ވެކްސިން ޖަހަން ދެކޮޅު ހަދާނަމަ އިންޑިއާއަށް ދިއުމަށް ފިލިޕީންސްގެ ރައީސް ރޮޑްރިގޯ ޑުޓާރްޓޭ ގޮވާލައިިފިއެވެ.
ކޮވިޑް-19ގެ އެންމެ ނުރައްކާތެރި އެއް ވޭރިއަންޓް ކަމުގައިވާ ޑެލްޓާ ވޭރިއަންޓްގެ ކޭސްތައް ފިލިޕީންސްގައި މިހާރު ދަނީ ބާރު ދުވެލީގައި ފެތުރެމުންންނެވެ. މިކަން ކޮންޓްރޯލްކުރުމަށް ފިލިޕީންސް ސަރުކާރުން ގިނަ ފިޔަވަޅުތަކެއް އަޅަން ވަނީ ނިންމާފައެވެ. އެގޮތުން ބޯޑަރު ކޮންޓްރޯލްކޮށްފައިވާއިރު، ގަދަ ބާރުން ވެކްސިން ޖެހާނެކަމުގެ އިންޒާރުވެސް އެތައް ފަހަރެއްގެ މަތިން ވަނީ ދީފައެވެ.
މީގެ ކުރިން ފިލިޕީންސްގެ ރައީސް ރޮޑްރިގޯ ޑުޓާޓޭ ވަނީ ކޮވިޑް ވެކްސިން ޖެހުމަށް އިންކާރުކުރާ މީހުން ޖަލަށް ލާނެކަމުގެ އިންޒާރު އެގައުމުގެ ރައްޔިތުންނަށް ދެއްވާފައެވެ. އަދި ލޮކްޑައުންގެ އުސޫލުތަކާ ޚިލާފުވާ މީހުންގެ ގަޔަށް ބަޑިޖަހާނެކަމުގެ އިންޒާރުވެސް ވަނީ ދެއްވާފައެވެ.
ފިލިޕީންސްގައި ވެކްސިން ޖެހުމުގެ ޕްރޮގްރާމް ފަށާފައިވަނީ މާޗް މަހުއެވެ. ނަމަވެސް ވެކްސިން ޖަހަންދާ މީހުންގެ އަދަދު ވަނީ ވަރަށް ބޮޑަށް ދަށްވެފައެވެ. ޑުޓާޓޭ ވިދާޅުވީ ރައްޔިތުން ބޯހަރީކަމަށެވެ. މިއިންޒާރު ދެއްވާފައިވާއިރު ލޮކްޑައުންގެ އުސޫލުތަކާއި ޚިލާފުވާ މީހުންގެ ގަޔަށް ބަޑިޖަހަމުންދާ ކަމުގެ ވާހަކަތަކެއްވެސް ވަނީ ފެންމަތިވެފައެވެ.
އަދަދުތަކަށް އެދެވޭ ބަދަލުތަކެއް އަންނަތަން ނުފެނުމުން ފިލިޕީންސްގެ ރައީސް ކޯފާ އިސްކުރައްވާ އަނެއްކާވެސް ރައްޔިތުންނަށް މިވަނީ އިންޒާރުދެއްވާފައެވެ. އެގޮތުން މިފަހަރު ޑުޓާޓޭ މިވަނީ ވެކްސިން ޖަހަން ދެކޮޅު ހަދާނަމަ އިންޑިއާއަށް ދިއުމަށް ގޮވާލައްވާފައެވެ.
110 މިލިއަން މީހުން ދިރިއުޅެމުން އަންނަ ފިލިޕީންސްގައި ވެކްސިންގެ ދެ ޑޯޒް ޖަހާފައިވަނީ އަދި އެންމެ 1.95 އިންސައްތަ މީހުންކަމަށް ވެކްސިން ޓްރެކަރއިން ވަނީ ބުނެފައެވެ. އެގައުމުގެ ސަރުކާރުން ހާމަކޮށްފައިވާ ގޮތުގައި 8.4 މިލިއަން ޑޯޒް ވަނީ އެކި ހިސާބުތަކަށް ފޯރުކޮށްދީފައެވެ. 6.2 މިލިއަން މީހުންނަށް ފުރަތަމަ ޑޯޒް ދީފައިވާއިރު 2.1 މިލިއަން މީހުންނަށް ދެ ޑޯޒް ވަނީ ދީފައެވެ.
