ރައީސް ނަޝީދު ނެތުމުން ރާއްޖޭގެ ދުވެލި މަޑު ޖެހިފައި - ރާއީ
ރައީސް މުހައްމަދު ނަޝީދު ހުންނަވައިގެން މަސައްކަތްތައް ކުރައްވާއިރު އެ ދުވަހަކު ކުރައްވާ މަސައްކަތާއި ރާއްޖޭގެ ހިންގުމާ ވަރަށް ބޮޑަށް ގުޅޭ
މުހައްމަދު ރާއީ / މަކުނުދޫ ދާއިރާގެ މެމްބަރު ގައުމީ މަޖިލީހުގެ ޖަލްސާގައި ވާހަކަދައްކަވަނީ
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނެތުމުން ރާއްޖޭގެ ދުވެލި މަޑުވެފައިވާކަމަށް މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވެއްޖެއެވެ.
ބުރާސްފަތި ދުވަހުގެރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގައި ވާހަކަދައްކަމުން ރާއީ ވިދާޅުވީ މަޖިލީހުގެ ރައީސް، ރައީސް މުހައްމަދު ނަޝީދު ހުންނަވައިގެން މަސައްކަތްތައް ކުރައްވާއިރު އެ ދުވަހަކު ކުރައްވާ މަސައްކަތާއި ރާއްޖޭގެ ހިންގުމާ ވަރަށް ބޮޑަށް ގުޅޭ ކަމަށާއި މިއަދު އެމަނިކުފާނު ނެތުމުން އެ ފަޅުކަން އިހުސާސް ކުރެވޭ ކަމަށެވެ.
އަދި މެއި މަހުގެ ހަވަނަ ދުވަހުގެރޭ ނަޝީދު އަވަހާރަކޮށްލުމަށް ދިން ހަމަލާގެ ވާހަކަ އެމްޑީޕީން އަބަދުވެސް ދައްކާނެ ކަމަށާއި އެގޮތުން އެ ހަމަލާގައި ރައީސް ނަޝީދުގެ ހަށިކޮޅަށް ލިބުނު އަނިޔާގެ އިތުރުން އެމްޑީޕީއަށް ވެސް އަނިޔާ ލިބުނު ކަމަށެވެ. އެމްޑީޕީއަށް އަނިޔާ ލިބުމަކީ ރާއްޖޭގެ ވަރަށް ގިނަ ރައްޔިތުންނަށް އަނިޔާ ލިބުން ކަމަށް ވެސް ރާއީ ވިދާޅުވިއެވެ.
ރައީސް ނަޝީދަށް ދިން ހަމަލާގެ ހަގީގަތް ނުހޯދޭނަމަ މިފަދަ އިތުރު ހަމަލާތަކަކަށް ވަރަށް ބޮޑަށް ފުރުސަތު ހުޅުވިފައިވާ ކަމަށް ވެސް ރާއީ ވިދާޅުވިއެވެ.
ރައީސް ނަޝީދަށް އަމާޒުކޮށްދިން ހަމަލާގެ ތަހުގީގަށް ކުރިއެރުން ލިބިފައިވާކަމަށް ފުލުހުން ފާހަގަކުރި ނަމަވެސް އިތުރު އެއްވެސް ތަފްސީލެއް ނުދެއްވައެވެ. ރައީސް ނަޝީދަށް ދިން ހަމަލާއާ ސީދާ ގުޅުންހުރި 4 މީހަކު ހައްޔަރު ކޮށްފައިވާއިރު، މި ހަމަލާއާ ގުޅިގެން ފަށާފައިވާ ޓެރަރިޒަމާއި ހަރުކަށި ފިކުރާ ގުޅުންހުރި މީހުން ހޯދުމަށް ކުރިއަށް ގެންދިޔަ އޮޕަރޭޝަންގައި 10 މީހަކު ހައްޔަރު ކޮށްފައިވާ ކަމަށް ފުލުހުން ވިދާޅުވެފައިވެއެވެ.
