އިސްރާއީލުގެ ޖަރީމާތައް ތަހުޤީޤްކުރަން ގޮވާލުމުން ފަލަސްތީނުގެ އޮފީސް ބަންދުކުރާނެކަމުގެ އިންޒާރު ދީފި

އިސްރާއީލުން ފަލަސްތީނުގެ ބިމުގައި މުސްލިމުންނާ ދެކޮޅަށް ހިންގާ ޖަރީމާތައް ތަހުޤީޤްކުރުމަށް ފަލަސްތީނުގެ ރައީސް މަހްމޫދު ޢައްބާސް ގޮވާލެއްވުމުން އެމެރިކާގެ ވެރިރަށް ވޮޝިންޓަންގައި ހުންނަ ޕަލަސްޓީނިއަން ލިބަރޭޝަން އޯގަނައިޒޭޝަން (ޕީއެލްއޯ)ގެ އޮފީސް ބަންދުކުރާނަކަމުގެ އިންޒާރު އެމެރިކާއިން ދީފިއެވެ.

އެމެރިކާގެ ޚާރިޖީ ވަޒީރު ރެކްސް ޓިލަރސަން މިހާރުވަނީ މިފިޔަވަޅު އަޅުއްވާނެކަމުގެ އިންޒާރު ފަލަސްތީނަށް ރަސްމީކޮށް ދެއްވާފައެވެ. ފަލަސްތީނަކީ މިނިވަން ދައުލަތެއް ކަމަށް އެމެރިކާއިން ބަލައިނުގަންނާތީ އެޤައުމުގެ އެމްބަސީއެއް އެމެރިކާގައި ނުހުރެއެވެ. އެހެން ނަމަވެސް އެމެރިކާގެ ކުރީގެ ރައީސް ބިލް ކްލިންޓަންގެ ވެރިކަމުގައި ފަލަސްތީނުގެ ރައްޔިތުން ތަމްސީލްކުރުމަށް އެމެރިކާގައި ޕީއެލްއޯގެ އޮފީހެއް ހުޅުވުމަށް ހުއްދަ ދެއްވިއެވެ. ޕީއެލްއޯއަކީ ފަލަސްތީނުގެ ކުރީގެ ރައީސް ޔާސިރު އަރަފާތު އިސްކޮށް ހުންނަވާ، އެޤައުމުގެ މިނިވަންކަމަށް މަސައްކަތްކުރާ މައި ޖަމާޢަތެވެ. ފަލަސްތީނުގެ ވެރިކަންކުރާ ފަތަހަ ޖަމާޢަތް ހިމެނެނީ ޕީއެލްއޯގައެވެ.

އެމެރިކާގެ ކޮންގްރެސްއިން 2015 ވަނަ އަހަރު ޤާނޫނަށް ގެނައި ބަދަލުގެ ދަށުން، އިސްރާއިލުން ހިންގާ ހަނގުރާމައިގެ ޖަރީމާތައް ތަހުޤީޤްކުރަން ބައިނަލްއަޤްވާމީ ޖިނާޢީ ކުށްތަކާބެހޭ ކޯޓަށް ފަލަސްތީނުން ގޮވާލައިފިނަމަ އެމެރިކާގައި ހުންނަ ޕީއެލްއޯ އޮފީސް ބަންދުކުރެވޭނެއެވެ.

މިމައްސަލައިގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ މިއީ ސީދާ އެމެރިކާގެ ޤާނޫނު ތަންފީޒުކުރުމާއި ބެހޭ މައްސަލައެއްކަމަށާއި، ޤާނޫން ތަންފީޒުވާން ޖެހޭނެކަމަށެވެ.

ޕީއެލްއޯ އޮފީސް ބަންދުކުރާނެކަމުގެ އިންޒާރު އެމެރިކާއިން ދިނުމާ ގުޅިގެން ސުލްހައިގެ ވާހަކަތަކުގައި ބައިވެރިވާ ފަލަސްތީނުގެ އިސް މަންދޫބު އަދި ޕީއެލްއޯގެ އިސް އޮފިޝަލެއްކަމަށްވާ ސާއިބް އުރައިޤާތު ވިދާޅުވީ, މިއީ އިސްރާއީލުގެ ޕްރެޝަރުގެ ސަބަބުން އެމެރިކާއިން އަޅަން އުޅޭ ފިޔަވަޅެއްކަމަށެވެ. އަދި މީގެ އިތުރުން އެމެރިކާގެ ވެރިރަށް ވޮޝިންޓަނުގައި ހުންނަ ޕީއެލްއޯ އޮފީސް ބަންދުކޮށްފިނަމަ، އެމެރިކާއާއި އެކު ކުރިއަށްގެންދާ ވާހަކަތައް ހުއްޓާލަން ޖެހިދާނެކަމުގެ އިންޒާރުވެސް ޕީއެލްއޯއިން ވަނީ ދީފައެވެ.

މެދުއިރުމަތީގެ މައްސަލައަށް ދާއިމީ ހައްލެއް ހޯއްދަވާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ވައުދުވެވަޑައިގެންފައެވެ. އަދި ޓްރަމްޕްގެ ދަރިކަނބަލުން އިވާންކާގެ ފިރިކަލުންކަމަށްވާ ޖެރަރޑް ކުޝްނާ އާއި އެމަސައްކަތް ވަނީ ހަވާލުކުރައްވާފައެވެ. އިސްރާއީލާއި ފަލަސްތީނުގެ އޮފިޝަލުންނާއި ބައްދަލުކުރެއްވުމަށް ކުޝްނާ ދޭތެރެދޭތެރެއިން މެދުއިރުމައްޗަށް ދަތުރުކުރައްވައެވެ.