ކިއުބާގައިހުރި އެމްބަސީ ބަންދުކުރުމާމެދު ވިސްނަމުންދާކަމަށް އެމެރިކާއިން ބުނެފި

ކިއުބާގައިހުރި އެމްބަސީ ބަންދުކުރުމާމެދު ވިސްނަމުންދާކަމަށް އެމެރިކާއިން ބުނެފިއެވެ. އެމެރިކާއިން މިކަން އިއުލާން ކުރީ ކިއުބާގެ ވެރިރަށް ހަވާނާގައި ހުންނަ އެމެރިކާގެ އެމްބަސީގެ މުއައްޒަފުންނަށް ދިން "ސޮނިކް އެޓޭކް" އަށް ފަހުއެވެ.

އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލަސަން ވިދާޅުވީ، މި ހަމަލާގެ ސަބަބުން އެމްބަސީގައި މަސައްކަތްކުރާ 20 މުއައްޒަފަކަށް އެކިކަހަލަ އަނިޔާތަކާއި ކުރިމަތިވެފައިވާކަމަށެވެ.

ބާރު އަޑާއި ރޭޑިއޭޝަންގެ ސަބަބުން އެމެރިކާ އެމްބަސީގެ ބައެއް މުއައްޒަފުންނަށް ސިކުޑީގެ ގެއްލުންތައް ލިބި އަނެއްބައި މުއައްޒަފުންގެ އިވުން ގެއްލިފައިވާއިރު އެހެނިހެން ބޮޑެތި ސިއްހީ މައްސަލަތަކާއި ވަނީ ކުރިމަތިލާންޖެހިފައިކަމަށް ރިޕޯޓްތައް ބުނެއެވެ.

މި ހަމަލާގައި ކިއުބާގެ އެއްވެސް ބައިވެރިވުމެއް ނުވާކަމަށް އެގައުމުން ބުނާއިރު 2016 ވަނަ އަހަރުގެ ފަހުކޮޅު ދިން މި ހަމަލާގެ ޒިންމާ އެއްވެސް ފަރާތަކުން ނަގާފައެއް ނުވެއެވެ. އަދި މި ހަމަލާގައި ކިއުބާގެ އަތެއްނުވާކަމުގެ ޔަގީންކަން އެ ގައުމުގެ ރައީސް ރައުލްކާސްޓްރޯ ވަނީ ދެއްވާފައެވެ.

އެމެރިކާގެ އެފްބީއައިއާއި ކެނެޑާގެ ފުލުހުންނާއި އަދި ކިއުބާގެ ކަމާބެހޭ ފަރާތްތަކުން މި ހަމަލާ ތަހުގީގުކުރަމުން ދިޔަނަމަވެސް މިހާތަނަށް އެއްވެސް ކުރިއެރުމެއް ލިބިފައެއް ނުވެއެވެ.

އެމެރިކާއާއި ކިއުބާއާއި ދެމެދު ގުޅުން ކެނޑިފައި އޮންނަތާ ބައިގަރުނު ފަހުން ކިއުބާއާއި އަލުން ގުޅުނީ ރައީސް ބަރަކް އޮބާމާގެ ވެރިކަމުގައި 2015 ވަނައަހަރު އެވެ. އަދި އެއާއިއެކު އެމެރިކާގެ އެމްބަސީވެސް އެގައުމުގައި ހުޅުވިގެން ދިޔައެވެ. އެއާއިއެކު ދެ ގައުމުގެ ޑިޕްލޮމެޓިކް ގުޅުން ރަސްމީކޮށް އަލުން ފެށުނެވެ.