އިރާޤު އެމްބަސީއަށް ދިން ހަމަލާގެ ޒިންމާ އައިސިސް އިން ނަގައިފި

ކާބުލްގައި ހުންނަ އިރާޤުގެ އެމްބަސީއަށް ހޯމަ ދުވަހު ދިން ހަމަލާގެ ޒިންމާ ހަނގުރާމަވެރި އައިސިސް ޖަމާޢަތުން ނަގައިފިއެވެ.

ހޯމަ ދުވަހު އަފްގާނިސްތާނުގެ ވެރިރަށް ކާބުލްގެ ހަތަރު ތަނެއްގައި ބޮން ގޮއްވުމުގެ އިތުރުން ބަޑީގެ ހަމަލާތަކެއް ދީފައިވާއިރު، މި ހަމަލާތަކުގައި މީހަކު މަރުވެފައިވާ ކަމެއް، ނުވަތަ މީހަކަށް އަނިޔާވި ކަމެއް ރަސްމީ އެއްވެސް ފަރާތަކުން ކަށަވަރުކޮށްދީފައެއް ނުވެއެވެ.

އޭއެފްޕީއަށް މަޢުލޫމާތުދެމުން، ނަން ހާމަނުކުރުމަށް ޝަރުތުކޮށް، އަފްގާނިސްތާނުގެ ސަލާމަތީ އޮފިޝަލަކު ބުނީ، އިރާޤު އެމްބަސީ ބޭރުގައި ހަމަލާދިން މީހާ ހަމަލާދީފައިވަނީ ހަށިގޮށްވާލައިގެން ކަމަށާ، ހަމަލާދޭން ފެށުމާއި ގުޅިގެން އެ ސަރަޙައްދުގައި ތިބި މީހުން ރައްކާތެރި ހިސާބުތަކަށް ގެންދިޔަ ކަމަށެވެ.

އައިސިސްގެ ޕްރޮޕެގެންޑާ މީޑިއާ، އަމަޤުގައި ބުނެފައިވަނީ، ކާބުލްގައި ހުންނަ އިރާޤުގެ އެމްބަސީއަށް ހަމަލާދިނީ އެ ޖަމާޢަތުގެ ދެ ހަނގުރާމަވެރިން ކަމަށެވެ.

އިރާޤުގެ މޫސަލްގައި އައިސިސްއަށް ލިބުނު ނާކާމިޔާބީއަށްފަހު، އަފްގާނިސްތާނުގައި އެ ޖަމާއަތުގެ ބާރު ގަދަކުރަން ފަށާފައިވާ މި ވަގުތަކީ އަފްގާނިސްތާނުގެ ޠާލިބާން ޖަމާއަތުންވެސް އަފްގާނުގައި އެ ޖަމާއަތުގެ ބާރު އަލުން ވަރުގަދަ ކުރަމުންދާ ވަގުތެކެވެ.