އައްނަބީލާ ޖަމީލާ އިބްރާހީމް ދީދީ އަވަހާރަވެއްޖެ
އަވަހާރަވީ، ކޮވިޑަށް ފަރުވާ ދެމުން ދަނިކޮށް ރޭގެ ވަގިތެއްގައި
އައްނަބީލާ ޖަމީލާ އިބްރާހީމް ދީދީ
އައްނަބީލާ ޖަމީލާ އިބްރާހީމް ދީދީ އަވަހާރަވެއްޖެއެވެ.
އެކަމަނާ އަވަހާރަވީ ކޮވިޑް-19 ޖެހިގެން ފަރުވާދެމުން ދަނިކޮށް ރޭގެ ދަންވަރުގެ ވަގުތެއްގައެވެ. އެކަމަނާއަކީ ރައްޔިތުން މަޖިލީހުގެ ކުރީގެ ރައީސް ފަޟީލަތުއްޝައިޚް އަހުމަދު ޝާތިރުގެ އަނބިކަނބަލުންނެވެ.
ކޮވިޑް ޖެހިގެން ދަރުމަވަންތަ ހޮސްޕިޓަލްގެ ޑީއެޗް11 ގައި ފަރުވާ ހޯއްދަވަމުން ދަނިކޮށް އެކަމަނާ އަވަހާރަވީ ބުދަ ދުވަހުގެ ރޭގެ ވަގުތެއްގައެވެ.
އަވަހާރަވިއިރު އުމުރުފުޅަކީ 91 އަހަރު ފުޅެވެ.
އެކަމަނާއަކީ ރާއްޖޭގެ ބޮޑުވަޒީރުކަން ކުރެއްވި އެއްގަމުގޭ ސުމުއްވުލް އަމީރު އިބްރާހީމް ފާމުލަދޭރި ކިލެގެފާނުގެ ދަރިކަލެކެވެ. އެކަމަނާގެ މަންމާފުޅަކީ ހާޖީ އިމާދުއްދީންގެ ދަރިކަނބަލެކެވެ.
އެގޮތުން ބަލާއިރު އެކަމަނާގެ ބައްޕާފުޅަކީ ދިވެހިރާއްޖޭގެ ބޮޑުވަޒީރު ކަން ކުރައްވައި، ވަލީ ކޮމެޓީ ރައީސް ކަން ކުރެއްވި، ސުމުއްވުލްއަމީރު އިބްރާހީމް ފާމުލަދޭރިކިލެގެފާނެވެ.
އެކަމަނާގެ މައި ކަނބަލަކީ ސައްޔިދު ދަރިކޮޅަކުން 1800ގެ ތެރޭގައި ރާއްޖެވަޑައިގެންނެވި، ފުރަމާލޭ ކަޅުހުރާގޭ ސައްޔިދު ދަރިކޮޅުގެ ސައްޔިދު ޢަބްދުﷲ ދޮށީސީދީގެ، ދޮންސީދީގެ ދަރިކަނބަލުން، ސިއްތިގޮމާއެވެ.
އެކަމަނާ ހިމެނިވަޑައިގަތީ އަންހެން ކުދިންނަށް އަމާޒުކޮށްގެން ރާއްޖޭގައި ވުޖޫދު ކުރި ފުރަތަމަ ސްކޫލް ކަމަށްވާ މަދަރަސަތުލް ސަނިއްޔާގެ ފުރަތަމަ ދަރިވަރުންގެ ތެރޭގައެވެ. އޭގެ ފަހުން ސުމުއްވުލް އަމީރު މުހައްމަދު އަމީންގެ ދައުރުގައި ސްރީލަންކާއަށް ވަޑައިގެން މަތީ ތައުލީމުވެސް ހާސިލުކުރެއްވިއެވެ. ރާއްޖޭގެ ފުރަތަމަ ގައިޑުންގެ ތެރޭގައިވެސް އެކަމަނާ ހިމެނިވަޑައިގަންނަވައެވެެ.
އެކަމަނާ ފަންނުވެރިކަމަށް ލޯބި ކުރައްވައެވެ. ލަވަ ވިދާޅުވުމާއި، ޕިއާނޯ ކުޅުއްވައިވެސް އުޅުއްވިއެވެ.
