަދަދު ވަނީ އެއްލައްކަ ނުވަދިހަހާށް އަރާފައެވެ.
