ދުވާފަރު މަގުހެދުމުގެ މަޝްރޫއުގެ ދަށުން މިހާރު ކުރިއަށްދަނީ ކޭބަލް ޖަންޝަން އެޅުމުގެ މަސައްކަތް ކަމަށް އެމްޓީސީސީން ބުނެފިއެވެ.

ދެ ފިޔަވައްސަކަށް ބަހާލައިގެން ކުރިއަށްގެންދާ މި މަޝްރޫއުގެ މިހާރު ކުރިއަށްދަނީ ދެވަނަ ފިޔަވަހީގެ މަސައްކަތެވެ. ދެވަނަ ފިޔަވަހީގެ މަސައްކަތްފެށީ ދުވާފަރުގެ ބޮޑެތި މަގުތައް ހެދުމަށް ފަހު 2020 ވަނަ އަހަރުގެ އޮކްޓޯބަރު މަހުގެތެރޭގައެވެ. އެ ކުންފުންޏާ މަަސައްކަތް ހަވާލުކޮށްފައިވަނީ މިދިޔަ އަހަރުގެ ސެޕްޓެމްބަރު މަހުގެ 9 ވަނަ ދުވަހުއެވެ.

މި މަޝްރޫއުގެ ތެރޭގައި ފައި މަގުގައި ހިނގޭނެ ގޮތަށް 4,960 ސްކެއާ މީޓަރުގެ ސަރަހައްދެއް ގާއިމު ކުރަން ވަނީ ހަމަޖެހިފައެވެ. އަދި މީގެ އިތުރުން މަގުގައި ދުއްވޭ ގޮތަށް 17,790 ސްކެއާ މީޓަރުގެ ސަރަހައްދެއް ގާއިމު ކުރުމުގެ އިތުރުން ކޭބަލް ހޮޅި ވަޅުލުމުގެ މަސައްކަތާއި މަގުމަތީގެ ނިޝާންތައް ހަރުކުރުމުގެ މަސައްކަތް ކުރުމަށް ވެސް ވަނީ ހަމަޖެހިފައެވެ.

މި މަޝްރޫއުއަށް ހޭދަވާނެ ކަމަށް ލަފާކޮށްފަައި ވަނީ 37.8 މިލިއަން ރުފިޔާއެވެ. އަދި މި މަޝްރޫއަކީ 300 ދުވަހު ތެރޭގައި ނިންމުމަށް ހަވާލުކުރެވިފައިވާ މަޝްރޫއެކެވެ.

ދުވާފަރުގެ މަގު ހެދުމުގެ ފުރަތަމަ ފިޔަވަހީގެ ދަށުން ބޮޑެތި ހުރިހާ މަގެއްގައި ތާރު އަޅައި ފެން ހިންދާ ނިޒާމުވަނީ ގާއިމުކޮށްފައެވެ.