މަސައްކަތްކުރަނީ ވީ އެންމެ އަވަހަކަށް މާލެ ދިއުމަށް- ރައީސް ނަޝީދު
އެމަނިކުފާނު ޖަރުމަންވިލާތަށް ވަޑައިގެންނެވީ މެއި މަހުގެ 13ގައި
ރައީސް ނަޝީދަށް ލިބިވަޑައިގަތް އަނިޔާތައް އަންނަނީ ރަނގަޅުވަމުން
މަސައްކަތް ކުރައްވަނީ ވީ އެންމެ އަވަހަކަށް މާލެ ވަޑައިގަތުމަށްކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވީ، އެމަނިކުފާނަށް ލިބިވަޑައިގެންނެވި އަނިޔާތައް ވަރަށް ގިނަ ކަމަށެވެ. އެހެންނަމަވެސް މަސައްކަތް ކުރައްވަނީ، މާތްﷲގެ ހެޔޮ ރަޙުމަތްފުޅާއެކު، އަނިޔާތަކުން ފަސޭހަވެވަޑައިގެން ވީއެންމެ އަވަހަކަށް މާލެ ވަޑައިގަތުމަށް ކަމަށް ވިދާޅުވިއެވެެ.
މެއި 6ވަނަ ދުވަހު އެމަނިކުފާނަށް އަމާޒުކޮށް، ދިން ބޮމުގެ ހަމަލާގައި ލިބިވަޑައިގަތް އަނިޔާތަކަށް އޭޑީކޭ ހޮސްޕިޓަލުގައި ފަރުވާ ހޯދެވުމަށްފަހު ޖަރުމަންވިލާތަށް ވަޑައިގަތީ މެއި 13ވަނަ ދުވަހުއެވެ. ފަރުވާގެ ހުރިހާ ކަމެއް ނުނިމޭތީ އަދިވެސް އެމަނިކުފާނު ހުންނެވީ ޖަރުމަންވިލާތުގައެވެ.
ނަޝީދުގެ ހާލުކޮޅާ ގުޅޭ ގޮތުން ބޭބޭފުޅު ޑރ. އިބްރާހީމް ނާޝިދު ކުރެއްވި ޓްވީޓެއްގައި ވިދާޅުވީ، ފައިތިލައަށް ލިބިވަޑައިގެންނެވި ޒަޚަމް ފިޔަވައި އެހެން ހުރިހާ ޒަޚަމެއް ފަސޭހަވެއްޖެ ކަމަށެވެ. އެއާއެކު ބުރާސްފަތި ދުވަހަށް ޑޮކްޓަރުން ކުރިން ތާވަލުކުރި އެންޑޮސްކޮޕީ ވެސް ކެންސަލްކޮށްފައި ވާކަމަށެވެ.
ރައީސް ނަޝީދު ދިރިއުޅުއްވާ ކެނެރީގެ ކައިރީގައި، ސައިކަލެއްގައި ހަރުކޮށްފައިވާ އައިއީޑީއެއް ގޮއްވާލުމުން އެމަނިކުފާނުގެ ހަށިކޮޅަށް 10 ރޭޒާފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލިއެވެ. މި ރޭޒާފުއްތައް ނަގަން 16 ގަޑިއިރުގެ އޮޕަރޭޝަންތަކެއް ވަނީ ކޮށްފައެވެ.
