އެވިޑް ކޮލެޖުން އައްޑޫ ފްލައިން ސްކޫލްގެ މިލްކިއްޔާތު ގަނެފި
ފްލައިން ޓެސްޓްތައް ފެށޭނީ ސެޕްޓެމްބަރުގައި
އޭޝިއަން އެކެޑަމީ އޮފް އެއިރޮނޯޓިކްސްގައި ބޭނުންކުރާ ބޯޓުތަކެއް
އެވިޑް ކޮލެޖުން އައްޑޫ ފްލައިން ސްކޫލް ގަނެ، "އެވިޑް ސްކޫލް އޮފް އޭވިއޭޝަން"ގެ ނަމުގައި އިފްތިތާހުކޮށްފިއެވެ.
އެއްބަސްވުމުގައި ސޮއިކުރުމަށް ވަރޗުއަލްކޮށް ކުރިއަށްގެންދިޔަ މި ރަސްމިއްޔާތުގައިވަނީ، އައްޑޫ ފްލައިން ސްކޫލްގެ މިލްކިއްޔާތު އެއްކޮށް އެވިޑް ކޮލެޖަށް ބަދަލު ކޮށްފައެެވެ.
އެވިޑް ކޮލެޖުގެ ޗެއާރމަން ޢަބްދުﷲ މުސްތާޤު ރަޝާދު ވިދާޅުވީ، މިއީ އެވިޑް ކޮލެޖްގެ ހަޔާތުގައި ރަން އަކުރުން ފަވާލެވޭނެ ދުވަހެއް ކަމަށެވެ. ރާއްޖޭގައި އެންމެ ފުރަތަމަ ފަހަރަށް ފްލައިން ސްކޫލެއް، އަދި އެ ކޮލެޖްގެ ދަށުން މި ސްކޫލް ވުޖޫދުވެގެން އައުން ފަޚުރުވެރިކަމާއެކު ފާހަގަކުރައްވާ ކަމަށެވެ.
އައްޑޫ ފްލައިން ސްކޫލްގެ މިލްކިއްޔާތު އެއްކޮށް އެވިޑް ކޮލެޖްގެ ދަށަށް ގެނައުމުގެ މަގްސަދަކީ، ފްލައިން ސްކޫލްގައި ކިޔަަވަމުންދިޔަ ދަރިވަރުންގެ ކަންބޮޑުވުންތަކަށް ހައްލު ހޯދައި ދިނުން ކަމަށެވެ. އަދި އެކުދިންގެ ކިޔެވުމަށް އަވަސް ހައްލެއް ހޯދައިދިނުމަކީ ކޮލެޖުން އިސްކަމެއްދޭނެ ކަމެއް ކަމުގައި އޭނާ ވިދާޅުވިއެވެ.
މިކަމަށް ހައްލު ހޯދައި ދިނުމަށް ސަރުކާރުން އެއްބާރުލުން ދެއްވިކަންވެސް އޭނާ ފާހަގަކުރެއްވިއެވެ.
އޭނާ ވިދާޅުވީ މި ސްކޫލް މުސްތަގުބަލުގައި ވެގެންދާނީ ޕައިލެޓުންނާއި ކެބިން ކުރޫންނާއި އަދި ފްލައިޓް އިންޖިނިއަރުން ފަދަ އޭވިޝަން ދާއިރާއާ ގުޅުންހުރި މީހުން ބިނާ ކުރާނެ ތަނަކަށް ކަމަށެވެ. އަދި އިންޓަރނޭޝަނަލް އެއަރ ޓްރާންސްޕޯޓް އެސޯސިއޭޝަން، އަޔާޓާއިން ހިންގާ ތަމްރީން ޕްރޮގްރާމްތައް ތައާރަފުކުރުމަށް ކަމާގުޅޭ ފަރާތްތަކާއެކު މަޝްވަރާ ކުރަމުން އަންނަ ކަމަށެވެ.
މިހާރުގެ އެންމެ ބޮޑު ފޯކަސްއަކީ، އައްޑޫ ފްލައިން ސްކޫލްގައި ކިޔަވަމުން އަންނަ ދަރިވަރުންގެ ކޯސްތައް ފުރިހަމަ ކުރުން ކަމަށް އޭނާ ވިދާޅުވިއެވެ.
މިހާރު މަސައްކަތް ކުރަމުން އަންނަނި ކޮލެޖްގެ އަމިއްލަ ލައިސަންސް ހޯދުމަށް ކަމަށާއި، އެކަމަށް 6މަސް ނަގާނެ ކަމަށް ވިދާޅުވިއެވެ. އެހެންނަމަވެސް މިހާރު ދަރިވަރުންނަށް ފޯރުކޮށްދޭންޖެހޭ ހުރިހާ ކަމެއް، އައްޑޫ ފްލައިން ސްކޫލް ހިންގަމުން އައި އޭޝިއަން އެކަޑަމީ އޮފް އެރޮނޮޓިކްސްގެ ލައިސަންސްގައި ފޯރުކޮށްކޮށްދެމުންދާނެ ކަމަށް ވިދާޅުވިއެވެ.
ފްލައިން ސްކޫލްގެ އުދުހުމުގެ ޓެސްޓްތައް ފެށޭވަރުވާނީ ސެޕްޓެމްބަރު މަހު ނަމަވެސް، ޓެސްޓަށް ތައްޔާރީތައް ފަށައިގަތުމަށް ނިންމާފައިވާ ކަމަށް ވިދާޅުވިއެެވެ.
އެވިޑް ކޮލެޖުން އައްޑޫ ފްލައިން ސްކޫލާ ހަވާލުވިއިރު އެތަނުގެ މައްސަލަ ބޮޑުވެ، ދަރިވަރުންގެ ގިނަ ކަންބޮޑުވުން ތަކެއް ހުއްޓެވެ. އެތަނުގެ ބައެއްވެރިންނަށް ޓްރާންޕޯޓް އޮތޯރިޓީން ފިޔަވަޅު އަޅާފައިވާއިރު، ދަރިވަރުން ކިޔެވުމަށް ނެގި ލޯނުތަކަށް ލުއިތަކެއްވެސް ވަނީ ދީފައެވެ. 170ށްވުރެ ގިނަ ދަރިވަރުން ކިޔަވަމުން އަންނަ އައްޑޫ ފްލައިން ސްކޫލްގައި ބޭނުންކުރަމުން އަންނަ ހުރިހާ ބޯޓެއްވެސްވަނީ ގްރައުންޑް ވެފައެވެ. އެވިޑުން އަންނަނީ އައު ބޯޓު ހޯދުމުގެ މަސައްކަތްވެސް ކުރަމުންނެވެ.
