އައްޑޫ ސީޓީގައި 127 އެކްޓިވް ކޭސް
317 މީހުން ބަލިން ރަނގަޅުވެފައިވޭ
އައްޑޫގައި ކޮވިޑަށް ޕޮޒިޓިވްވާ މީހުންގެ އަދަދު މިވަނީ ދަށަށް ގޮސްފައި
އައްޑޫ ސިޓީން އިތުރު 7 މީހަކު ޕޮޒިޓިވްވެ، ޖުމްލަ 446ށް އަރައިފިއެވެ.
އައްޑޫ އެމަރޖެންސީ އޮޕަރޭޝަން ސެންޓަރުން އާއްމުކޮށްފައިވާ ތަފާސްހިސާބުތަކަށް ބަލާއިރު، މިހާތަނަށް 446 މީހަކު ޕޮޒިޓިވްވެފައިވެއެވެ. އަދި 317 މީހުން ބަލިން ރަނގަޅުވެފައިވެއެވެ. ބުދަ ދުވަހު 159 ސާމްޕަލެއް ނަގާފައިވާ ކަމަށާއި، އޭގެ ތެރެއިން 7 މީހަކު ޕޮޒިޓިވްވެފައިވާ ކަމަށް އެ ސެންޓަރުން މައުލޫމާތުދެއެވެ.
މިހާރު އައްޑޫ ސިޓީގައި 127 އެކްޓިވް ކޭސް ހިމެނޭއިރު އެއްވެސް މީހަކަށް އެޑްމިޓްކޮށްގެން ފަރުވާދެމުން ނުދެއެވެ. އައްޑޫ ސިޓީން މިބަލީގައި ދެ މީހަކު ނިޔާވެފައިވެއެވެ.
ހިތަދޫގައި ކޮވިޑް-19ގެ ހާލަތު ގޯސްވުމާ ގުޅިގެން އެ އަވަށް އެއް ހަފްތާގެ މުއްދަތަށް މިހާރު ވަނީ ލޮންޑައުންކޮށްފައެވެ. އެގޮތުން ހުއްދައަކާ ނުލައި ބޭރަށް ނިކުތުން މަނާ ކޮށްފައިވާއިރު ކޮންމެ ގޭބީސީއަކަށް ވެސް ބޭރަށް ނިކުތުމަށް ދެ ފާހެއް ދޫކުރެއެވެ. އެ ދެ ފާސް ދޫކުރަނީ ދެ ގަޑިއަކަށް ބަހާލައިގެން ކޮންމެހެން ޒަރޫރީ ބޭނުންތަކަށް އެކަންޏެވެ.
މީގެ އިތުރަށް ދަނޑުވެރިންނާއި މަސްވެރިންނަށް ވަކި ފާހެއް ދޭން ނިންމާފައިވާއިރު ވަޒީފާގެ ގޮތުން ބޭރަށް ދާން ޖެހޭ މީހުން ވަޒީފާއަށް ދާން ޖެހޭ ގަޑިތަކުގައި ފުލުހުންގެ ޕޯޓަލް މެދުވެރިކޮށް ފާސް ނެގޭނެ އިންތިޒާމު ވެސް ވަނީ ހަމަޖައްސާފައެވެ. މީގެ އިތުރަށް ކެފޭ ރެސްޓޯރަންޓުތަކުން ޑެލިވަރީ ނޫން އެހެން ޚިދުމަތެއް ނުދެވޭ ގޮތަށް ހަދާފައިވާއިރު ފަތިހު 4ން ހެނދުނު 8ށް ކަސްރަތުކުރުމުގެ ފުރުސަތު ލިބޭނެ ކަމަށް ވެސް ބުނެފައިވެއެވެ. މިގޮތަށް ކަސްރަތަށް ހުއްދަދީފައިވަނީ ވެސް އެކަނި ކަސްރަތުކުރުމަށް ނުކުމެވޭގޮތަށެވެ.
ހިތަދޫގައި ކޮވިޑް-19 ހާލަތު ގޯސްވެފައިވަނީ އެރަށުގައި އުޅޭ ބިދޭސީންގެ މެދުގައި ކޮވިޑް-19ގެ ބޮޑު ކްލަސްޓަރއެއް އުފެދިގެންނެވެ.
