ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށްދިން ހަމަލާގައި ޒަޚަމްވި އެމަނިކުފާނުގެ ބޮޑީގާޑު އިލްހާމް އާދަމްގެ އޮޕަރޭޝަނެއް ކުރަން ޖެހިއްޖެއެވެ.
ނަޝީދުގެ ކޮއްކޯފުޅު ނާޒިމް އަބްދުއްސައްތާރު ކުރެއްވި ޓުވީޓެއްގައި ވިދާޅުވީ އިލްހާމްގެ ކަނދުރާގެ އޮޕަރޭޝަނެއް ކުރަނީ ޑިސްކު ހަލާކުވެފައިވާތީ ކަމަށެވެ. އެހެންކަމުން އައިޖީއެމްއެޗްގައި އަންގާރަ ދުވަހު އޮޕަރޭޝަނެއް ކުރުމަށް ހަމަޖެހިފައިވާކަމަށް ވަނީ ވިދާޅުވެފައެވެ.
މެއި މަހުގެ 6 ވަނަ ދުވަހުގެ ރޭ ރައީސް ނަޝީދަށް އަމާޒުކޮށްދިން ހަމަލާގައި އެމަނިކުފާނުގެ ފުރާނަ ސަލާމަތްކުރުމުގައި އިލްހާމް ކުރި މަސައްކަތަށް ރައީސް ނަޝީދުގެ އާއިލާ އާއި ސަޕޯޓަރުން ވަނީ ތައުރީފްކޮށްފައެވެ. ރައީސް ނަޝީދަށް އަމާޒުކޮށްދިން ހަމަލާގައި އެމަނިކުފާނުގެ ތިން ބޮޑީގާޑުންގެ އިތުރުން އެސަރަހައްދުގައި އެވަގުތު ތިބި މީހުންގެ ތެރެއިން ދޭސީއަކާއި ބިދޭސީއަކަށް އެކިވަރުގެ އަނިޔާ ލިބިފައިވެއެވެ.
ރައީސް ނަޝީދު އަވަހާރަކޮށްލުމަށް ދިން ހަމަލާގައި އެމަނިކުފާނުގެ ސެކިޔުރިޓީ ފެއިލްވި ގޮތުގެ އިންކުއަރީއެއް ރައްޔިތުންގެ މަޖިލީހުގެ 241 ކޮމިޓީން ކުރަމުން އަންނައިރު އެކޮމިޓީއަށް ރައީސް ނަޝީދުގެ ބޮޑީގާޑު އިލްހާމްު ވެސް ވަނީ ހާޒިރުކޮށްފައެވެ.
