މޯލްޑިވިއަން ޑިމޮކްރެޓިކް ޕާޓީ، އެމްޑީޕީގެ 16ވަނަ އަހަރީ ދުވަހުގެ ހަރަކާތައް ޖޫން 26ގައި ފެށުމަށް ނިންމައިފިއެވެެ.

ބުރާސްފަތި ދުވަހުގެރޭ ކުރިއަށް ގެންދިޔަ އެ ޕާޓީގެ ގައުމީ މަޖިލީހުގެ 176ވަނަ ޖަލްސާގައި، ހެންވޭރު ހުޅަނގު ދާއިރާގެ މެމްބަރު އަދި ޕާޓީގެ ޗެއާޕަރސަން ޙަސަން ލަޠީފު ވިދާޅުވީ، އަހަރީ ދުވަސް ފާހަގަ ކުރުމަށް ވަރަށް ގިނަ ކަންކަން ރޭވިފައި އޮތް ކަމަށެވެ. އެގޮތުން އެދުވަހު އެންމެ ފުރަތަމަ އޮންނާނީ، ދިދަ ނެގުމުގެ ޚާއްސަ ރަސްމިއްޔާތެއް ކަމަށާއި، އެއަށްފަހު ގައުމީ މަޖިލީހުގެ ޚާއްސަ ޖަލްސާއެއް އޮންނާނެ ކަމަށް ވިދާޅުވިއެވެ. ދިދަނެގުން ހުރިހާ ރަށެއްގައި ކުރިއަށްދާނެ ކަމަށާއި، އާއްމު މެމްބަރުންގެ ޚިޔާލު ހޯދުމަށް ޚާއްސަ ހަރަކާތްތަކެއް ކުރިއަށް ގެންދާނެ ކަމަށް ވިދާޅުވިއެވެ.

އެމްޑީޕީގެ ޚާއްސަ "ކްލަބް ހައުސް" ގްރޫޕެއް އެ ދުވަހު ލޯންޗް ކުރާނެ ކަމަށާއި، ވަރޗުއަލް އެގްޒިބިޝަނެއްވެސް ބޭއްވުމަށް ވަނީ ނިންމާފައެެވެ. އަދި ރައީސް ނަޝީދުގެ ޚާއްސަ އިވެންޓެއްވެސް ރޭވިފައި އޮތްކަމަަށްވެސް ޙަސަން ލަޠީފު ވިދާޅުވިއެވެ. ކޮވިޑްގެ ހާލަތަށް ބަލައި ޖުލައި މަހުގެ ފަހުކޮޅު ޚާއްސަ ޕިކަޕު ބުރެއް ރޭވިފައި އޮތް ކަމަށާއި، އެމްޑީޕީގެ ޚާއްސަ ލަވަ ކަލެކްޝަނެއް ނެރުމަށް ނިންމާފައިވާ ކަމަށްވެސް އޭނާ ވިދާޅުވިއެވެ.

ދެން އެޖެންޑާގައި އޮތީ، "މެއި6 ކޮމިޓީ"ގެ މަސައްކަތް ދިޔަ ހިސާބު މެމްބަރުންނާ ހިއްސާ ކުރުމެވެ. ކޮމިޓީގެ މެމްބަރު، ވިލުފުށީ ދާއިރާގެ މެމްބަރު ޙަސަން ޢަފީފު ވިދާޅުވީ، މިހާތަނަށް އަދި ބައްދަލުކުރެވުނީ 241 ކޮމިޓީއާ ކަމަށެވެ. އެ ބައްދަލުވުމުގައި، ކޮމިޓީގެ މުގައްރިރު ހިތަދޫ އުތުރު ދާއިރާގެ މެމްބަރު މުޙައްމަދު އަސްލަމް، އިންކުއަރީއާ ގުޅޭގޮތުން މައުލޫމާތު ހިއްސާކުރެއްވި ކަމަށް ޢަފީފު ވިދާޅުވިއެެވެ.

241 ކޮމިޓީން ވަނީ މިހާތަނަށް 49 މެމްބަރުންނާ ބައްދަލުކޮށް، 89 ބައްދަލުވުމެއް ބާއްވާފައެެވެ. އަދި މި މަހުގެ 30ށް ރިޕޯޓު ނިންމައި އާއްމު ކުރުމަށް 241 ކޮމިޓީން މަސައްކަތް ކުރައްވަމުން އަންނަކަމަށް އެ ކޮމިޓީގެ މުގައްރިރު ވިދާޅުވި ކަމަށާއި، އާދީއްތަ ދުވަހު، އެމްއެންޑީއެފް އަދި އެޗްއާރްސީއެމްއާ ބައްދަލުކުރުމަށް ހަމަޖެހިފައިވާ ކަމަަށް އޭނާ ވިދާޅުވިއެެވެ.

ޢަފީފު ވިދާޅުވީ، ބުރާސްފަތި ދުވަހު ރައީސް ނަޝީދާ ފޯނުން ގުޅުއްވި ކަމަށާއި، އެމަނިކުފާނުގެ ހާލުކޮޅު ރަނގަޅުވަމުން އަންނަ ކަމަށް ވިދާޅުވި ކަމަށެވެ. އެތެރެހައްޓަށް ލިބިވަޑައިގަތް އަނިޔާތައް ރަނގަޅުވެއްޖެ ކަމަށާއި، ވާތު އުޅަނބޮށީގެ ހަރަކާތްވެސް 50 އިންސައްތަ ރަނގަޅު ކަމަށާއި، ކަނާތުގެ 3 އިނގިއްޔެއް އަދިވެސް އައްސިވެފައިވާ ވާހަކަ ވިދާޅުވި ކަމަށެވެ.

ގައުމީ މަޖިލީހުގެ މެމްބަރުންވަނީ، އެމަނިކުފާނަށް އަމާޒުކޮށް، ދިން ހަމަލާގެ ބިރުވެރިކަމާ ގުޅޭގޮތުންނާއި، އިންކުއަރީގެ ހޯދުންތަކާ ގުޅޭގޮތުން ވާހަކަ ދައްކަވާފައެވެ.