އިސްރާއީލްގެ އެމްބަސީ ޔޫއޭއީގައި ހުޅުވައިފިއެވެ.
އިސްރާއީލްގެ އެމްބަސީ ޔުނައިޓެޑް އަރަބި އެމިރޭޓްސްގެ ވެރިރަށް އަބޫދާބީގައި ހުޅުވާފައި މިވަނީ، އިސްރާއީލްގެ އައު ސަރުކާރުގެ ފޮރިން މިނިސްޓަރ ޔައިރް ލަޕީދް ޔޫއޭއީއަށް ކުރައްވަމުން ގެންދަވާ ދެ ދުވަހުގެ ދަތުރުފުޅުގެ ތެރެއިންނެވެ.
ލަޕީދްގެ މި ދަތުރުފުޅަކީ، ދެގައުމުގެ ދެމެދުގައި ގުޅުން ގާއިމް ކުރި ފަހުން އިސްރާއީލްގެ މިނިސްޓަރަކު އެ ގައުމަށް ކުރައްވާ ފުރަތަމަ ދަތުރުފުޅެވެ. މިދަތުރުފުޅުގެ ތެރެއިން ދުބާއީގައި ކޮންސިއުލޭޓެއްވެސް ހުޅުވުމަށްވަނީ ހަމަޖެހިފައެވެ.
އެމްބަސީ ހުޅުވުމުގެ ރަސްމިއްޔާތުގައި ލަޕީދް ވިދާޅުވީ، އިސްރާއިލުން ބޭނުވަނީ އަރަބި ގައުމުތަކާއެކު ގާތް ގުޅުމެއް ބާއްވަން ކަމަަށެވެ. މެދުއިރުމައްޗަކީ އިސްރާއީލްގެވެސް ސަރަހައްދު ކަމުން، އެހެން ގައުމުތަކުންވެސް ކަންކަމުގައި އިސްރާއީލާއެކު މަޝްވަރާ ކުރުމަށް އެދޭކަމަށް ލަޕީދް ވިދާޅުވިއެވެެ.
ޔޫއޭއީ އަދި ބަހުރެއިނުންވެސް ވަނީ ޓްރަމްޕުގެ ދައުރުގައި އެމެރިކާއިން އެކުލަވާލި "އަބްރަހަމް އެކޯރޑް"ގެ ދަށުން އިސްރާއީލާއެކު ގުޅުން ބަދަހި ކޮށްފައެވެ.
